Mark 16 - Kebu go dore go herua 1978

Belé go Jésu koiang cindi a duro ga maré

¹ Kiddin ga wolé go jurgum ba hal na, Maram do Magdala, dang Maram do Jak ’yoi, dang Salomé bu’, ké kel suang go ddowa tuna ca ka oré loi Jésu gusi.

² Kara wolé go jurgum, na wolé go tumu dang joguddu, kiddin ga teba wa andong, ké ’yé ca kemgané.

³ Ké ’enger gusugé wa: Na wanga go oré hengddana keddang a kebu ’umbung lé cong ga?

⁴ Ama kiddin ga ké ba ai cindegé ké sol keddang go gumu lé dang hengddé durné ka’.

⁵ Ké andong duro ’umbung, ké sol marna dang jomé ca kuaba go barua, ddi si badigé ga béré gusi, ké piyong muro.

⁶ Ama ddi yégé wa: Ga logeng muro ’eno, keng dara Jésu go Nasarat go ké ba bbobeli ca sia go adegelé, ddi belang cindi, ddi wo ’eno ba. Selageng kiddin ga ké ba dibi.

⁷ ’Erageng cakcak kua, keng ’yé yogé anjama gai dang Piér, ddi tol tumoigé a Galali, kenga soli a kuani main ddi ba yegengang kain.

⁸ Ké andong dong, ké geré a kebu ’umbung waldong dang yoré dang muro, ama ké yai kema pena ’eno, cawa kanga muro.

Jésu gel gusi cin Maram do Magdala

⁹ Kiddin ga Jésu ba belang cindi a duro ga maré na, ddi gel gusia cin Maram do Magdala tumu jua duro wolé go tumu dang joguddu coalala. Na to do ddi ba tai habé ga isini jurgum a kedera cong.

¹⁰ To ’yé yogé ké gang nai kené tumu, kanga nyagé dang ’elé.

¹¹ To yégé wa: Jésu na wo kenang cindi, toa soli. Kiddin ga ké ba jé kual lé na, ké bu cindi ca kual gua lé ’eno.

Jésu gel gusi cin anjama sua

¹² Kiddin ga anjama kané sua a duroigé wa oré duro giyong na, Jésu gel gusi dang gené go ddang cindegé.

¹³ Ké boi caigé ’yé yogé kamdigé kané, ama ké bu cindi ca kual gogé ’eno bu’.

Jésu gel gusi cin anjama ga moac ca pena

¹⁴ Kardené Jésu gel gusi cin anjama ga moac ca pena, kiddin ga ké wa do. Ddi bojigé ca kandia bo cindi nain ’eno ca ’ermé gogé go duro ddaindigé go sua sua, cawa kandia basé bu cindi ca kual go ké ba soli, kiddin ga ddi belang cindi a duro ga maré.

¹⁵ Kardené ddi yégé wa: ’Erageng duro delinya mam, durageng Nô do Ddari gusu kalang mam.

¹⁶ Kema goa bu cindi na, ga disi to kang, ddia minyé, ama kema goa bu cindi ’eno na, kual go kaidé da ’yomi.

¹⁷ Kua na henga ga kagelokemo ga ké ga bo cindi da légé. Ka tai habé ga isini cong dang gusandang, ka yé kualang kebu go herua go ddang cindi kaindi kaindi.

¹⁸ Ké nia nyim kumbuloang kalndigé kau, ké nia sa kema go ddainyi goni goni kau, go deddegé ’eno, ka si kalndigé ca kalang ga hoamya, ka wai labia.

Jésu jogu tol gusu Kumu

¹⁹ Kiddin ga Bagulong Jésu ba yégé kual lé ka na, kardené Kumu aii dang, ddi jom ca Kumu kobi go barua.

²⁰ Ga anjama ’yé ca doré Nô do Ddari a kiddin mam, Bagulong wa lo gié daiang nagé dang hendé do henga go gelé ga kagelokemo ga ké wa lo, ca kalang sela ca gelé gogé lé na go cindi.