Mark 12 - Kebu go dore go herua 1978

Kual go kera ca kalang ga isindong ga yagé sur

¹ Kardené Jésu osum yégé kual go kera, ddi yégé wa: Kema go pena besen sur duro yagé goi, ddi jibu gê kebo, ddi pai ’umbung go siddé wo gua, ddi boi kulu go porio ca maga. Kardené ddi dda kuaba kalang ga magé sur, ddi sai ’yé terga.

² Kardené kiddin ga aré sur ba bbal na, ddi gi marnei gusu kalang ga magé sur lé ca kandia biang sur doi do kandi ba bi.

³ Ama ké ’yom marnei lé, ké tei, ké ddei ’yé kobi kalin.

⁴ Bagulong lé sai gi marnei go ddang com, ké dé cai ’ya bua, ké nyangdiei bu’.

⁵ Bagulong lé jogu gi go ddang com, ké deddi. Ké lé marnei kané combu main kain bu’, ga pena ké tégé, ga pena ké deddegé.

⁶ Koné go jo pena, na kurondi go kederei ba ’yei nain, ddi gii gusugé karu ges, ddi yé gusi wa: Ka bi kurandang hormo laiga.

⁷ Ama kalang ga magé sur lé yé gusugé wa: Kua, na go do deba lé, ’ernageng na deddei, main kain na sur lé da jina.

⁸ Ké ’yom kurondi lé, ké deddi, ké debu temaidi kara gê dong.

⁹ Jésu ’engergé wa: Bagulong go sur lé ddain da la mena ga? Ddia ’yé, ddia deddu kalang ga magé sur lé cong, ddia ddé yagé go sur lé kuaba kalang ga ddang.

¹⁰ Keng dduginya kual lé kua a duro cidab do Kumu toi ’eno ga? Keddang go kalang ga gaddé ba dibi cong, Na ddia belé keddang go osi go ddo mam.

¹¹ Kua, na Bagulonga lo, Na henga ga kagelokemo ca solé.

¹² Gemdong ga Juib kagé dar ca ’yomé Jésu, cawa ké sol ca ddi yé kual go kera la caigé, ama ké la kalang ga yaué combu muro, ké ddei, ké ’yé.

Ga bi go ddo ca hogé

¹³ Ké gi ga Parisié ga pena gusu Jésu dang gemdong ga pena ga Hérod kai ca ’engerei ca ’yomoiang kual go bandu.

¹⁴ Ké ’yé, ké yei wa: Go gelé, ni sol jia go yo kual go cindi, ji mer kual go kalang kogé ’eno cawa ji para kema ’eno, ama ji gel kalanga giyong go Kumu koi go cindi. Ji yani dé, so guana dda na bi kelma Sésar hogé laba, na boi ’eno ga?

¹⁵ Ama Jésu sol bandu dogé, ddi ’engergé wa: Keng gesawunga cawa ga? Ga bungang silé pena ddang solé dé.

¹⁶ Ké bi pena, Jésu ’engergé wa: Tiddin kang pasé lé kua na wang kai gai? Ké yei wa: Na kelma Sésar kai.

¹⁷ Jésu yégé wa: Henga ga kelma Sésar kai na, ga bi Sésar henga gai, henga ga Kumu kai na, ga bi Kumu henga gai bu’. Kual go ddi ba jogu yégé lé na, ké sol kagelokemo bbani ’eno.

’Engeré ca belé go kalang ga maré kogé goang cindegé

¹⁸ Sadusié ga pena ’yé gusu Jésu, ké ga yo wa: Kalang ga maré na go belang cindegé ’eno, ké ’engeri wa:

¹⁹ Go gelé, Mois pasini so wa: Kema kermi nia ma, ddi ddé tamdi basé karang na, kermia ’ya tamdi lé ca kondia wai kermi go maré lé karang dang na.

²⁰ Tumu na, kalang ga pena jurgum, ka karmé. Go tumu ’yé tama, ddi ma, ddi wa kié dang na ’eno.

²¹ Go sua ’yé wambu lé, ddi ma, ddi wa kié dang na ’eno bu’. Kual lé, lé kermégé go subu lé main kain bu’.

²² Ké ga jurgum ga ’yo tama lé na, ké ma kalin basé wo kié dang na, kardené tama lé ma bu’.

²³ Duro wolé go belé go kalang ga maré kogé goang cindegé na, to jia wang tamdi ga? Cawa ké jurgum mam goranga na.

²⁴ Jésu jogu yégé wa: Keng sela ca keng kaiyonga kaiyong ’eno ga? Keng kaiyonga ca keng sela cidab do Kumu toi dang dono do Kumu toi ’eno.

²⁵ Kiddin ga kalang ga maré da belang cindegé na, bainyongang kandu go ’yo gusugé ’eno, ama ka ji a dang ni mainya kangiyong ga Kumu kai kain.

²⁶ Ama kual go ca belé go ga maré kogé, keng dduginya duro cidab do Mois toi a duro ddoginyé go darin kuin kua ’eno ga? Ké pasu kené kual go Kumu ba yei Mois wa: ’Enunga Kumu go Abraham koi, dang Kumu go Isak koi, dang Kumu go Jakob koi.

²⁷ Kumu ddia Kumu go kalang gang cindegé kogé, ama na Kumu go ga maré kogé ’eno, keng kaiyonga kaiyong bering.

So go gumu go ddo mam

²⁸ Kema go pena a duro kalang ga gelé so go Kumu koi jé mainyé gogé go ké wa mainyé gusugé. Ddi sol ca Jésu jogugé ga Sadusié kual cainé ddar. Ddi ’yé gusi, ddi ’engeri wa: So go gumu go ddo mam na goni ga?

²⁹ Jésu jogu yei wa: Kua, na so go gumu go ddo mam lé, ga jageng keng ga Israél, Bagulong Kumu guana na Bagulonga ddi pena.

³⁰ Dda kederein ’ya Bagulong Kumu goin dang ddaindin mam, dang keudin mam, dang habein mam, dang dono doin mam.

³¹ Sela so go sua com: Dda kederein ’ya mondin main gusin kain. So go gumu go ddo ké ga sua lé kua na, wo ’eno.

³² Go gelé so go Kumu koi lé yei Jésu wa: Ddar combu go gelé, kual go ji ba yei lé na, na cindi, Bagulong na Kumu pena, Kumu go ddang wo ’eno, na ddi pena kiddi kiddi.

³³ Dda kema kederei ’ya Kumu dang ddaindi mam, dang habei mam, dang dono doi mam, dda kederei ’ya mondi main gusi kain, kua na golgo, ddi pagé go ké ba uli tumu Kumu ca dandang do tibé, dang wadelé go tibé go ddang mam.

³⁴ Kiddin ga Jésu ba sol ca kondia jogu yei kual cainé ddar na, ddi yei wa: Jia hasang Leu do Kumu toi ’eno. Kardené kema pena bbala ca ’engerei kual ddang ’eno.

Krist kang Dabid

³⁵ Kiddin ga Jésu wa gelé a duro kulu go yaué go Kumu koi na, ddi ’engergé wa: Na mena ma kalang ga gelé so go Kumu koi yé wa: Krist na Dabid moindi ga?

³⁶ Cawa Dabid bang a gusu Habé ga Kumu kai yé wa: Bagulong yei Bagulondang wa: Ji jima ca kuabang go barua, Bera ’enung da jogu kalang gain ga tebena to gondin dugo.

³⁷ Dabid bang teia Bagulong bu’ ma, Krist sai belé Dabid moindia mena ga? Kalang ga yaué combu jé Jésu kual goiang gusu mowa.

Jésu yégé kalang ga yaué combu wa: Lageng angalang kalang ga gelé so go Kumu koi

³⁸ Ddi yégé kalang ga ddi wa gelegé wa: Lageng angalang kalang ga gelé so go Kumu koi, ké ga daré orang badigé ga suguddong ca kalanga lagang labia to gasgo.

³⁹ Ké dar jomé go ca jangerong ga tumu duro kuluyong ga yaué ga Juib kagé, dang kiddin ga jomé ga gemdong kagé a duro soré.

⁴⁰ Ké ’yé kandu ga wambu henga gagé, ké babu kalangang olé go suguddong ca kalanga selagé ka ga ddaderong. Ké ddain da wai kual go kaidé go gumu caigé.

Sandega do bo do kalin do tama do wambu do nyagé toa

⁴¹ Kardené Jésu jom dur sundugu do bogé laré a duro kulu go yaué go Kumu koi ca solé kalang ga yaué combu wa bogé laré duro sundugua mena. Kalang ga osurdong combu wa bogé laré duro sundugu nain.

⁴² Tama do wambu do nyagé pena ’yé, to bé sisi sua, na silé pena.

⁴³ Kardené Jésu té anjama gai gusi, ddi yégé wa: ’Enung wa yogenga cindi waldong wang, kalin do tama do wambu do nyagé toa do to ba bé duro sundugu lé na, ddia kané togé mam.

⁴⁴ Cawa ké mam henga wigé ’eno, ama a duro nyagé doa to ba henga mam ga toang nagé ga magé guso.