Hébero 2 - Kebu go dore go herua 1978

Minyé go gumu

¹ Na ca ma dda na magé kual go cindi go na ba jei dang duro péddéddé, ca ddo na kaiyong ’eno.

² Cawa na sol ca kual go kangiyong ga Kumu kai ba dori na, na go cindi. Kema goni goni goa jé kual lé kua ma, na kubai ’eno na, ka kaidé kual go geddang go ba bbal cai.

³ Na nia sol minyé go gumu lé kua main henga ga kalin kain na, Bagulong da minyana mena ga? Ddi banga doré Nô do Ddari lé tumu jua, kardené kalang ga ba jé kual goi na, ké gelna waldong wang ca kual la cindi.

⁴ A duro wolé lé na, Kumu gel hendé doi daiang nagé a gusu henga ga gelé bua, dang gié go dono go kagelokemo cindi kaindi kaindi bua, dang kalin do Habé gai togé ca kederé daré gai bu’.

Ddia go orang kalang duro minyé

⁵ Delinya do wa orang do na wa yo kual ca lé na, Kumu bigé kangiyong gai dono ca ’eno.

⁶ Na main kain ’eno, cawa kema pena pasu duro cidab do Kumu toi waldong wang: Ai Kumu, kema na wang ma, ji ’erem dang nai ga? Kema gé yag ma, na wang na, ji magi ga?

⁷ Ji belei to kangiyong dugo ca kiddin bbani, Ji bi hormo dang pedé main kelma go gumu kain.

⁸ Ji bi dono ca henga mam. Kiddin ga ddi ba yé wa: Kumu bi kema dono ca henga mam na, kua gelna ca ddi si henga mam wa to gondi dugo, henga pena ja cong ’eno. Ama cakcak kua na sela kema jima ca henga lé mam ’eno dé.

⁹ Ama na sol ca a duro wolé bbani na, Jésu jom to kangiyong ga Kumu kai dugo, ca wai do Kumu toi na, kondia mara ca kalang mam, ama cakcak kua na soliang gundu go hormo dang pedé ca ddi ba ma maré go gelé cin.

¹⁰ Cawa na henga ga ddari cin Kumu go magé henga mam ga ddi ba debegé, ca ddia belé Jésu bbalé kerab ca gelé go cin, ca kondia nyim karang combu ca oré jomang nai duro hormo doi, cawa Jésu na go orang nagé duro minyé.

¹¹ Jésu na ddia go belé kalang arin carara a duro isinwa dogé. Kalang ga ddi belegé arin carara dang ddi bang bu’ na, Baiga pena, na ca ma dasi la Jésu ca togegé karmei ’eno.

¹² Na ca ma ddi yé waldong wang: Ai Kumu, ’enunga gelgé karmeng gusondin, ’Enunga dé kera go debainyein duro yaué mam.

¹³ Ddi jogu yé ddang com: ’Enunga si ddaindung ca Kumu, Ddi jogu yé ddang com: Sela, niang karang ga Kumu ba bungang nagé woi kua.

¹⁴ Cawa ké ga ddi ba tégé karang na, kanga gusu dang kebar. Jésu bang gusi belé main nagé, ddi ai todero do gusugé. Ddi lé main kainya ca a gusu maré goi na, ddi toinyé Sidan goang dono do maré toi cong.

¹⁵ Ca ddia toré ké ga ba jomang muro do maré toi main guiang kain waindo waindo.

¹⁶ Cawa na sol carara ca ddi ’erga ca jégené kangiyong ga Kumu kai ’eno, ama cidab do Kumu toi yé waldong wang, ddi ’erga ca jégené Abraham moinderei.

¹⁷ Na ca ma na gad ddi belé main karmei kain duro henga mam, ca ddi belu go tibé gogé go gumu go geddang goang olum, ca ddi la gié go tibé tumu Kumu ca burogé isinwa do kalang togé.

¹⁸ Ama cakcak kua na, ddianga dono do ca jégené kalang ga wo duro gesaué, cawa ké gesaui ddi bang bua, ké geli cindi bu’.