Kolosié 2 - Kebu go dore go herua 1978

¹ Dda ’enung yegeng kual ca gié go osi go ’enung wa loi caigeng bua, ca kalang ga Laudesi bua, ca kalang mam ga ba selang ’eno bu’.

² ’Enung wa gaué gusung ca ké wa dono duro ddaindegé ca ’eré gag bua, ca ké daia pena duro kederé ’yo bua, ca ké bbala wo narua do solé kual go cindi toi bua, dang solé mendem do Kumu bu’, mendem lé na, na Krist bang.

³ Narua dang solé go ba saga a gusu Kumu mam na, Kumu wosaga gusu Krist.

⁴ ’Enung yegeng kual lé kua ca ddo kema pena lamegengang kual go babé ca kaiyegeng ’eno.

⁵ Gusung nia suguddong dang nageng kau na, habung wo kenang nageng. Gusung mowunga, cawa ’enung jé ca keng ’eré pena gag dang dono duro bo cindi go keng ba bu ca Krist.

Jomé goang cindena go na ba wai ca Krist

⁶ Main keng ba ’yé Jésu Krist ca kondia Bagulong kain na, ga jimageng mainya nai kain kerab.

⁷ Ga begageng gaseregeng gusi bua, ga malgageng gusi bua, ga ’ergeng gag waindo waindo duro bo cindi go keng ba bu’ main ké ba gelgengang kain bua, ga lageng désé waindo waindo bu’.

⁸ Ga lageng angal, ca ddo kema pena ’yomegengang narua doang babé go kalang kogé go kalin yag ’eno. Narua do main kain na, saga a gusu gelé go ca hada do kalang togé bua, dang dono do habé ga delinya ka bu’, ama na do Krist toi ’eno.

⁹ Cawa Kumu bang gusi jom wa gusu Krist dang dono doi mam.

¹⁰ Keng wai dono do bbalé kerab na a gusi. Ga ddo ca mam bua, dang kalang ga dono mam bu’ na, ddia ddo caigé.

¹¹ Kiddin ga Krist ba torgeng a duro dono do isinwa do gusu toi na, ddi torgeng danga walé go mandeli go kalang kogé ’eno, ama na walé go mandeli go ba saga a gusu Krist. Walé go mandeli lé na, na toré go a duro dono do isinwa do gusu toi.

¹² Kiddin ga ké ba desegeng to kang na, ké ’embegeng danga Krist bua, ké belegeng a duro ga maré dang nai bu’, cawa keng bu cindia ca dono do Kumu toi do ba beleiang cindi a duro ga maré.

¹³ Tumu na, keng ma maré ca isinwa dogeng bua, kenga ga basé walé mandeli bua, kenga kalang ga toigé ddang bu’. Ama cakcak kua Kumu begeng jomé goang cindegeng daiang Krist bua, Kumu burogu isinwa duana mam bu’.

¹⁴ So go tebenang nana ca gad na magai lé na, ddi dori caina cong, ddi bbobeli ca sia go adegelé toinyi cong.

¹⁵ Ca sia go adegelé go Krist koi na, Kumu toin dono do kalang ga ddo ca togé bua, dang dono do habé ga isini togé bu’, ddi gel cin kalang waldong wang ca ddi nyimgé kalang dang saddé ca Kurondi ba ddigé.

¹⁶ Ddi kema pena kaidé kual caigeng ca henga ga keng wa do bua, dang henga ga keng wa so bua, dang wolé go soré go kederé cindi bua, dang soré go kederé cindi go herua bua, dang soré go wolé go jurgum bu’ ’eno.

¹⁷ Henga lé kua mam na, na henga ga ddari ga wa orang tenddigé, ama henga ga ddari gang gusugé na, na Krist.

¹⁸ Ddo kema pena ddi lamegeng kaiyegeng dang babé goi go bandu bua, dang melaué go kangiyong ga dang kadé bu’ ’eno. Kalang ga main kain lé na, ké si ddaindigé ca soné go ké sela toi ’eno, ké pedé gusugé ca ’eremé gogé go kalin.

¹⁹ Krist bang, na ca do gusu toi, ké ’imai muddag ’eno. Ca wai do Krist toi ma, gusu mam abu gusia gusi, isé cindegé dang deria dai gusugé pena bua, gusu lé malgu main Kumu ba darang kain bu’.

Maré dang jomé goang cin daiang Krist

²⁰ Keng nia ma maré daiang Krist ca hada do delinya toa na, cawa ma keng jom main kenga ga delinya ka kain ga? Cawa ma keng jom ca magé hada do main kain ga?

²¹ Aié ’eno bua, dobé ’eno bua, cilé ’eno bu’.

²² Henga lé kua mam dang gié gogé na, ké hal cong. Ké saga a gusu gelé dang so go kalang kogé.

²³ Cindi, kalang ga pena ’erem ca hada doang gelé go main kain go ba saga a gusu kederé daré ga kalang kagé na, na go bo narua, debé go caiegé dugo, dang ’yomé go ddaindigé osua kau, nara tabelang do gusugé ’eno.