Hébero 8 - Kebu go dore go herua 1978

Jésu na gumu guana go tibé Kumu

¹ Kual toi do ni ba yei lé go ddo kual mam woi kua. Nanga gumu go tibé Kumu, ddi jom wa dang ni dur Kumu go dono go ddo mam pogu goi kobi go barua.

² Ddi wa lo gié go gumu go tibé Kumu duro kulu go yaué go Kumu koi. To do poré na kulu go yaué go badigé go Bagulong ba nyani, kema nyané kulu lé ’eno.

³ Gemdong ga tibé Kumu mam na, ké parga paré ca kandia bu sandega do kalin bua, kandia tibi bu’. Na ca ma na gad gumu guana go tibé Kumu lé, ddi wai henga ga tibé Kumu.

⁴ Ddi nia jima duro delinya na, ddi go belé gumu go tibé Kumu ’eno, cawa ga tibé Kumu bu sandega do kalin ca so go Juib kogé.

⁵ Gié go ga tibé Kumu kogé na, na tiddin do henga ga a dang ni togé, main Kumu ba yeiang Mois kain. Kiddin ga ddi wa nyané kulu go yaué go Kumu koi go badigé na, Kumu yei wa: Na gad ji nyana henga mam bbala kerab main ’enung ba gelinyang a ca kebung kain.

⁶ Ama cakcak kua na, ké bi Jésu gié go ddogé mam, cawa ddia Bagiyong go ’eré kebu kual go kebu go doré go ba ddi go tumu, cawa Kumu debu toia ca kebu go doré go ba ddi mam.

⁷ Kebu go doré go tumu nia wané ’eno na, ké go kelangei dang go ddang go sua ’eno.

⁸ Ama kiddin ga Kumu ba sol kalang gai wané dogé na, ddi yé waldong wang: Bagulong yé wa: Wolé wa orang, Kiddin ga ’enunga dor kebu go herua dang ga Israél, Dang to moin go Juda kai bu’.

⁹ Na main kebu go doré go ’enung ba doriang moinderégé kain ’eno, A duro wolé go ’enung ba ’imga kobegé ca toregang a ca gesong ga Ejibté, Cawa ké maga kebu go doré go ’enung ba dorgang nai ’eno, Ama Bagulong yé wa: Na ca ma ’enung solgé semgin.

¹⁰ A kara wolé lé na, Bagulong yé wa: Kua na kebu go doré go ’enunga dorgé ga Israél, ’Enunga si so guang duro ’eremé gogé bua, ’Enunga pasi duro ddaindigé bua, ’Enunga belé Kumu gogé bua, Ka belé kalang gang bu’.

¹¹ Kema pena go geli mondi kau gelmi, Ji sela Bagulong na, wo ’eno, Cawa ké mam da solung, Ga karang bera dang gemdong gagé bu’.

¹² Ca olum duang na, ’enunga borogu wané dogé bua, ’Enung go ’eremanga isinwa dogé ’eno bu’.

¹³ Kiddin ga Kumu ba yé wa: Ddia dora kebu go herua na, ddi belé go tumu malgi. Na sol ca henga ga malgé na, jia ’yoab ca halé cong.