Matié 15 - Kebu go dore go herua 1978

Gelé go ca hada do moin

¹ Ga Parisié kang kalang ga gelé so go Kumu koi sai a Jorsalem ’yé gusu Jésu, ké ’engeri wa:

² Anjama gain maga hada do moinderana togé ’enoa cawa ga? Kiddin ga ka do na, ké pel kalndigé main moinderana ba pelang kain ’eno.

³ Jésu jogu yégé wa: Keng gang kain maga so go Kumu koi cong ca magé gelé gogenga cawa ga?

⁴ Kumu yé wa: Ji la bain kang ’yoin hormo, ama kema goni goni goa yé kual go isini ca bai kau ’yoi na, na gad ddi mara.

⁵ Ama keng gel wa: Kema nia yei bai kau ’yoi wa: Henga ga jégené ga kenga waigé a gusung na, ’enung go bogeng ’eno, na sandega do kalin do Kumu toi.

⁶ Keng gel waldong wang ca ddo kema la jégené bai kau ’yoi ’eno, main kain na, keng belé kual go Kumu koia kalin ca gelé gogeng.

⁷ Keng ga babé, go cogelé kebu go Kumu koi Esai ba yé wa: Kumu yé wa:

⁸ Kalang lé bung hormo danga kual go yo kebegé kalin kéd, Ama ddaindigé suguddong hasang nang.

⁹ Kalang lé melawung danga kual go yo go kebegé kalin kéd, Cawa ké gel so go kalang kogé mainya so go Kumu koi.

Henga ga belé kema ddisin

¹⁰ Kardené Jésu té kalang ga yaué combu gusi, ddi yégé wa: Ga jageng kual guang bua, ga selageng toi bu’.

¹¹ Henga ga ba ’yé duro kema kibi na, go belei ddisin ’eno, ama henga ga ba andong dong a kema kibi na, na go belei ddisin.

¹² Kardené ga anjama ’yé gusu Jésu, ké ’engeri wa: Ji sela ca ga Parisié ba jé kual lé na, kederegé humagé cain ’eno ga?

¹³ Ddi jogu yégé wa: Henga gani gani ga Bang go danga besenagé ’eno na, ka torgé cong.

¹⁴ Ga ddageni, ka ga bibé ga golé ga bibé moindi go bibé na, ké ca’, ka aserong duro ’umbung.

¹⁵ Piér ’engeri wa: Ji purani kual go kera lé toi dé.

¹⁶ Jésu yégé wa: Keng kau bbala solé kual lé toi ’eno bu’ ga?

¹⁷ Keng sela ca henga gani gani mam ga ba andong ’yé duro kema kibi na, ké col ya kederei, kardené ké andonga dong ’eno ga?

¹⁸ Ama henga ga ba saga a kema ddaindi andong kibi dong na, na henga ga belé kema ddisin.

¹⁹ Cawa ’eremé go isini saga a kema ddaindi ma, ddei ddi deddang temai bua, ddi lang béli bua, ddi lang podelo bua, ddi koiang bua, ddi yang kual go poi bua, ddi yé kual go isini ca kamdi bu’.

²⁰ Kua na henga ga belé kema ddisin. Ama ca do henga basé pelé kalong ca hada do moin na, go belé kema ddisin ’eno.

Tama do toa ddang bu cindi ca Jésu

²¹ Kardené Jésu sai a kiddin lé ’yé ca gesong ga ddang ’yoabang gulong go gumu go Tir dang Sidon.

²² Tama do Kanan do ba jom ca gesong lé ’yé gusi, to soi tumo, to yé wa: Bagulong Dabid Kurondi sela nyageng, turmang danga habé ga isini kedera, ké gelo cindo bbani ’eno.

²³ Ama Jésu jiga ya kual cainé pena ’eno. Anjama gai ’yé gusi, ké oli, ké yei wa: Ji ya dda to ’era cawa to wa kobena dang ’elé nain.

²⁴ Jésu jogu yégé wa: Ké gigenga ca gamgé ga ba kaiyang ga a Israél mera.

²⁵ Ama tama lé ’yé poié gomda tumoi, to yei wa: Bagulong, ji jigenang.

²⁶ Jésu jogu ya wa: Aié do go karang kogé ca bogé gaié na, ddara ’eno.

²⁷ To yei wa: Na cindi Bagulong, ama gaié na dia wo go ba suderong a kebu kagulondigé dugo.

²⁸ Kardené Jésu jogu ya wa: Ai tama bo cindi gué nain, ddi lang né main mé ba darang kain. A kiddin lé kerab na, turma wai labia.

Jésu bigé kalang ga hoamya combu labia

²⁹ Jésu sai a kiddin lé ’yé kebu go tagu do Galali, ddi nai ca kubung go pena, ddi jom dugo.

³⁰ Kalang combu ’yé gusi, ké ’yang kalang ga midili bua, dang ga bibé bua, dang ga todero bua, dang ga ddugeré bua, dang kané ga hoamya do ddang combu bu’, ké sigé tumu Jésu dugu, ddi bogé labia.

³¹ Kiddin ga ké ba sol kalang ga ddugeré yé kual bua, ga todero belé dono bua, ga midili ’yé ddar bua, ga bibé sol kiddin bu’ na, ké sol kagelokemo, ké debainyu Kumu go Israél kogé.

Jésu bigé kalang ga dubu poddin do

³² Jésu té anjama gai yégé wa: Sela, ’enung sol kalang lé nyageigé, cawa labegé kanga wolé subu, ké wa do ’eno. ’Enung nia ddagé ké jiga tagang kurang na, cindegé oré heremdigé, ké aserong giyong laiga.

³³ Ga anjama ’engeri wa: Na da wai wo go bbalé kalang ga yaué combu lé a duro gada kua ando ga?

³⁴ Jésu ’engergé wa: Wo kobegenga mena ga? Ké jogu yei wa: Na jurgum dang gusa go karang bbani.

³⁵ Kardené ddi yégé kalang ga yaué combu kandia jima dugo.

³⁶ Kardené ddi nyim wo go jurgum dang gusa lé, ddi lei Kumu désé, ddi bbodelé wo lé dugo, ddi bi anjama gai, ga anjama gai gosindégé kalang ga yaué combu lé.

³⁷ Kema goni goni kau di, ké mam aidong, anjama gai yaudé wo toi do jo lé, wondé borong jurgum.

³⁸ Ké ga ba di wo lé na, ka kalang dubu poddin, ama ké ddugunya kandu dang karang kené ’eno.

³⁹ Kiddin ga ddi ba ddé kalang ga yaué combu ’yé na, kardené ddi nai duro kuburo, ddi ’yé ca gesong ga Magadan.