Biblia Todo Logo
Bìoball air-loidhne

- Sanasan -

Matié 20 - Kebu go dore go herua 1978


Ga gié ga lo gié duro yagé go sur

1 Sela, Leu do dang ni gené mainya Bagulong go ba andongang joguddu cualala ca daré kalang ga oré loi gié duro yagé goi go sur.

2 Ddi nyan kualang nagé ca duro wolé pena na, ddia da bigé laré go doarna pena, kardené ddi gigé duro yagé goi go sur lé.

3 Ddi andong dong ddang com dang habinya go bandu, ddi sol kané dang ’eré duro gasgo kalin.

4 Ddi yégé wa: Keng kau, ’erageng la gié duro yagé guang go sur bu’, ’enung da bugeng laré go geddang.

5 Ké ’yé, Bagulong lé jogu andong dong ddang com dang teba duro gulong ddar, ddi jogu lé main kain com dang teba ca do borndo bu’.

6 Kardené ddi jogu andong dong teba do borndo peram, ddi wai kané dang ’eré kalin bu’, ddi ’engergé wa: Keng ddobu teba dang ’eré go kalin yag na, cawa ga?

7 Ké jogu yei wa: Ca kema go togeni ca gié wo ’eno. Ddi yégé wa: Keng kau, ’erageng la gié duro yagé guang go sur bu’.

8 Kiddin ga teba ba ka na, Bagulong lé yei koi go kibi wa: Tega kalang ga gié lé, ji bigé laré gogé, ji si to a gusu ga gié ga karu bera ’era kara gusu ga gié ga tumu.

9 Ké ga ba osum lo gié dang teba do borndo peram na, ké wai laré go doarna pena pena.

10 Kiddin ga ké ga ddi ba tégé tumu ba ’yéni na, ké ’erem ca ka da ’ya laré nain, ama ké kau, ddi bigé laré go doarna pena pena bu’.

11 Kiddin ga ké ba ’yé laré lé na, ké lé sudené ca bagulong lé.

12 Ké yei wa: Ké ga ji ba tégé karu, ké la gié bbala kiddin pena ’eno, ama ji bigé laré bbalang nani, ni ga ba lé gié cin teba sodeléni gelaldong.

13 Ama Bagulong jogu yei go pena a duroigé wa: Bajandung, ’enung babein ’eno, ’enung nyan kualang nain ca ji la gié duro wolé pena dang laré go doarna pena ’eno ga?

14 Ji ’ya laré goin ’era, ’enunga daré ca boi kema lé go ’enung ba tegai karu laré bbalé rés main koin kain.

15 ’Enung bbal ca lo henga ga kedereng ba dargé lo dang laré guang ’eno ga? Laba ji la ddengi ca ’enunga go ddari ga?

16 Jésu jogu yégé com: Ké ga karu na, ka belé ga tumu. Ké ga tumu na, ka belé ga karu.


Jésu jogu yé kual subu ca temaidi dang belé goi goang cindi a duro ga maré
( Mark 10:32–34 ; Luk 18:31–34 )

17 Kiddin ga Jésu wa oré Jorsalem na, ddi gol anjama gai moac ca sua kang nagé kaindigé, ddi yégé wa:

18 Selageng, na wa orogeng Jorsalem, ka bu Kema Kurondi kuaba ga tibé Kumu gemdong gagé, dang kalang ga pasé so go Kumu koi. Ka kaidé kual cai go deddei.

19 Ka bi kuaba kalang ga toigé ddang ca kandia lai bbojo, ké teiang belau, ka bbobeli ca sia go adegelé, wolé subu ddia belang cindi a duro ga maré.


Jak kang Jâ ’yoigé olé gua
( Mark 10:35–45 )

20 Kardené Sébedé karndi ’yoigé ’yé gusu Jésu dang karndo, to poi gomda tumoi, to olei henga ga pena.

21 Ddi ’engero wa: Mé dar wa ga? To jogu yei wa: Ji durang kebu ca kiddin ga jia di termala na, karndung ga sua lé kua, koné pena jima ca kobin go barua bua, koné jima ca kobin go masa bu’.

22 Ama Jésu jogu ya wa: Keng sela henga ga keng wa olegé ’eno. Kenga bbal so ddarin do gelé cin do ’enung da so ga? Ké jogu yei wa: Nia bbal.

23 Ddi jogu yégé wa: Keng da si ddarin duang, ama na ’enunga go poré ké ga da jom ca kuabang go barua dang go masa ’eno. Kiddin lé na ca ké ga Bang ba nyangang nagé.

24 Kiddin ga ga anjama kané ga moac ba jé kual lé kain na, kederégé homdégé ca kermégé ga sua lé.

25 Kardené Jésu tégé gusi mam, ddi yégé wa: Keng sol ca kermeleng ddia ca kalang gagé, gemdong gagé kau la dono caigé bu’.

26 A gusugeng na, na main kain ’eno, kema go pena a duroigeng nia dar ca ddia jomé go gumu na, ddai ddi bel kogeng go gié.

27 Kema go pena a duroigeng nia dar ca ddia jomé go tumu na, ddai ddi bel guiang gogeng.

28 Main Kema Kurondi kain, ddi ’erga ca kandia lai gié ’eno, ama ca ddia logé kalang gié. Ddi bo gusi ca toré kalang combu.


Jésu hangu kalang ga bibé sua cindegé
( Mark 10:46–52 ; Luk 18:35–43 )

29 Kiddin ga ké wa andong dong a Jariko na, kalang ga yaué combu kobu Jésu.

30 Kalang ga bibé sua ga jomé tibin giyong jé ca Jésu na wa halé, ké tang noigé do osi, ké yei wa: Bagulong Dabid Kurondi, ji sela nyageini.

31 Kalang ga yaué combu lé nargé, ké yégé ca kandia sugaia, ama ké tang noigé osu ddang com, ké yei wa: Bagulong Dabid Kurondi, ji sela nyageini.

32 Jésu ’eré dugo, ddi tégé, ddi ’engergé wa: Keng dar ca ’enung lagenga wa ga?

33 Ké jogu yei wa: Bagulong, ni dara ca cindini sela kiddin.

34 Jésu sol nyageigé, ddi cidelé cindegé, kobegépadda ké sol kiddin, ké kobi.

© Alliance biblique universelle (United Bible Societies) 1978.

British & Foreign Bible Society
Lean sinn:



Sanasan