Hébero 4 - Kebu go dore go herua 1978

¹ Kumu doarna kebu ca na andong duro kiddin ga bogé gelalang nai. Dda na lo angal ca ddo kema pena a duroigeng wié ca andong a duro kiddin ga bogé gelalé lé ’eno.

² Cawa na jé Nô do Ddari lé mam, main kalang ga a duro gada ba jang kain. Ké jé kual lé ama kual lé jégenagé ’eno, cawa kiddin ga ké ba jé kual lé na, ké bu cindi ca kual lé ’eno.

³ Na ga bo cindi na, na da andong duro kiddin ga bogé gelalé lé, main Kumu ba yang kain: ’Enung bbesé gusung dang mainyé, Ké go andong duro kiddin ga bogé gelalang nang ’eno bering. Ddi yé kual lé main kain, ama ddi la gié goi ka tumu din jua ma, ddi debu delinya dé.

⁴ Cawa ké pasu duro cidab do Kumu toi a duro kiddin ga pena, ddi yé kual ca wolé go jurgum wa: Kumu bé gelalé ca gié goi mam duro wolé go jurgum.

⁵ Kumu yé kual lé main kain com a duro kiddin ga pena wa: Ké go andong duro kiddin ga bogé gelalang nang ’eno bering.

⁶ Kalang ga ba jé Nô do Ddari lé kua tumu jua na, ké go andong duro kiddin ga bogé gelalé ’eno, ca ké bu cindi ’eno, ama kalang ga pena bbal ca andong duro kiddin ga bogé gelalé dang Kumu.

⁷ Na ca ma Kumu dor wolé go herua ddang com go ddi ba tei na labegé. Kardené ddi yé kual combu main kain a kebu Dabid, dang pasé wo duro kiddin ga pena ka. Keng nia jé Kumu noi labegé na, Ddo ddaindegeng osua ’eno.

⁸ Ama Josué nia ’era dang kalang lé duro kiddin ga bogé gelalé na, kardené Kumu go yo kual ca wolé go ddang ’eno.

⁹ Wolé go bogé gelalé wo kené ca kalang ga Kumu kai, main Kumu ba bang gelalé duro wolé go jurgum kain.

¹⁰ Cawa kema goni goni goa andong duro kiddin ga bogé gelalang Kumu na, ddi bé gelala ca gié goi, main Kumu ba bang gelalé ca gié goi kain bu’.

¹¹ Main kain na, dda na boiegeng gusuna ca andong duro kiddin ga bogé gelalé lé. Ddo kema pena a duroina kainya kual lé cong ca wiwa andong duro kiddin ga bogé gelalé, main ké ba lang a duro gada kain ’eno.

¹² Cawa kual go Kumu koi danga cindi bua, ddi la gié bu’. ’Yo goi ddia gesengar do kaga sua. Ddi ’yé bera gosin keuang habé bua, ddi wal cin ga isé kagé, ddi gaigé wai sibo bua, ddi andongang ’eremé dang tabelang do a duro kema ddaindi dong bu’.

¹³ Henga pena ga wosé gusugé tumu Kumu na, wo ’eno. Henga mam ga Kumu ba debegé na, ddi solga gandela waldong wang tumoi, na ddi go na mam da ’eré tumoi.

Jésu ddi gemdong ga tibé Kumu mam

¹⁴ Dda na ’er gag a duro bo go cindi go na wa dori, cawa nanga go tibé Kumu go ba ddigé mam go ba tol a dang tumu Kumu, na Jésu Kumu Kurondi.

¹⁵ Cawa go gumu go tibé Kumu cainana, ddi bbal ca solé tedero dana cawa, ké lami dang henga mam main ké wa lamena kain, ama ddi la isinwa pena ’eno.

¹⁶ Na ca ma, dda na oré ca ’eré tumu pogé go wai go Kumu koi basé muro, ca ddi lana olumang wai ca wiwa guana.