Mark 5 - Kebu go dore go herua 1978

Jésu bi kema goang habé ga isini labia

¹ Kardené ké haddu tagu do Galali kuaba koné ca gesong ga Garasiné.

² Kiddin ga Jésu ba gesin a duro kuburo na, kobipadda kema go pena saga a ca kemgané.

³ Kema langa habé ga isini, ddi jomda ca kemgané. Kema goang dono do ’yomoi saddeiang kunja wo ’eno.

⁴ Ké deia gégér gondi waindo waindo, ké saddié kalndiang kunja, ama ddi ardé kunja tau tau bua, ddi poi gégér papal bu’. Kema goang dono do boié kibi dugo wo ’eno.

⁵ Ddi sura waindo waindo, soindoang teba a ca kemgané dang kubung, ddi codu gusiang tauin.

⁶ Kiddin ga ddi ba selga Jésu suguddong na, ddi geré poi gomdi tumoi.

⁷ Ddi soi tumoi osu, ddi ’engeri wa: Kumu go dang Kurondi Jésu, ji dara wa ga? ’Enung olinyang gusong go Kumu koi, ji gelang cindung ’eno.

⁸ Ddi yé kainya ca Jésu sianga dono: Keng habé ga isini, andageng dong a kederé kema lé.

⁹ Kardené Jésu ’enger kema lé wa: Gusondinya mena ga? Ddi yei wa: Gusondanga bub cawa nia combu.

¹⁰ Ddi oli nain kondia taié habé ga isini lé a ca gesong lé kua cong ’eno.

¹¹ A kiddin lé na, kosiyong geri wo kené, ké wa do ca kubung dang.

¹² Habé ga isini lé ol Jésu wa: Ji ddani ni oré andiyong kederé kosiyong lé.

¹³ Jésu ddegé. Kardené habé ga isini lé andong dong a kederé kema lé. Ké ’yé andiyong kederé kosiyong lé, ké posin geré dderendé dugo, ké bbal main dubu sua kain, ké bé cin tagu, ké si kang, ké mardong.

¹⁴ Kalang ga magé kosiyong lé, ké geré, ké yé nô lé duro gulong go gumu dang go karang go duro yagé. Kalang andegang dong ca solé henga ga ba lé.

¹⁵ Ké ’yé gusu Jésu, ké sol kema goang habé ga isini bub lé dang jomé, dang badigé gusi, cindi ddereré, ké lé muro.

¹⁶ Ké ga ba solei na, ké yégé nô do henga ga ba lang kema goang habé ga isini lé kené tumu dang nô do kosiyong togé bu’.

¹⁷ Kardené ké osum olé Jésu ca kondia ddagé gesong gagé.

¹⁸ Kiddin ga Jésu ba nai duro kuburo na, kema goang habé ga isini kené tumu lé oli ddai ddai jomang nai.

¹⁹ Ama Jésu ddai ’eno, ddi yei wa: ’Era tain gusu kalndin, ji yégé nô do henga mam ga Bagulong ba lang nain dang olum doi.

²⁰ Kema lé ’yé, ddi osum doré nô lé ca gesong gang gulong go gemdong moac henga ga Jésu ba lang nai mam. Kalang mam sol kagelokemo.

Jairus turmoi dang tama do ba cilé Jésu badigé gai kebegé

²¹ Kiddin ga Jésu ba haddu tagu kuaba koné dang kuburo na, kalang combu yau gusi. Ddi wo kebu kang.

²² Kema go gumu a duro kalang ga gemdong ga ca kulu go yaué go Juib kogé ’erga gusu Jésu, gusondia Jairus, kiddin ga ddi ba sol Jésu na, ddi aserong tumoi.

²³ Ddi oli nain ca kondia jégenai, ddi yei wa: Turmang do wusin wa dara maré. ’Enung olin ji ’erang, ji si kobin guso ca toa wai labia bua, toa jomang cindi bu’.

²⁴ Jésu ’yé kang nai. Kalang ga yaué combu kobi, ké ’isebedei.

²⁵ Tama do pena kebar ’yé guso bera ddegelé moac ca sua.

²⁶ To gel cin bbani ’eno kuaba ga lo kema, to toin laré gua mam, ama to waia labia ’eno, jogu la nain ddi wal.

²⁷ Kiddin ga to jé nô do Jésu toi, to ’yé andong duro kalang ga yaué combu a kardi. To cil badigé gai.

²⁸ To yé wa: ’Enung nia cil badigé gai mera kau, ’enung da wai labia.

²⁹ Kobapadda kebardo haiyong. To sol guso toa wai labia a duro hoamya lé.

³⁰ Kobipadda Jésu sol dono do pena durong a gusi, ddi kongo sol kalang ga yaué combu, ddi ’enger wa: Na wanga cilé badigé gang ga?

³¹ Anjama gai yei wa: Jia solé kalang ga yaué combu wa ’isebedein, cawa ma ji jogu ’enger wa: Wanga cilang ga?

³² Ama Jésu kongu solgé ca ddia solé go lo henga lé.

³³ Tama lé yurang muro cawa to sol henga ga loa, to ’yé aserong tumoi. To yei kual go cindi mam.

³⁴ Jésu ya wa: Turmang bo cindi gué bé labia, ’era labia, mé wa labia duro hoamya dué lé ’enda.

³⁵ Kiddin ga Jésu wa yo kual dé na, ké ’erga a ta Jairus gumu go ca kulu go yaué go Juib kogé, ké yei Jairus wa: Turmoin ma ’enda, ji gelal Bagulonga cawa ga?

³⁶ Ama Jésu ’eremang kual gogé ’eno, ddi yei Jairus wa: Lo muro ’eno, bu cindi mera.

³⁷ Ddi dda kema pena begai ’eno, na Piér dang Jak kang kermi Jâ mera.

³⁸ Ké ’erga a ta gumu go ca kulu go yaué go Juib kogé. Jésu jé gosé dang ’elé dang suré gomso bbani ’eno.

³⁹ Kiddin ga ddi ba andong gulong na, ddi ’engergé wa: Keng mam gosé dang ’elé dang suré gomsoa cawa ga? Turmo mara lé ’eno, to woia kung mera.

⁴⁰ Ké asi go bbojo, kardené ddi taigé dong mam, ddi gol turmo ba dang ’yoa dang anjama ga subu lé, ké andong duro kulu duroi do turmo ba wo kené.

⁴¹ Ddi ’yom kuaba, ddi ya wa: Talita Kumi, to do poré, turmo ’enung yea mé, sa dang.

⁴² Kobipadda turmo lé sai dang, to osum oré cawa toanga ddegelé moac ca sua. Kobegépadda kalang mam sol kagelokemo bbani ’eno.

⁴³ Ama Jésu segang dono, ddo kema pena solé ’eno. Kardené ddi yégé kandia bo henga ga do.