Matié 17 - Kebu go dore go herua 1978

Jésu gusi belé kaindi

¹ Wolé jis kardené Jésu gol Piér kang Jak, dang Jâ go kermi, ddi ’yang nagé ca kubung go dang hung kaindigé.

² Gusi belé kaindi cindegé, tumoi piyong main teba kain bua, badigé gai belé béré hér main arinwa go teba kua kain bu’.

³ Kardené anjama ga subu lé sol Mois kang Eli wa yo kualang Jésu.

⁴ Kardené Piér yei Jésu wa: Bagulong, na ddar na jomegeng ba, ji nia dar na, dda ’enung nyané béla ba subu, pena cain bua, pena ca Mois bua, pena ca Eli bu’.

⁵ Kiddin ga ddi wa yo kual dé na, meddalin do pena do arin debegé marem caigé, ké jé nô yaga a duro meddalin lé yé wa: Kua, na Kurandang go kedereng ba ’yei nain, gusung mowung cai combu, ga ja kual goi.

⁶ Kiddin ga anjama gai ba jé nô lé na, ké kembié cindegé dugo, muro légé bbani ’eno,

⁷ Jésu ’yé gusugé cilgé, ddi yégé wa: Ga sageng dang, ga logeng muro ’eno.

⁸ Ké hangdé cindegé dang, ké sela kema go ddang ’eno, na Jésu mera.

⁹ Kiddin ga ké ba gesin a ca kubung lé dugo na, Jésu yégé wa: Ddo keng yoi kema pena henga ga ba boiegeng cindegeng ga keng ba solgé ’eno, bera Kema Korondi belang cindi a duro ga maré jua.

¹⁰ Kardené ga anjama ’enger Jésu wa: Cawa ma kalang ga gelé so go Kumu koi yé wa: Na Gad Eli na go oranga ddi tumu jua ga?

¹¹ Ddi jogu yégé wa: Na gad Eli na go oranga ddi ca nyané henga mam bbalé kerab tumu jua,

¹² ama ’enung wa yogeng waldong wang: Eli caga ka, kalang selai ’eno, ama ké lei henga ga kederégé ba dargé, ka lang Kema Kurondi banga main kain bu’.

¹³ Kardené ga anjama sol ca kondia wa yoga kual go Jâ go disé kalang to kang koi.

Jésu bi kurong goang habé ga isini labia

¹⁴ Kiddin ga ké ba ’erga gusu kalang ga yaué combu na, kema go pena ’yé gusu Jésu, ddi poi gomdi tumoi dugo,

¹⁵ ddi yei wa: Bagulong, ji sela kurandang nyagei cawa ddi duronga asemer, to geli cindi bbani ’eno, to leia waindo waindo, to aseri cin tua bua, dang cin kang bu’.

¹⁶ ’Enung goli ’yang nai gusu anjama gain, ama ké bbala boi labia ’eno.

¹⁷ Jésu jogu yégé wa: Ai keng kalang ga isindong ga basé bo cindi, na mini com ma, ’enunga jomang nageng ga? Na mini com ma, ’enunga ’yom gusungang nageng ga? Ga ’erangang kurong lé wo ké.

¹⁸ Jésu ’al habé ga isini lé, ké durong a kurong lé kederé cong, a kiddin lé padda kurong lé wai labia.

¹⁹ Kardené ga anjama ’yé gusu Jésu kaindigé, ké ’engeri wa: Ni bbala go ni ’alé habé ga isini ca dorang cong ’enoa cawa ga?

²⁰ Jésu jogu yégé wa: Ca bo cindi gogeng bbani. ’Enung wa yogenga cindi waldong wang: Keng nia dang bo cindi nain main laidong cindo kain na, kenga yé kubung wa: Cugela ba, ’era kuani, kubung lé da cogel, henga ga ddogeng wo ’eno. [

²¹ Ama habé ga isini ga main kain lé na go dorang kalin ’eno, na a gusu asiam dang olé mera.]

Jésu jogu yé kual go temaidi kua dang belé goiang cindi a duro ga maré

²² Kiddin ga ga anjama mam ba ’yé Galali na, Jésu yégé wa: Ka bu Kema Kurondi kuaba kalang.

²³ Ka deddi, wolé subu ddia belang cindi a duro ga maré, anjama gai kederégé homdégé bbani ’eno.

Bo go hogé ca kulu go yaué go Kumu koi

²⁴ Kiddin ga Jésu kang anjama gai ba ’yé Kapernom na, kalang ga ’yo hogé a duro yaué go Kumu koi ’yé gusu Piér, ké ’engeri wa: Bagulondin bidé hogé ca kulu go yaué go Kumu koia bo ga?

²⁵ Piér jogu yégé wa: ’I, ddi bida bo. Kiddin ga Piér ba andong gulong na, Jésu yei kual tumu jua, ddi ’engeri wa: Simon, ji ’erema mena ga? Kermeleng ga delinya ’yé hogé a gusu gani ga? A gusu kalang ga gulong laba, a gusu kergé ga?

²⁶ Piér jogu yei wa: Na a gusu kergé. Jésu yei wa: Main kain na kalang ga gulong bu hogé ’eno.

²⁷ Ama na dar ca ddo kalang kederégé homégé ’eno, na ca ma ’era kebu tagu, gusa go jia agai tumu na, hanga kibi, jia wai laré do bbalé bigé hogé guana, ji ai bigé.