Hébero 9 - Kebu go dore go herua 1978

Melaué go duro delinya dang melaué go a dang ni

¹ Kebu go doré go tumu danga kual go gelé kerab, ca melaué Kumu duro kulu go yaué go a duro delinya.

² Ké nyan kulu go yaué go badigé. Kulu duroi do kibené na, ké teia go arin carara. Ké si tua kené bua, dang tabel kené bua, dang wo go boi Kumu kené bu’.

³ A kara dersél do sua do a duro kulu go badigé lé na, ké tega kiddin ga arin carara ga ddo mam.

⁴ A duro kiddin ga sua lé na, ké nyiré dandang do luguinya do ulé suang go kajaju go dowa tuna bua, dang sundugu do luguinya do kebu go doré lé. A duro sundugu lé ké si ddarin do luguinya do ké si wo go ké ba tei man kené bua, dang cilang do Aron toi do ba laddu bua, dang keddang ga bbela go ké ba pasu kebu go doré gusi bu’.

⁵ Kangiyong ga hormo ga Kumu kai jom ca sundugu lé, ké gel waldong wang ca Kumu wo kené duroigé. Ké tar majimégé ca dandang do tibé Kumu, na kiddin ga tibé Kumu ca ddi buraga isinwa do kalang togé, ama kiddin ga ca gelegeng kual lé toi mam na, wo ’eno.

⁶ Kiddin ga ké ba nyan henga lé na, ga tibé Kumu andong duro kulu go badigé duroi do kibené ca lo gié gogé waindo waindo.

⁷ Ama a duro ddegelé pena na, gumu go tibé Kumu andong duro kulu go yaué go badigé duroi do sua cai pena mera. Na gad ddi andong kené dang kebar go pagé kogé ca tibé Kumu ca isinwa doi, dang isinwa do kalang ga combi togé bu’.

⁸ Na ca ma, Habé ga Kumu kai gelna waldong wang ca ké hanga giyong go andong duro kiddin ga arin carara ga ddo mam ’eno dé, cawa kulu go yaué go badigé go tumu wo kené dé.

⁹ Kual la kual go kera ca saman do cakcak kua. To do poré do henga lé togé gelna ca sandega do kalin dang pagé go walé ca tibé Kumu na, bbal ca belé kalang ga melaué Kumu ddaindigé arin carara bbalé kerab ’eno.

¹⁰ Kual go ca do bua, dang kual go ca so bua, dang yaué go pelé gusugé arin carara bu’ na, na kual go tibé ca gusugé mera, ké lega ca golang saman do Kumu da belé henga mam herua.

¹¹ Ama Krist ’erga mainya go tibé Kumu dang henga ga ddari ga cakcak kua ’enda. Kulu go badigé go ddi wa lo gié goi duroiné na, ddi go tumu cawa kulu lé na go bbalé kerab, kalanga boié kulu lé ’eno bua, na go delinya do Kumu ba debo kua ’eno bu’.

¹² Kiddin ga Krist andong cai pena mera a duro kiddin ga arin carara ga ddo mam na, ddi tibé Kumu dang uyé kebardigé dang sinyong karndigé kebardigé ’eno, ama ddi tibé Kumu danga kebardi ca ddia minyanang bera kuddum.

¹³ Uyé dang sinyong kebardigé, dang tiri do sinyong karndigé ga ké ba ulgé ca bogé ca kalang ga kenwa, nia belé gusugé arin carara na,

¹⁴ Jésu kebardi ddi henga lé kua ca mena ga? Ca Habé ga bera kuddum na, ddi bu gusi main henga ga tibé go bbalé kerab. Kebardi belé kual go a duro ddaindena go lo gié go kalin arin carara, ca na bbala ca lo gié go Kumu go jomang cindi koi.

¹⁵ Na ca ma, Krist na Bagiyong go ’eré kebu kual go kebu go doré go herua ca kalang ga Kumu ba légé, ca kandia waia busu dang deba dogé do bera kuddum, do Kumu ba dorgé kebu caigé. Ddi bbal ca lo main kainya ca maré goi go ddi ba ma ca toré kalang a duro wané dogé do ké ba la, kiddin ga ké ba jom duro kebu go doré go tumu.

¹⁶ Kema nia ca waié deba doi do ké ba dori kebu ca na, kema go ba dori kebu la go maré jua.

¹⁷ Cawa kiddin ga ddi go ba dor kebu lé nia dang cindi dé na, kebu goi go doré lé go lo gié ’eno. Ddiang dono kiddin ga kema go doré kebu ma jua.

¹⁸ Na ca ma kebu go doré go tumu danga dono ca kebar mera.

¹⁹ Tumu jua na, Mois yégé kalang so go Kumu koi mam go ké ba pasi duro cidab do so, kardené ddi ai sinyong karndigé kebardigé bua, dang uyé kebardigé bua, dang kang bu’. Ddi ai nalu dang gamgé tédegé do yilé, ddi si ciné, ddi wijé ca cidab do so bua, ddi wijé ca kalang mam bu’.

²⁰ Ddi yé waldong wang: Kua, na kebar ca kebu go doré go Kumu ba segeng ca kenga magai.

²¹ Main kain bu’, Mois wijé kebar ca kulu go yaué go badigé, dang henga mam ga ké wa melaué Kumu dang nagé.

²² Ca so go Kumu koi na, ké belé henga nain arin carara a gusu kebar. Kebar nia bega dugo ’eno na, Kumu go burogé isinwa ’eno bu’.

Tibé go Krist koi burogu isinwa

²³ Henga lé na, na tiddin do henga ga dang ni togé, ama na gad ké belegé arin carara main kain. Ama henga ga dang ni dar henga ga tibé Kumu ga ddari ddo.

²⁴ Cawa Krist andong duro kiddin ga arin carara, ga kalang ba lagang kobegé main tiddin do henga ga dang ni kain ’eno, ama ddi tola dang dong, cakcak kua ddi ’eré wo tumu Kumu caina.

²⁵ Gumu go Juib kogé go tibé Kumu andong duro kiddin ga arin carara ga ddo mam, ddegelé dang ddegelé dang pagé kebardigé, ama Krist andong kené ca bo gusi ca tibé Kumu cai cumba ’eno.

²⁶ Nia main kain na, ddi nai gelgu cinyang debé go delinya kua din cai combu bera labegé, ama na main kain ’eno, cawa a duro wolé toi do karé na, ddi ’erga cai pena ca toinyé isinwa congang tibé go gusi ddi bang.

²⁷ Kumu gesua ca kema goni goni kau mara cai pena, kardené Kumu da kaidé kual cai.

²⁸ Na main kain na, Krist kau bu gusi tibé cai pena ca ddi toré isinwa do kalang combu togé. Jogang goi go cai sua na, ddi jiga ca toré isinwa ’eno, ama ddi jiga ca minyé kalang ga wa amei.