Mark 1 - Kebu go dore go herua 1978

Bérné do Jâ do disé kalang to kang toi

¹ To do so do Nô do Ddari do Jésu Krist Kumu Kurondi toi.

² Main ké ba pasuang duro cidab do go cogelé kebu go Kumu koi Esai toi kain. Sela, ’enung gi kuang go gié tumoin, Ddia nyanin giyong,

³ Tumo do pena wa togé bérné a duro gada: Ga nyana giyong go Bagulong koi, Ga lai ddai ’er tebba.

⁴ Jâ ’yé, ddi jom duro gada, ddi disé kalang to kang. Ddi té bérné do bogé kebu, dda ké desegeng to kang ca Kumu buroga isinwa dogeng.

⁵ Kalang ga a ca gesong ga Judé mam, kang kalang ga Jorsalem mam, ké andong ’yé gusi. Ké tor isinwa dogé toa dong tumu kalang mam, kardené ddi desegé to kang cin kurai go Jurdé.

⁶ Jâ sia badigé ga legema tadda gusi. Ddi saddu kelau go bbala toi. Do goi na sabu kang tumu do duro gada.

⁷ Ddi dor kalang ga yaué combu kual waldong wang: Kema go da ’erga kardung na, ddi ddung danga dono. ’Enung bbala ddingé dugo poré giabé gai gangeigé ’eno.

⁸ ’Enung desegeng danga kang, ama ddia desegeng danga Habé ga Kumu kai.

Jâ disé Jésu to kang, kardené Sidan gesaui

⁹ A duro wolé lé na, Jésu sai a Nasarat do ca gesong ga Galali. Jâ desei to kang cin kurai go Jurdé.

¹⁰ Kobipadda kiddin ga ddi ba nai dang a cin kang na, ddi sol dang hangong, Habé gesinyang cai main bulo kain.

¹¹ Ddi jé nô yaga a dang, to yé wa: Jia Kurandang go kedereng ba ’yein, gusung mowung cain combu.

¹² Kobipadda Habé goli ’yang nai duro gada.

¹³ Ddi jom duro gada wolé to poddin, Sidan gesaui duro wolé lé, ddi jom duro gajong ga cong bu’. Kangiyong ’yé gusi jégenei.

Jésu té kalang ga uré poddin

¹⁴ Kardené ké debu Jâ duro gerngang, Jésu ’yé Galali, ddi dor Nô do Ddari do Kumu toi.

¹⁵ Ddi yé wa: Kiddin bbal, Leu do Kumu toi ji ’yoab, ga bega kebugeng, keng ’yé Nô do Ddari bu’.

¹⁶ Kiddin ga ddi wa halé kebu tagu do Galali, ddi sol Simon kang kermi André. Ké wa bogé lau dogé cin tagu cawa ka kalang ga uré.

¹⁷ Jésu yégé wa: Ga ’eragengang, ’enung belegeng ga uré kalang.

¹⁸ Kobegépadda ké ddé lau dogé, ké kobi.

¹⁹ Ddi ’yé tumu henyé, ddi sol Jak go Sébedé kurondi kang kermi Jâ. Ké jom wo duro kuburo. Ké wa togé lau dogé cindo.

²⁰ Jésu tégé, kobipadda ké ddé baigé Sébedé duro kuburo daiang kalang ga gié, ké ’yang Jésu.

Habé ga isini gel kema cindi

²¹ Jésu kang anjama gai ’yé gulong go gumu go Kapernom. Wolé go jurgum ddi andong duro kulu go yaué go Juib kogé, ddi gel kalang.

²² Ké ga jo gelé goi lé na, ké sol kagelokemo, cawa ddi gelgé mainya go dono kain, na main kalang ga gelé so go Kumu koi kain ’eno.

²³ Kema go pena wo kené duro kulu go yaué go Juib kogé, ddianga habé ga isini. Ddi soi tumoi.

²⁴ Ddi ’engeri wa: Jésu go Nasarat, ji dara wa a gusuni ga? Ji ’erga ca baseni ga? ’Enung solin, jia go arin carara go Kumu ba giyinyang.

²⁵ Jésu nari, ddi yei wa: Keng habé ga isini, ga sugaiageng, andageng dang a kederé kema lé.

²⁶ Habé ga isini lé dolmi noad, ké soi tumoigé osu, ké andiyong kederei.

²⁷ Kalang mam sol kagelokemo. Ké ’enger gusugé wa: Na wa ga? Na gelé go herua laba? Ddiang dono do so habé ga isini ca kandia ja kual goi.

²⁸ Kobipadda Jésu nô doi aju kiddin mam a ca gesong ga Galali.

Jésu bu kalang ga hoamya combu labia

²⁹ Kobegépadda ké andong dong a duro kulu go yaué go Juib kogé, ké ’yé ta Simon kang André. Jak kang Jâ ’yé kang nagé bu’.

³⁰ Simon malgi dang woié main hoamya do dur wa loa kain. Kobegépadda ké yei kual gua.

³¹ Ddi ’yé guso, ddi ’yom kuaba saio dang, dur lé dda. To osum logé gié.

³² To borndo kiddin ga teba ba dobbu na, ké gol kalang ga hoamya mam dang kalang gang habé ga isini bu’. Ké ’yang gusu Jésu dang nagé.

³³ Kalang ga a gulong go gumu lé mam yau tumu gulong.

³⁴ Kalang combu ga wa gelé cinyang hoamya cindo kaindo kaindo na, Jésu bigé labia. Ddi tai habé ga isini cong combu, ddi nar habé ga isini kandia yo kual ’eno, cawa ké solia solé.

Jésu dal ca gesong ga Galali

³⁵ Ti do keddubor ddi sai andong dong, ddi ’yé duro gada ca olé a kené.

³⁶ Simon kang kalang gang nai, ké kobi ca darei.

³⁷ Kiddin ga ké ba waii na, ké yei wa: Kalang mam wa darein.

³⁸ Ddi jogu yégé wa: Dda na oregeng duro gulong go karang go lurana, ’enung oré doré kual kené bu’. ’Enung andong donga ca kual lé.

³⁹ Ddi dal ca gesong ga Galali mam. Ddi dor kual duro kuluyong ga yaué ga Juib kagé. Ddi tai habé ga isini cong bu’.

Jésu bu go kaja labia

⁴⁰ Kema go kaja ’yé gusu Jésu. Ddi poi gomdi tumoi, ddi oli, ddi yei wa: Ji nia dar na, jianga dono do buang labia.

⁴¹ Jésu kederei homi, ddi tar kobi cili, ddi yei wa: ’Enung dar ca ji waia labia.

⁴² Kobipadda kaja ddei, ddi wai labia.

⁴³ Kobipadda Jésu siang dono ca kondia ’era.

⁴⁴ Ddi yei wa: La angal, ddo ji yoi kema pena ’eno, ama ’era, ji gel gusin gusu go tibé Kumu, ji bu henga ga tibé ga Mois ba si ca hendé gusu kalang mam ca jia wai labia.

⁴⁵ Ama kema lé andong dong, kobipadda ddi osum togé kual lé bérné tumu tumu a duro kiddin mam, bera Jésu waia cindi ga oré duro gulong go gumu cin kalang ’eno, ama ddi joma dong duro gada. Kalang sai a kiddin gani gani mam ’yé gusi.