Jâ 1 - Kebu go dore go herua 1978

Kual go arinwa goang cindi

¹ Tumu cegereg basé Kumu debé delinya dé na, ddi go ké ba tei Kual go Kumu koi wo kené, Kual lé wo kenang Kumu, Kual lé na Kumu.

² Kual lé wo kenang Kumu tumu cegereg.

³ Kumu lé henga mam a gusi, basé ddi na, henga pena la ’eno.

⁴ Kual langa cindi, cin la bogé kalang arinwa.

⁵ Arinwa lé wa arinyé a duro delem, ama delem nara ’eno.

⁶ Kumu gigu kema go pena go ké ba tei Jâ.

⁷ Ddi ’erga ya hendé do arinwa lé toa, ca kalang mam bu cindi a gusu kual go ddi ba yégé.

⁸ Ddi banga arinwa lé ’eno, ddi ’erga ca yoa hendé ca arinwa lé.

⁹ Arinwa lé na do cindi do ba ’erga duro delinya ca arinya gusu kalang mam.

¹⁰ Kual lé wo kené duro delinya, Kumu lé delinya a gusi, ama delinya selai ’eno.

¹¹ Ddi ’erga gusu kalang gai, ama kalang gai lé ’yai ’eno.

¹² Ama kalang ga pena yib ga ba ’yei na, ddi bigé dono ca kandia belu Kumu karndi.

¹³ Kandia belu Kumu karndi mainya wo go kema koi kain ’eno, ama na ca kederé daré ga Kumu kai, Kumu na Baiga ddi.

¹⁴ Ddi go ké ba tei Kual go Kumu koi lé na, ddi belé kema, ddi jom duroina, ddi lé wai combu bua, ddi yé kual go cindi bua, na sol hormo doi bu’, na hormo do kurong go pena kiddi kiddi go ba ’yaga a kuaba Bai.

¹⁵ Jâ té berné do hendé doi toa, ddi yé wa: Na ddi go ’enung ba yegeng kual goi, ddi wa orang kardung, ama ddi ddeng danga gemyai, cawa ddi wo kené tumang din.

¹⁶ Na mam wai busu duana cainé ddang ddang, na ca wai doi do lainyong.

¹⁷ Kumu bena so a gusu Mois, ama wai dang kual go cindi na, saga a gusu Jésu Krist.

¹⁸ Kema sela Kumu dang cindi ’eno bering, ama Kurong go pena kiddi kiddi, ddia penang Kumu, ddi jom danga Ba, ddi yoana kual goi.

Kual go Jâ go disé kalang to kang koi

¹⁹ Kua na hendé do Jâ toi do ddi ba yé, kiddin ga ga Juib ga a Jorsalem ba gigu gemdong ga tibé Kumu, dang ga Lébi gusi ca ’engeri wa: Jia wang ga?

²⁰ Ddi yé kual go cindi tumoigé mam, ddi mainya ’eno, ddi yégé waldong wang: ’Enunga Krist ’eno.

²¹ Ké ’engeri wa: Jia wang ga? Jia Eli ga? Jâ jogu yégé wa: ’Enunga ddi ’eno. Ké yei wa: Jia wang ga? Jia go cogelé kebu go Kumu koi ga? Ddi jogu yégé wa: ’Enunga Krist ’eno.

²² Kardené ké yei wa: Jia wang ga? Nia joguang kual ca oré yogé ké ga ba gigeni dang mena ga? Ji té gusinya mena ga?

²³ Jâ jogu yégé wa: ’Enunga kema go pena noi do wa togé berné a duro gada. Ga nyana giyong go Bagulong koi ’er tab. (Main go cogelé kebu go Kumu koi Esai ba yang kain.)

²⁴ Kalang ga ké ba gigigé gusu Jâ na, ga Parisié wo kené duroigé.

²⁵ Ké ’engeri wa: Jia nia Krist, kau Eli, kau go cogelé kebu go Kumu koi ’eno ma, ji disé kalang to kang cawa ga?

²⁶ Jâ jogu yégé wa: ’Enung desegenga to kang, ama kema go pena wo duroigeng go keng ba selai ’eno.

²⁷ Ddi ’erga kardung, ama ’enung bbala ddingé dugo poré giabé gai gangeigé ’eno.

²⁸ Henga lé kua mam na, la a Bétani a ca kurai go Jurdé, a kiddin ga Jâ ga wa disé kalang to kang.

Jésu na Gagera go Kumu koi

²⁹ Waindo na, Jâ sol Jésu wa orang gusi, ddi yé wa: Sela, Gagera go Kumu koi go aié isinwa do delinya toa.

³⁰ Na ddi go ’enung ba yegeng kual goi, kema pena wa orang kardung, ama ddia gumu ddeng, cawa ddi wo kené tumang din.

³¹ Ama ’enung selai ’eno, enung ’erga ca disé kalang to kang ca kalang ga Israél selai.

³² Jâ jogu yégé waldong wang: ’Enung sol habé gesingu a dang main bulo kain jom cai.

³³ Ama ’enung selai na kondia lé ’eno dé, ama Kumu go ba gigengang ca disé kalang to kang na, ddia yoang wa: Kema go jia soli Habé na gesin jom cai na, na ddi go da disé kalang dang Habé ga Kumu kai.

³⁴ Jâ yé wa: ’Enung solgé, ’enung yé hendé waldong wang ca ddia Kumu Kurondi.

Anjama ga Jésu kai ga tumu jua

³⁵ Waindo na Jâ jogu baimei lé ddang com dang anjama gai sua.

³⁶ Kiddin ga ddi ba solé Jésu wa halé na, ddi yé wa: Selageng Gagera go Kumu koi.

³⁷ Kiddin ga anjama ga Jâ kai ga sua lé ba jé kual lé na, ké kobu Jésu.

³⁸ Jésu polin solgé ké ga wa koboi lé, ddi ’engergé wa: Keng dar wa ga? Ké yei wa: Rabi, ji jom wa andi ga? (Rabi to do poré na go gelé.)

³⁹ Ddi jogu yégé wa: ’Eragengang, keng da sol, ké ’yé, ké sol kiddin ga ddi ba jom kené, ké hengé dang nai. (Ké waii mainya borndo kain.)

⁴⁰ A duro ké ga sua ga jé kual go Jâ koi go ké ba cogel ca kobang Jésu na, go pena na André, go Simon Piér kermi.

⁴¹ André yeia kermi Simon kual lé tumu jua, ddi yei wa: Ni wai Mésié. (To do poré na Krist.)

⁴² Ddi gol Simon ’yeiang gusu Jésu. Jésu soli yei wa: Jia Simon, Jâ kurondi, ka teinya Képas. (To do poré na keddang.)

Jésu té Pilip kang Nataniél

⁴³ Waindo na, Jésu sai ca oré ca gesong ga Galali, ddi wai Pilip, ddi yei wa: Ji kubang.

⁴⁴ (Pilip na kema go Bétsaida, na gulong go André kang Piér kogé.)

⁴⁵ Kardené Pilip wai Nataniél, ddi yei wa: Ni wai ddi go Mois ba pasu kual goi duro cidab do so, dang go cogelé kebu go Kumu koi ba yé kual goi, na Jésu go Nasarat, Josép kurondi.

⁴⁶ Nataniél yei wa: Henga ga pena ga ddari da saga a Nasarat bu’ ga? Pilip jogu yei wa: ’Erang, ji ’yé solé.

⁴⁷ Kiddin ga Jésu ba sol Nataniél wa orang gusi na, ddi yé kual goi, ddi yé wa: Sela, kema go Israél go cindi go basé babé.

⁴⁸ Nataniél ’engeri wa: Ji solunga mini ga? Jésu jogu yei wa: Kiddin ga jiang jomé to tuagiang main Pilip tegain ’eno dé na, ’enung solin a kené.

⁴⁹ Kardené Nataniél yei wa: Bagulong, jia Kumu Kurondi, jia kelma go Israél.

⁵⁰ Jésu jogu yei wa: Ji bu cindia ca kual go ’enung ba yein wa, ’enung solinyang jomé a to tuagiang lé ga? Jia sol henga ga gumu ga ddo henga lé kua dé.

⁵¹ Ddi jogu yégé com: ’Enung wa yogenga cindi waldong wang, keng da sol dang hangong, kangiyong ga Kumu kai da nai ’yé dang, ka gesingu ca Kema Kurondi.