Hébero 7 - Kebu go dore go herua 1978

Mélkisédék ddia kelma bua, ddi go tibé Kumu bu’

¹ Mélkisédék lé na, ddia kelma go Salem bua, ddia go tibé Kumu go dang go ddo mam bu’. Kiddin ga Abraham wa jogang a to kembel worinyé goi go ddi ba ddi ca kermelong na, Mélkisédék waii, ddi si busu cai.

² A duro henga mam ga Abraham ba waigé na, ddi bi henga kebegé pena a duro ga moac. Mélkisédék gusondi toi do poré na, na kelma go geddang. Cawa ddia kelma go Salem na, gusondi toi do poré, na kelma go jali juam bu’.

³ Ké sela Mélkisédék Bai dang ’yoi dang moinderei ’eno, ké sela wolé go ké ba woi, dang wolé goi go maré ’eno bu’. Ddi mainya Kumu Kurondi kain, ddia go tibé Kumu waindo waindo bera kuddum.

⁴ Ga selageng gemyai doi, cawa moindena Abraham bi henga kebegé pena a duro ga moac ga ddi ba waigé a kiddin ga worinyé kembel.

⁵ So go Kumu koi si ga tibé ga Lébi moinderei, ca kandia ’ya henga kebegé pena a duro ga moac a kuaba ga Israél mam, to do poré na, na a kuaba kalndigé, ama ka Abraham moinderei bu’.

⁶ Mélkisédék na Lébi moindi ’eno, ama ddi ’yé henga kebegé pena a duro ga moac a kuaba Abraham, kardené ddi si busu ca ddi go ba wai kebu go doré go Kumu koi.

⁷ Na sol carara ca ddi go ba si busu ca kema na, ddi ddi kema langa gemyai.

⁸ Kalang ga tibé Kumu na, ké ’yé henga kebegé pena a duro moac, ama kardené ké ma, ama kual go Kumu koi yé wa: Mélkisédék ’yé henga kebegé pena a duro ga moac, ama ddi mara ’eno.

⁹ Kardené ’enung yegeng ca kiddin ga Abraham ba bi henga kebegé pena a duro ga moac na, Lébi moinderei ga ba ’yé henga kebegé pena a duro ga moac bi Abraham kebega kain bu’.

¹⁰ Cawa kiddin ga ké wa Lébi ’eno dé na, ddi wa Abraham kederei kiddin ga Mélkisédék ba waii duro giyong.

¹¹ Ga tibé ga to moin go Lébi koi na, ké lé gia ca so go Kumu ba bigé ga Israél, ké nia bbala kerab ma, Kumu sai gi go tibé go ddang go main Mélkisédék kainya cawa ga? Ddia go tibé Kumu main ta gasa ga Aron kain ’eno bu’.

¹² Cawa kiddin ga ké nia kelangu gié go ga tibé Kumu kogé ma, na gad ké kelanga so gogé bu’.

¹³ Kual lé na, na ca Bagulondena, ama ddia to moin go ddang go ba la gié go tibé Kumu ca dandang pena ’eno.

¹⁴ Na sol carara ca ké woia to moin go Juda koi. Kiddin ga Mois ba yé kual go ga tibé Kumu kogé na, ddi ya kual ca to moin lé pena ’eno.

Go tibé Kumu go ddang sai dang main Mélkisédék kain

¹⁵ Na sol waldong wang ca go tibé Kumu go ddang sai dang main Mélkisédék kain.

¹⁶ Ddi belé go tibé Kumu na ca so go kalang kogé ’eno, ama na ca dono do jomé goi goang cindi bera kuddum.

¹⁷ Cawa kual go Kumu koi yé waldong wang: Jia go tibé Kumu waindo waindo bera kuddum, Main Mélkisédék kain.

¹⁸ Ké toin so go tumu cong ca ddia todero bua, ddi bbala kerab ’eno bu’.

¹⁹ So go Mois koi belu henga pena bbalé kerab ’eno, ama ca tugoié go herua ma, na caga ’yoabang Kumu.

²⁰ Kardené com, bbesé go Kumu koi wo kené. Ké ga tumu belé ga tibé Kumu basé bbesé.

²¹ Ama Jésu belé go tibé Kumu danga bbesé, cawa Kumu yé waldong wang: Bagulong bbesé gusi cai, Jia go tibé Kumu waindo waindo bera kuddum, Ddi go kelangé kual goi ’eno.

²² Na ca ma, Jésu jia henga ga ddéngé ga kebu go doré go ba ddi go tumu.

²³ Kual go geddang wo kené com. Ké ga tibé Kumu ga tumu na, ka combu, ama maré nargé lo gié bera kuddum.

²⁴ Ama Jésu jomanga cindi bera kuddum, na ca ma gié goi go tibé Kumu go jogé kuaba kema go ddang ’eno.

²⁵ Na ca ma kalang mam ga orang gusi ca oré gusu Kumu na, ddi bbal ca minyégé cakcak kua bera kuddum. Cawa ddi jomanga cindi, ddi wa olé Kumu caigé waindo waindo bu’.

²⁶ Jésu na ddia go gumu go tibé Kumu go ba bbalna kerab, ddia go arin carara bua, ddi la wané dang isinwa pena ’eno bu’, ddia waldong cidag dang kalang ga isindong bua, Kumu aii wo a dang ni bu’.

²⁷ Ddi mainya ga gemdong ga tibé Kumu kané kain ’eno, cawa ké tibé Kumu waindo waindo ca isinwa dogé tumu jua, kardené ké sai tibé Kumu ca isinwa do kalang togé dé, ama kiddin ga ddi ba bu gusi cai pena mera ca tibé Kumu ca kalang mam na, ddi ka gié go tibé Kumu ’enda.

²⁸ So go Mois koi bela kalang ga todero ca kandia la gié go gemyai go tibé Kumu, ama bbesé go Kumu koi go ddi ba bbesé kara wolé go so lé na, belé Kurong main gumu go tibé Kumu bbalé kerab kain waindo waindo bera kuddum.