Matié 23 - Kebu go dore go herua 1978

Lageng angalang kalang ga gelé so go Kumu koi dang ga Parisié bu’

¹ Kardené Jésu yégé kalang ga yaué combu kang anjama gai.

² Ddi yégé wa: Gié go kalang ga gelé so go Mois koi kang ga Parisié na, na ca poré so go Mois koi toi waldong wang.

³ Na ca ma ga maga kual mam go ké ba yegengang nai, ama ddo keng ’yogelé gié gogé go lo ’eno, cawa ké la gié ca gelé gogé lé ’eno.

⁴ Ké saddu henga ga nindong, ké sigé kalang caigé, ama ké kain jégenégé, kau ké si tebenégé ca jégenégé dang henga ga nindong lé aié gogé ’eno.

⁵ Ké lé gié gogé mam ca kalanga selagé. Ké poi laia do wodelong dang ddoginyé go a duro kual go Kumu koi, ké saddié tumoigé dang telaigé, ké cogen badigé gagé ga gemdong suguddong ’yé togeldégé dugo.

⁶ Ké dar kiddin ga jomé ga tumu a duro kiddin ga do go soré go gumu, dang jangerong ga gemdong a duro kuluyong ga yaué ga Juib kagé.

⁷ Ké dar ca kandia lagé labia do hormo a to gasgo bua, kalanga tegagé ga gelé bu’.

⁸ Ama keng na, ddo ké togogeng ga gelé ’eno, cawa keng mam na, kenga karmé, go gelé gogenga pena mera.

⁹ Ddo keng togé kema pena a duro delinya baigeng ’eno, cawa Baigenga pena mera, ddi go a dang ni.

¹⁰ Ddo ké togogeng kalang ga gemdong ’eno, cawa gumu gogenga pena mera, na Krist.

¹¹ Ddi go gumu a duroigeng na, ddai ddi belu kogeng go gié.

¹² Kema goni goni goa belé gusi gumu na, ka jogi kié go wusin, kema goni goni goa belé gusi kié go wusi na, ka belei kema go gumu.

Jésu kaidé kual ca kalang ga babé

¹³ Keng ga gelé so go Kumu koi dang ga Parisié, keng ga babé bagen dogeng. Keng lebu Leu do dang ni kebo tumu kalang, keng gang andong duroiné ’eno, kalang ga daré andong duroiné kau, keng nargé bu’. [

¹⁴ Keng ga gelé so go Kumu koi dang ga Parisié, keng ga babé, bagen dogeng. Keng ’yé kandu ga wamburong henga gagé mam, kardené keng ol suguddong ca kalanga selageng keng ga ddaderong. Ka kaidé kual go gumu caigenga ca.]

¹⁵ Keng ga gelé so go Kumu koi dang ga Parisié, keng ga babé bagen dogeng. Keng dal delinya dang kurai go gumu go ddoaga mam ca belé kema pena anjama gogeng, kiddin ga keng nia waii na, keng jogu belei go tua do kurbinya kua go ddogeng com.

¹⁶ Keng ga golé kalang ga bibé, bagen dogeng, keng yé wa: Kema goni goni nia bbesé gusi dang kulu go yaué go Kumu koi na, na kalin, ama kema goni goni goa besé gusi dang lugunya do duro kulu go yaué go Kumu koi na, bbesé lé wo cai.

¹⁷ Keng ga bibé ga maderiyong, henga ga ddoang gemyai na wa, na lugunya laba, na kulu go yaué go Kumu koi go ba belé lugunya arin carara ga?

¹⁸ Keng yé com: Kema goni goni nia bbesé gusi dang dandang do tibé na, na kalin, ama kema goni goni nia bbesé gusi dang pagé go tibé go a ca dandang lé na, bbesé lé wo cai.

¹⁹ Keng ga bibé, henga ga ddoang gemyai na wa: na pagé go tibé laba, na dandang do ba belé pagé go tibé lé arin carara ga?

²⁰ Kema goni goni goa besé gusi dang dandang do tibé na, ddi bbesé gusi danga dandang do tibé bua, dang pagé go tibé goa ca bu’.

²¹ Kema goni goni goa bbesé gusi dang kulu go yaué go Kumu koi na, bbesé gusi danga kulu go yaué go Kumu koi bua, dang Kumu go jomé dura bu’.

²² Kema goni goni goa bbesé gusi dang dang na, ddi bbesé gusi danga pogu go Kumu koi bua, dang Kumu go jomé cai bu’.

²³ Keng ga gelé so go Kumu koi dang ga Parisié, keng ga babé, bageng dogeng. Keng bi Kumu henga ga yagé kebegé pena a duro ga moac main kembo bua, dang cida bua, dang ku bu’, ama keng sol gelé go gumu go ddo mam a duro so go Kumu koi semgin, main kual go kaidé geddang bua, dang olum bua, dang bo cindi bu’. Na ké ga keng nia légé, keng sol kané semgin ’eno bu’.

²⁴ Keng ga bibé ga golé ga bibé, keng daga kang cindegé ama keng soidé legema.

²⁵ Keng ga gelé so go Kumu koi dang ga Parisié, keng ga babé, bageng dogeng. Keng pela ’engo kang dalin karndigé go dong, ama keng ddé duroigé wonang henga gageng ga koié bua, dang tabelang dogeng do gusugeng do isini bu’.

²⁶ Ji Parisié go bibé, ji pela ’engo dura jua ma, kardo do belé arin bu’.

²⁷ Keng ga gelé so go Kumu koi dang ga Parisié, keng ga babé bageng dogeng. Keng gené mainya kemgané ga ké ba gangel caigé béré ddar ca solé kain, ama duroigé won danga isé ga kalang ga maré kagé dang ddisin doni doni bu’.

²⁸ Kenga main kain bu’, cawa kalang solgeng mainya kalang ga geddang kain, ama ddaindegeng duroiné wonanga babé dang isinwa.

Jésu kaidé kual caigé

²⁹ Keng ga gelé so go Kumu koi dang ga Parisié, keng ga babé bageng dogeng. Keng gaddu kemgané ga kalang ga cogelé kebu go Kumu koi kogé ddaderong, keng nyan kemgané ga kalang ga geddang kagé bu’.

³⁰ Keng yé wa: Ni nia duro saman do moindereni togé na, ni go daiang nagé ca deddé ga cogelé kebu go Kumu koi ’eno.

³¹ Main kain na, keng sol ca kenga ké ga deddé ga cogelé kebu go Kumu koi lé moinderégé.

³² Main kain na, ga kara gié go moinderegeng kogé go ba si toi lo.

³³ Keng kumbulo ga kari karndo, keng ’erem ca kenga nyuroddu a duro kual go kaidé go tua do kurbinya kua mena ga?

³⁴ Na ca ma, ga jageng, ’enung da gigengang go cogelé kebu go Kumu koi bua, dang ga nadurong dang ga solé kual toi bu’. Kenga deddu ga pena bua, kenga bbobeldé ga pena ca sia go adegelé bua, keng da té ga pena dang belau a duro kuluyong gageng ga yaué ga Juib kagé bua. Keng da kobegé duro gulong go gemdong goni goni mam bu’.

³⁵ Na ca ma kalang ga geddang ga ké ba deddegé mam din a duro saman do Abél go geddang toi bera deddé go Sakari go Baraki kurondi koi go keng ba deddi a duro kulu go yaué go Kumu koi kang dandang do tibé Kumu duroigé, ’yergu dogé da ’yomgeng.

³⁶ ’Enung wa yogenga cindi waldong wang: Kalang ga ké ba ddedegé lé mam ’yergu dogé da ’yom kalang ga cakcak lé kua.

Jésu kederei ’yé Jorsalem

³⁷ Ai Jorsalem, ai Jorsalem, mé do deddié ga cogelé kebu go Kumu koi. Mé worindé ké ga Kumu ba gigigé dang keddang, ’enung dar ca yau kalang gé a gusung main tuadda ba yauang karndo ga buddu to tela kain cang mena ga? ama keng dara ’eno.

³⁸ Main kain na, ka ddé kulu gogeng kalin bering.

³⁹ Ama ’enung yegeng waldong wang: Cakcak kua, keng go jogé soalang ddang com ’eno bera kenga yé wa: Dda Kumu si busu ca ddi go wa orangang gusong go Bagulong koi.