Jâ 2 - Kebu go dore go herua 1978

’Yo go a Kana gulong

¹ A duro wolé go subu ké yau ca ’yo a duro gulong go gumu go Kana do a ca gesong ga Galali. Jésu ’yoi wo kené a kiddin lé bu’.

² Ké té Jésu kang anjama gai ca kandia ’era kiddin ga ’yo lé gang bu’.

³ Kiddin ga sur kangndo ba ka na, Jésu ’yoi yei wa: Sur kangndo ka, wo ’eno.

⁴ Ama Jésu jogu ya wa: Tama, mé bbal ca yoang henga ga ’enung da légé ga? Kiddin gang bbala ’eno dé.

⁵ Kardené Jésu ’yoi yégé ga gié wa: Henga ga ddia yegeng mam na, ga lagé.

⁶ Bbaserong ga gemdong wo kené jis a kiddin lé, na bbaserong ga keddang ga Juib ba sigé ca pelang gusugé ca hada dogé, ga pena bbal ’yo bberiyong moac, kané ga ’yo moac ca sua wo kené bu’.

⁷ Jésu yégé ga gié wa: Ga wunageng bbeserong ga gemdong lang kang. Ké wundégé dang kang pelain pelain.

⁸ Kardené Jésu yégé wa: Ga cangageng cakcak kua, keng ’yé boi soré Bagulondi, ké cangu, ké ’yang boi.

⁹ Kiddin ga soré Bagulondi lé ba dobu kang ga ba belé sur kangndo lé na, ddi sela kiddin ga ké ba waiga sur kangndo lé a kené ’eno. (Ama ga gié ga ba cangu kang lé, ké sol.) Ddi tega tamburwa kudura gusi.

¹⁰ Ddi yei wa: Kema goni goni kau bigé kalanga sur kangndo ga ddari jua, kiddin ga ka si nain na, ké sai bigé sur kangndo ga geddem geddem dé, ama ji ddogu sur kangndo ga ddari bera cakcak kua.

¹¹ Kua, na Jésu gié goi go dono go kagelokemo go cin ga tumu cegereg a Kana do ca gesong ga Galali. Ddi gela hormo doi ca anjama gaia bu cindi gusi.

¹² Kardené ddi sai ’yé Kapernom, kang ga ’yoi dang karmei, dang ga anjama gai, ké jom kené wolé bbani.

Jésu andong duro kulu go yaué go Kumu koi

¹³ Soré go kederé cindi go Juib kogé ji ’yoab. Jésu sai ’yé Jorsalem.

¹⁴ Ddi wai kalang ga kelé sinyong, dang gamgé, dang bulo cong, ddi wai kalang ga kalangé laré dang jomdé duro kuiyoyong gagé a duro kulu go yaué go Kumu koi.

¹⁵ Ddi siber belau do gangé, ddi taigé a duro kulu go yaué go Kumu koi dong mam, dang gamgé gagé danga sinyong, ddi heddebdé kalang ga kelangé laré kuiyoyong gagé dugo, ddi wujerdé laré gogé cong bu’.

¹⁶ Ddi yégé ké ga wa kelé bulo cong wa: Ga nyim henga gageng lé, keng andiyong dong. Ddo keng belé kulu go Bang koi kulu go lo cénegé ’eno.

¹⁷ Anjama gai ’erem ca kual go ké ba pasi duro cidab do Kumu toi: Ai Kumu, ddéngi do kulu goin toi sodelong ddaindung main tua kain.

¹⁸ Kardené ga Juib ’engeri wa: Jia la gié go dono go kagelokemo go wa, go bbalé geleni jianga dono do lo henga ga main kain ga?

¹⁹ Jésu jogu yégé wa: Ga tusageng kulu go yaué go Kumu koi lé kua dugo, ’enung da boii dang duro wolé subu.

²⁰ Ga Juib yei wa: Ké boi kulu langa ddegelé toa poddin ca jis, jia boii duro wolé subu ga?

²¹ Ama kulu go yaué go Kumu koi go Jésu ba yé kual cai lé na, na gusi.

²² Kiddin ga Jésu ba belang cindi a duro ga maré na, anjama gai ’erem ca kual go ddi ba yégé lé. Ké bu cindi ca cidab do Kumu toi, dang kual go Jésu ba yégé bu’.

Jésu sol kalang ddaindigé mam

²³ Kiddin ga Jésu wo a Jorsalem dé na, ké lé soré go kederé cindi. Kiddin ga kalang combu ba sol gié go dono go kagelokemo go ddi ba lei lé na, ké bu cindi gusi.

²⁴ Ama Jésu bu cindi ca kual gogé ’eno, cawa ddi sol ddaindigé mam.

²⁵ Kema bbal ca yoi hendé do kalang togé ’eno, cawa ddi bang sol kalang ddaindigé mam.