Mark 10 - Kebu go dore go herua 1978

Gelé go Jésu koi ca taié go kandu

¹ Jésu sai a kiddin lé, ddi ’yé ca gesong ga Judé, ddi haddu ’yé ca kurai go Jurdé. Kalang ga yaué combu yau gusi com, ddi jogu gelgé main ddi ba lang waindo waindo kain.

² Ga Parisié ga pena ’yé gusi, ké ’engeri ca gesauei: So guana ddé kema taia tamdi cong ga?

³ Jésu jogu ’engergé wa: Mois segenga mena?

⁴ Ké yei wa: Mois ddé ca kema pasa tamdi maktub do taié ca kondia taia.

⁵ Jésu jogu yégé wa: Mois pasegeng so la ca ddaindegeng do laua.

⁶ Ama to do so cegereg Kumu debu baruang tama.

⁷ Na ca ma kema da ddé bai kang ’yoi ca daié jomé kang tamdi.

⁸ Ké ca’ ka jia gusu pena cawa ka sua ’eno, ama ka gusu pena.

⁹ Cawa henga ga Kumu ba daigé na, ddo kema gosinyégé ’eno.

¹⁰ Ga anjama ’enger Jésu a gulong ca kual lé.

¹¹ Ddi yégé wa; Kema nia tai tamdi cong ma, ddi ’yé ’yo do ddang na, ddi la béli.

¹² Tama nia ddé kudura cong ma, to ’yé ’yo go ddang na, to la béli bu’.

Jésu si busu ca karang ga wusinyong

¹³ Kalang ’yang karang ga wusinyong gusu Jésu ca kondia cilgé, ama ga anjama nargé.

¹⁴ Kiddin ga Jésu ba sol kain na, kederei homi, ddi yégé anjama gai wa: Ga dda karang ga wusinyong lé, ké ’erang gusung, ga naregé ’eno, cawa Leu do Kumu toi na ca ké ga main nagé lé kua.

¹⁵ ’Enung wa yogenga cindi waldong wang: Kema goni goni go kederain ya Leu do Kumu toi main kié go wusin lé kua ’eno na, ddi bbal andong dura ’eno bering.

¹⁶ Kardené ddi nyim karang lé telai, ddi si kalndi caigé bua, ddi si busu caigé bu’.

Kema go laré combu

¹⁷ Kiddin ga Jésu wa oré duro giyong na, kema pena ger gusi poi gomdi tumoi, ddi ’engeri wa: Go gelé go ddari, ’enung la mena ca waié jomé goang cindung bera kuddum ga?

¹⁸ Jésu jogu ’engeri wa: Ji teng go ddaria cawa ga? Go ddari wo ’eno, na Kumu pena.

¹⁹ Ji sol so mam go yé wa: Ji deddé temai ’eno, ji lo béli ’eno, ji koié ’eno, ji yo kual go poi ’eno, ji ’yo kalang henga gagé dang bandu ’eno, ji la bain kang ’yoin hormo.

²⁰ Ddi yei wa: Go gelé, so lé kua mam na, ’enung magi danga marnai duang din.

²¹ Jésu soli, kederei ’yei, ddi yei wa: Henga pena wiein dé, ’era kel henga gain cong mam, ji bigé kalang ga nyagé laré lé, ji nia lé main kain na, jia wai henga ga lainyong a dang ni, kardené ji ’erang kubang.

²² Ama kiddin ga kema lé ba jé kual lé na, gusi melai ddeng ddeng, ddi ’yang kederé homé nain cawa ddia kema go lainyong combu.

²³ Jésu polin anjama gai, ddi yégé wa: Na doju bbani ’eno ca ga lainyong andong duro Leu do Kumu toi.

²⁴ Ga anjama sol kagelokemo bbani ’eno ca kual lé. Ama Jésu jogu yégé com: Karang gang, na doju bbani ’eno ca andong duro Leu do Kumu toi.

²⁵ Na hom ca legema andong tî lebera, ama na doju bbani ’eno ca kema go laré andong duro Leu do Kumu toi.

²⁶ Ga anjama sol kagelokemo bbani ’eno ca kual lé com, ké ’enger gusugé wa: Main kain ma, na wanga go bbalé minyé ga?

²⁷ Jésu solgé, ddi yégé wa: A gusu kalang na, henga lé go ané ’eno, ama a gusu Kumu na kain ’eno, cawa henga mam a gusu Kumu na, ana ané.

²⁸ Kardené Piér jogu yei wa: Sela, ni ddé henga cong mam, ni wa koboin.

²⁹ Jésu jogu yei wa: ’Enung wa yogenga cindi waldong wang, kema nia ddé gulong goi kau karmei ga bainyong, dang ga kandu, dang ’yoi, dang bai, dang karndi, dang yagé goi cong ca nô do ddari na,

³⁰ ddia wai cageda aru, gulong dang karmei ga bainyong dang ga kandu, dang ’yoi dang karndi, dang yagé goi, dang gelé go cin duro saman do cakcak lé kua, ama duro saman do wa orang na, ddia wai jomé goang cin bera kuddum.

³¹ Ama ga tumu combu ga cakcak kua na, ka belé ga karu, ga karu combu ga cakcak kua na, ka belé ga tumu.

Jésu jogu yé kual cai subu ca temaidi dang belé goi goang cindi a duro ga maré

³² Kiddin ga ké wa oré a giyong ca oré Jorsalem na, Jésu wa oré tumu anjama gai, ké sol kagelokemo, ké ga kobei lé muro. Jésu gol anjama gai ga moac ca sua gusi com, ddi yégé ca henga ga da lei.

³³ Ddi yégé wa: Ga jageng, na wa oregenga Jorsalem, ka bu Kema Kurondi kuaba gemdong ga tibé Kumu dang kalang ga gelé so go Kumu koi. Ka kaidé kual cai ca deddei, ka bu kuaba kalang ga toigé ddang.

³⁴ Ka lei bbojo bua, ka tebei kalu cindi bua, ka teiang belau bua, ka deddi bu’, kardené wolé subu ddia belang cindi a duro ga maré.

’Engeré go Jak kang Jâ kogé

³⁵ Kardené Jak kang Jâ, Sébedé karndi, ké ’yé gusu Jésu, ké yei wa: Bagulong, ni dar ca ji lani henga ga nia olgé.

³⁶ Jésu ’engergé wa: Keng dar ca ’enung lagenga wa ga?

³⁷ Ké jogu yei wa: Kiddin ga jia jom duro hormo doin na, dda ni jomé durdin, pena ca kobin go barua, koné ca kobin go masa.

³⁸ Ama Jésu yégé wa: Keng sela henga ga olé ’eno, keng bbal go so ddarin do homé go ’enung da wai, kau gelé go cin go ka desongang nai ga?

³⁹ Ké jogu yei wa: Ni bbal. Jésu yégé wa: Kenga si ddarin do ’enung da so, gelé go cin go ké desongang nai na, ka gelgengang nai bu’.

⁴⁰ Ama kiddin ga jomé kuabang go barua dang ca kuabang go masa na, na ’enunga go bo ’eno, ama na Kumua go bogé ké ga ddi ba nyan kiddin lé caigé.

⁴¹ Kiddin ga anjama kané ga moac ba jé kual lé kain na, kederégé homdégé ca Jak kang Jâ.

⁴² Jésu tegagé gusi mam, ddi yégé wa: Kenga solé, ké ga ké ba sigé ca do leu ca kalang ga toigé ddang na, gemdong gagé la dono caigé, ké ga ba ddigang dono kau, ké la dono caigé bu’.

⁴³ Ama a duro gusugeng na, na main kain ’eno, ama kema goni goni goa dar ca ddia jomé gumu duroigeng na, ddai ddi bel kogeng go gie.

⁴⁴ Kema nia dar ca ddia jomé go tumu a duroigé na, ddai ddi bel keng mam guiang gogeng.

⁴⁵ Cawa Kumu Kurondi ’erga ca kandia loi gié ’eno, ama ca ddia logé kalang gié, ca ddia bo gusi maré ca toré kalang combu bu’.

Jésu hangu Bartimé go bibé cindi

⁴⁶ Ké ’yé Jariko. Kiddin ga Jésu ba andong dong a Jariko kang kalang gai, dang kalang ga yaué combu na, Bartimé go bibé, Timé kurondi dang jomé tibin giyong ca olé henga.

⁴⁷ Kidding ga ddi jé na Jésu go Nasarat, ddi osum soi ’elé, ddi yé wa: Jésu Dabid Kurondi, ji sela nyageng.

⁴⁸ Kalang combu nari kondia sugaia ama ddi jogu soi ’elé com, ddi yé wa: Ji Dabid Kurondi, ji sela nyageng.

⁴⁹ Jésu ’eré dugo, ddi yé wa: Ga tegaiang. Ké tega go bibé lé, ké yei wa: ’Ima gusin, sa dang, ddi wa togoin.

⁵⁰ Ddi dor badigé gai ga gumu wijégé cong, ddi sai ’yé gusu Jésu.

⁵¹ Jésu ’engeri wa: Ji dar ca ’enung leinya wa ga? Go bibé jogu yei wa: Bagulong, ’enung dar ca solé kiddin.

⁵² Jésu yei wa: ’Era, bo cindi goin bin labia. Kobipadda ddi sol kiddin, ddi kobu Jésu duro giyong.