Matié 19 - Kebu go dore go herua 1978

Gelé go Jésu koi ca taié go kandu

¹ Kiddin ga Jésu gelé goi lé ba ka na, ddi ddé Galali, ddi sai ’yé ca gesong ga Judé a ca kurai go Jurdé.

² Kalang ga yaué combu kobi, ddi bigé kalang gagé ga hoamya labia a kené.

³ Ga Parisié ga pena ’yé gusu Jésu ca gesauoi, ké ’engeri wa: So guana ddana ca kema taia tamdi ca wané doni doni ga?

⁴ Jésu jogu yégé wa: Keng ddugenya a duro cidab do Kumu toi do ba yé waldong wang ga? Ddi go dibé hengang to do so din na, ddi debu barua kang tama.

⁵ Kardené ddi yé wa: Na ca ma barua da ddé bai kang ’yoi ca daié jomé kang tamdi, ké ca’, ka jia gusu pena.

⁶ Ka sua ’eno, ama ka gusu pena. Ddo kema gosinyé henga ga Kumu ba daigé ’eno.

⁷ Ga Parisié ’engeri wa: Nia kain ma, Mois si ca kema nia dar ca taié tamdi na, kondi ba maktub do taia kuoba cawa ga?

⁸ Jésu jogu yégé wa: Ca ddaindegeng ’osua gua ma, Mois ddogeng ca kenga taia kandigeng, ama to do so cegereg na, na main kain ’eno.

⁹ ’Enung yegenga waldong wang: Kema goni goni go tamdia la béli ’eno ma, ddia nia taio ’yé ’yo do ddang na, ddi la béli.

¹⁰ Anjama gai yei wa: Kual go barua koi kang tama nia main kain na, golgo ’yo go gusu wo ’eno.

¹¹ Jésu jogu yégé wa: Kalang mam bbal ca ’yo gelé lé kua ’eno, ama na ké ga Kumu ba bigé dono mera.

¹² Kual cindi kaindi kaindi wo kené ca naré bainyong ’yo kandu, ga pena na, na a gusu wo gogé din, ga pena na, kalanga belegé adum, ga pena ’ya ’eno ca Leu do dang ni. Kema goni goni goa bbal ca ’yo gelé lé na, ddai ddi ’ya.

Jésu si busu ca karang ga wusinyong

¹³ Kalang gol karang ga wusinyong ’yang gusu Jésu ca kondia si kalndi caigé ca ’ulang, ama anjama gai nargé oré gusi.

¹⁴ Kardené Jésu yégé wa: Ga ddageng karang ga wusinyong ké ’erang gusung, ga naregé ’eno, cawa Leu do dang ni na ca ké ga main nagé kain.

¹⁵ Ddi si kalndi caigé, kardené ddi ddégé, ddi ’yé.

Marna goang lainyong

¹⁶ Kema go pena ’yé gusu Jésu ’engeri wa: Bagulong, ’enunga la wa ga ddari ma, ’enunga wai jomé goang cindung bera kuddum ga?

¹⁷ Jésu yei wa: Ji ’engerung ca henga ga ddaria cawa ga? Go ddaria pena, ji nia dar ca andong duro jomé goang cindin na, ji maga so.

¹⁸ Ddi ’engeri wa: Na goni ga? Jésu jogu yei wa: Ji deddé temai ’eno bua, ji lo béli ’eno bua, ji koié henga ’eno bua, ji yo kual go ca kema pena ’eno bua.

¹⁹ Ji la bain kang ’yoin hormo bua, kederein ’ya mondin main gusung kain bu’.

²⁰ Marna lé yei wa: ’Enung magu so lé kua mam, ’enung la wa ddang ga?

²¹ Jésu yei wa: Ji nia dar ca belé bbalé kerab na, ’era kel henga gain cong mam, ji bigé kalang ga nyagé laré lé, kardené jia wai lainyong a dang ni, ji ’erang kubang.

²² Ama kiddin ga marna ba jé kual lé kain na, ddi ’yang kederé homé nain cawa ddia go lainyong combu.

²³ Kardené Jésu yégé anjama gai wa: ’Enung wa yogenga cindi waldong wang, na doju bbani ’eno ca kema go lainyong andong duro Leu do dang ni.

²⁴ ’Enung yegeng waldong wang com: Na homé ca legema andong duro ’umbung go lebera kua, ama na doju ca kema go lainyong andong duro Leu do Kumu toi.

²⁵ Kiddin ga anjama gai ba jé kual lé na, ké sol kagelokemo bbani ’eno, ké yé wa: Main kain na, na wanga go bbalé ca wo minyé ga?

²⁶ Jésu solgé, ddi yégé wa: A gusu kalang na go bbalé ’eno, ama a gusu Kumu henga mam bbala bbalé.

²⁷ Kardené Piér jogu yei wa: Sela, ni ddé henga cong mam, ni wa koboin, ni da waia wa ga?

²⁸ Jésu yégé wa: ’Enung wa yogenga waldong wang: Kiddin ga Kema Kurondi da jom ca pogu goi go hormo a duro delinya do herua na, keng ga moac ca sua ga wa kuabang na, keng da jom ca pogerong moac ca sua ca kaidé kual ca to moin to Israél kai ga moac ca sua.

²⁹ Kema goni goni goa ddé gulong goi, kau karmei dang karmei ga kandu, dang bai, dang ’yoi, dang karndi, dang yagé cong cang na, ddia wai cageda cainé aru bua, dang jomé goang cindi bera kuddum bu’.

³⁰ Kalang ga tumu ga cakcak kua combu na, ka belé ga karu bua, kalang ga karu ga cakcak kua combu na, ka belé ga tumu bu’.