Hébero 13 - Kebu go dore go herua 1978

Na da mowi Kumu gusia mena ga?

¹ Dda kederegeng ’ya gusugeng waindo waindo ca kenga karmé ca Krist.

² Ga guiobogeng dang lo go kergé ga orang tageng ’eno. Kalang ga pena ga lo main kain lé na, ka yal kangiyong tagé, ké légé terga, ama ké sela na kangiyong ’eno.

³ Ga ’eremegeng dang kalang ga wo duro gerngang main kenga wo kené dang nagé bua, ga ’eremegeng dang kalang ga wa gelé cin main kenga wa gela cinyang nagé kain bu’.

⁴ Dda kalang mam bu ’yo go gusu hormo. Na gad barua kang tama jima geddang dang gusugé. Kalang ga lo béli na, Kumu da kaidé kual caigé.

⁵ Ddo keng lo tabelang do laré toi ’eno, dda gusugeng muageng ca henga ga kobegeng cawa Kumu yé wa: ’Enung go ddoin cong ’eno bua, ’enung go kainyei cong ’eno bering bu’.

⁶ Na ca ma, na yang basé muro wa: Bagulong go jégenang, ’Enung go lo muro ’eno, Kema go loanga wa ga?

⁷ Ga ’eremegeng dang gemdong ga tumoigeng ga ba dorgeng kual go Kumu koi. Ga ’eremegeng ca gié gogé bua, dang maré gogé bua, ga ’yugela bo cindi gogé bu’.

⁸ Jésu Krist kelanga ’eno, ddia main nandi, dang labegé, dang bera kuddum.

⁹ Ddo ké kaiegeng dang gelé go ddang go kaindi ’eno, ddaindena nia ’eré gag ca wai do Kumu toi na, na ddar, na ca so go do koi ’eno, ké ga magé so lé kau, ké wa jégené kené ’eno bering.

¹⁰ Kalang ga tibé Kumu a duro kulu go yaué go badigé go Juib kogé tumu na, ké bbal ca do henga ga a ca dandang doana ’eno.

¹¹ Gumu go tibé Kumu go Juib kogé ’yé duro kiddin ga arin carara, dang pagé kebardigé ca tibé Kumu ca burogu isinwa dogé, ama ké ul paga gusi a kara gulong dong.

¹² Na ca ma, Jésu ma a kara berem dong ca ddia belé kalang arin carara dang kebardi.

¹³ Na ca ma, dda na aiegeng dasi doi caina, na andegeng kara gulong dong daiang nai.

¹⁴ Cawa a dugo kua na, nang gulong go gumu go jomé bera kuddum ’eno, ama na dargenga gulong go wa orang.

¹⁵ Na ca ma, dda na bogeng Kumu tibé go debainyé ca Jésu waindo waindo basé wadé. To do poré na, dda na debainyé Kumu gusondi dang kebena waindo waindo basé wadé.

¹⁶ Ama ddo keng guiobé gié go ddari lo goi go ca jégené gusugeng ’eno, cawa Kumu gusi mowi danga sandega do kalin do main kain lé.

¹⁷ Ga ja kual go gemdong gageng ga tumoigeng kogé bua, ga debu caigeng dugo tumoigé bu’. Ka ga magé keudegeng dang duro, cawa ka ’yang ddoginyé gogé tumu Kumu ca gié gogé go ké wa loi lé. Keng nia jé kual gogé na, ka lé gié gogé dang gusu mowa, nia kain ’eno na, kederegé da homdégé, keng go wo busu ’eno.

¹⁸ Ga ulageng caini waindo waindo. Ni sol ca nianga kual go ddari a duro ddaindeni, cawa ni dar ca lo gié go ddari a kiddin gani gani mam.

¹⁹ ’Enung olgeng ca keng ula Kumu dang meregdé ca ddi hangang giyong ca ’enung jigang gusugeng kala.

Olé

²⁰ Kumu belé Bagulondena Jésu a duro ga maré, ca maré goi ma, ddi belei kalang ga magé gamgé gumu gogé ca kebu go doré jima bera kuddum.

²¹ Dda Kumu go jali juam begeng dono do lo gié go ddari goni goni mam, ca keng la kederé daré gai. Ca Jésu Krist ma, dda Kumu gusi muai dang nana. Dda hormo do Jésu Krist toi jima bera kuddum. Amin.

Labia do karé

²² Karmeng, ’enung olgeng ca keng ja kual go géjé lé kua dang angal, cawa kual go ’enung wa pasegeng dang nai na, na kual combi ’eno.

²³ ’Enung dar ca begeng solé ca ké bé kermana Timoté a duro gerngang dang. Ddi nia waiung kala na, niang nai da yé ca solegeng.

²⁴ Ga lageng gemdong gageng ga gelegeng dang kalang ga Kumu kai labia mam. Karmegeng ga a ca gesong ga Itali legeng labia bu’.

²⁵ Dda wai do Kumu toi jimang nageng mam.