Mark 7 - Kebu go dore go herua 1978

Gelé go ca hada do moin

¹ Ga Parisié kang kalang ga gelé so go Kumu koi sai a Jorsalém, ké ’yé yaué gusu Jésu.

² Ké sol anjama gai ga pena wa do wo dang kalndigé kenwa basé pelé main moinderegé ba gelgang kain ’eno.

³ Cawa ga Parisié kang ga Juib mam, ké pela kalndigé arin jua ma, ké di do dé, cawa ké maga hada do moinderegé togé.

⁴ Kiddin ga ka jiga a to gasgo na, ké di do ’eno dé, ké pela gusugé jua. Ké maga hada do ddang nain do ké ba ’ya, main pelé go ongerang ga ddarin, dang ga bbaserong, dang ga bbaserong ga julong do yilé, dang ga gasulong kain.

⁵ Ga Parisié kang kalang ga gelé so go Kumu koi ’enger Jésu wa: Anjama gai maga hada do moinderana togé ’enoa cawa ma, ké do doang kalndigé kenwa ga?

⁶ Jésu jogu yégé wa: Go cogelé kebu go Kumu koi Esai cogel kual caigenga kerab, keng kalang ga babé, main ké ba pasuang kain, Kumu yé wa: Kalang lé bung hormo danga kual go yo go kebegé mera, Ama ddaindigé suguddong has dang nang.

⁷ Kalang lé melawunga kalin kéd, Cawa ké gela so go kalang kogé main go Kumu koi kain.

⁸ Jésu jogu yégé wa: Keng ddé so go Kumu koi cong ca kobé gelé go kalang kogé.

⁹ Kardené Jésu yégé com: Cindi keng winjé so go Kumu koia durné, keng maga hada dogeng.

¹⁰ Cawa Mois yé wa: Ji bu bain kang ’yoin hormo. Kema goni goni goa yé kual go isini ca bai kau ’yoi na, na gad ddi mara.

¹¹ Ama keng, keng gel wa: Kema nia yei bai kau ’yoi waldong wang wa: Henga ga ’enungang nagé ga jégenegeng, na Korban, to do poré, na kalin do boi Kumu.

¹² Keng ddai ddi jegena bai kau ’yoi ’eno.

¹³ Keng belé kual go Kumu koi kalin dang gelé gogeng gusu kalang ga pena. Keng lé henga ga pena combu main nagé kain bu’.

Henga ga belé kema ddisin

¹⁴ Kardené Jésu té kalang ga yaué combu gusi ddang com, ddi yégé wa: Keng mam ga jageng kual guang bua, ga selageng toi bu’.

¹⁵ Henga ga a gusu kema dong andong kederei go belei ddisin ’eno, Henga ga andegeng ddainya kema na, na henga ga belei ddisinya ké. [

¹⁶ Keng nia dang gesemé ga jo na, ga jageng ddara.]

¹⁷ Kiddin ga Jésu ba ddé kalang ga yaué combu na, ddi andong gulong, anjama gai ’engeri ca kual go kera lé toi.

¹⁸ Ddi ’engergé wa: Keng kau bbala solé kual lé toi ’eno bu’ ga? Henga ga a gusu kema dong go andong kederei go belei ddisin ’eno.

¹⁹ Cawa ké go andong duro ddaindi ’eno, ama na kederei, kardené ké andong gusi dong. (Jésu yé kual lé kua ca belanga henga ga do mam carara.)

²⁰ Ddi yégé com: Henga ga andegang dong a gusu kema, na go belei ddisin.

²¹ ’Eremé go isini saga a kema ddaindi go ddei lo béli, dang koié, dang deddé go temai.

²² Dang podelo, dang kédi, dang bandu, dang segeldé, dang lamé, dang ddéngi, dang guarsin, dang pidé go gusu, dang henga ga lo ga isini gani mam.

²³ Henga ga isini lé kua mam na, andeganga ddainya kema, na ga belei ddisin.

Tama do toa ddang bu cindi ca Jésu

²⁴ Kardené Jésu sai a kiddin lé ’yé ca gesong ga Tir dang ga Sidon. Ddi andong duro kulu go pena, ddi dar ca kema pena solei ’eno, ama ddi bbal ca wosé gusi ’eno.

²⁵ Kuabapadda tama do pena do turma dang habé ga isini na, to jé kual go Jésu koi, to ’yé aserong tumoi.

²⁶ Toa tama do toa ddang, ké wa a Pénisi gesong ga Siri. To ol Jésu dang ’elé ca kondia taia habé ga isini a kederé turma cong.

²⁷ Ama Jésu ya wa: Dda karang ké aidang tumu jua, ca aié wo go karang kogé bo gaié na ddara ’eno.

²⁸ To jogu yei wa: Na cindi Bagulong, wia gaié kau na, ké woida dugu kiddin ga do gang ca goldé do go suaderang a kebu karang.

²⁹ Kardené Jésu ya wa: Ca kual gué go mé ba jogu yei lé na, ’era té, habé ga isini lé durong a gusu turmé lé cong ’enda.

³⁰ To jogu ’yé ta. To wai turma dang woié ca gasulong, habé ga isini lé durong guso cong.

Jésu bi kema go dduguré go yo kualang duro ’eno labia

³¹ Jésu biga cai a Tir, ddi ai giyong go Sidon, ddi dal kebu tagu do Galali, dang gulong go gemdong go moac.

³² Ké gol kema go dduguré go yo kualang duro ’eno ’yang gusi, ké oli ca kondia si kobi cai.

³³ Jésu goli a gusu kalang ga yaué combu ’yang nai waldong kaindi, ddi si tebeni gesemei, ddi tibé kalu cili kema lé kelendi.

³⁴ Kardené ddi ai cindi dang, ddi dor habé subbuk, ddi yei wa: Epata, to do poré, hangang.

³⁵ Kobipadda kema lé gesemei hangdong bua, kelendi porong bu’, ddi yé kual ddar carara.

³⁶ Jésu sigang dono mam ca kandia yoi kema pena ’eno, ama so go ddi ba sigé nain kain lé kau na, ké tor kual goi lé toi dang nain cainé.

³⁷ Kalang sol kagelokemo bbani ’eno. Ké yé wa: Ddi lé henga mam ddar, ddi si ga dduguré jé kual, ga yo kualang duro ’eno kau na, ké yé kual.