Mark 2 - Kebu go dore go herua 1978

Jésu bi kema go hoamya do sayé labia

¹ Kardené wolé go pena Jésu boi cai jogu andong Kapernom, ké jé na kondia wo gulong.

² Kalang combu yau bera ké wa kiddin ga jomé ’eno, tumu gulong dong kau kiddin wo ’eno. Jésu dorgé kual go Kumu koi.

³ Kardené kalang poddin ai kema go hoamya do sayé ’yang gusi.

⁴ Ama ké wa kiddin ga oré gusu Jésu ’eno, ca kalang ga yaué combu. Ké gebu kulu cai a kuaba go Jésu wo kené kerab. Kiddin ga ké ba hogeri cong na, ké gesin kuio go kema go hoamya do sayé lé ba woi kené.

⁵ Kiddin ga Jésu sol bo cindi gogé na, ddi yei go hoamya do sayé lé wa: Kurandang, ké burogu isinwa doin ’enda.

⁶ Ama ga pena a duro kalang ga gelé so go Kumu koi dang jomé wo kené, ké ’enger gusugé wa:

⁷ Mena ma kema lé si kual ca Kumu kain ga? Na wangang dono do burogé isinwa, na Kumu pena mera ’eno ga?

⁸ Kobipadda Jésu sol ’eremé gogé, ddi ’engergé wa: Keng ’erem main kainya cawa ga?

⁹ Na gonia ddo hembal go ca yoi kema go hoamya do sayé lé kua ga? Ké burogu isinwa doin laba, ji sa aia kuio goin ’era dang ga?

¹⁰ Ama ’enung dar ca keng sela Kema Kurondi danga dono do burogé isinwa duro delinya. Ddi yé go hoamya do sayé lé wa:

¹¹ ’Enung yeinya ji: Sa, aia kuio goin, ’era tain.

¹² Kobipadda ddi sai dang, ddi ai kuio goi, ddi andong dong cin kalang mam, ké sol kagelokemo, ké debain Kumu, ké yé wa: Na sela henga ga main kain ca pena ’eno bering.

Jésu té Lébi go ’yo hogé

¹³ Jésu andong ’yé kebu tagu do Galali com. Kalang ga yaué combu ’yé gusi, ddi gelgé.

¹⁴ Kiddin ga ddi wa halé na, ddi sol Lébi Alpé kurondi dang jomé duro kulu go ’yo hogé, Jésu yei wa: Ji kubang, Lébi sai kobi.

¹⁵ Kiddin ga Jésu dang jomé kebu do ta Lébi gulong na, kalang ga ’yo hogé combu dang kalang ga isindong, ké jom kebu do daiang nai kang anjama gai cawa kalang ga main kain lé combu wa koboi.

¹⁶ Kiddin ga kalang ga gelé so go Kumu koi kang ga Parisié ba sol ca Jésu wa doang kalang ga isindong, dang kalang ga ’yo hogé lé na, ké ’enger anjama gai wa: Ddi di do, ddi si kang dang kalang ga ’yo hogé dang kalang ga isindong cawa ga?

¹⁷ Kiddin ga Jésu ba jé na, ddi yégé wa: Kalang ga labia go daré kema go lo kema ’eno, na ga hoamya darei mera, main kain na, ’enung ’erga ca toga kalang ga geddang ’eno, ama ce toga kalang ga isindong.

Ké ’enger Jésu ca asiam

¹⁸ Wolé go pena anjama ga Jâ go disé kalang to kang kai kang ga Parisié kagé la asiam. Kalang ’yé ’enger Jésu wa: Anjama ga Jâ kai kang ga Parisié kagé wa lo asiam, ama anjama gain la gogé asiam ’enoa cawa ga?

¹⁹ Jésu jogu ’engergé wa: Tamburwa kudura kajanderdei danga dono do lo asiam kiddin ga tamburwa kudura wo kenang nagé ga? Na main kain ’eno, kiddin ga tamburwa kudura wo kenang nagé na, kang dono do lo asiam ’eno.

²⁰ Ama tabena do ka ai tamburwa kudura a duroigé cong na, na kiddin ga ka lé asiam dé.

²¹ Kema kembé bbilgi dang badigé ga herua cin badigé ga malgi ’eno, cawa badigé ga herua lé da aiyong cong ddual, sagong lé da belé wol ddang com.

²² Kema bé sur kangndo ga herua duro ’ideli do malgi ’eno, cawa sur kangndo da andié ’ideli, sur kangndo kang ’ideli da tunyong ca’. Ama na main kain ’eno, na gad ké bé sur kangndo ga herua duro ’ideli do herua.

Jésu yé kual ca wolé go jurgum

²³ Wolé go jurgum Jésu cangu duro yagé go kiji. Anjama gai osum poi koni go kiji dang ’ereigé dang.

²⁴ Ga Parisié ’engeri wa: Sela, anjama gain wa lo henga ga so ba nar a duro wolé go jurgum, na cawa ga?

²⁵ Jésu jogu yégé wa: Keng dduginya henga ga Dabid ba lé kang kalang gai ’eno ga? Kiddin ga kurang ba légé na, ké dar do.

²⁶ Ddi andong duro kulu go yaué go Kumu koi duro saman do Abitar toi, ddia gumu go tibé Kumu, ddi di do go ké ba bi Kumu sandega kalin, na wo go so ba nar kalang doi, ama na ca ga tibé Kumu mera. Dabid ai bigé kalang gai bu’.

²⁷ Jésu jogu yégé com: Ké lé wolé go jurgum ca jégené kema, ama ké la kema ca wolé go jurgum ’eno.

²⁸ Na ca ma, Kema Kurondi na wolé go jurgum Bagulondi.