Hébero 12 - Kebu go dore go herua 1978

Kumu na Baina

¹ Kalang ga hendé combu lurana wo kené, na ca ma, dda na bogé henga ga ninyanageng ga wa narena oré tumu tumu cong bua, dang isinwa do wa temdana bu’. Dda na geregeng osu a duro kiddin ga bogé wurejé ga wo tumoina.

² Dda na sogeng cindena ca Jésu, cawa ddia to do so dang to do karé go bo cindi guana toi. Ddi go ba ’yom gusi ma ca sia go adegelé, ddi kain dasi do maré lé toi cong ca gusu mowa go Kumu ba ddogé nai wo tumoi, cakcak kua na, ddi jom wa a ca kuaba go barua go pogu go Kumu koi.

³ Ga ’eremegeng dang homé go kalang ga isindong ba leiang nai, ca ddo keng gelalé ’eno bua, ca ddo gusugeng melageng ’eno bu’.

⁴ Cawa worinyé gogeng tebenang isinwa na, keng worinya bera mara ’eno dé.

⁵ Géjé go Kumu wa gejegeng main Ba wa gejang karndi kain na, keng guiobi ga? Kurandang, ji kainyé gelé go Bagulong koi ’eno, Kiddin ga ddia berajin na, Ddo gusin melain ’eno.

⁶ Cawa Bagulong geja kema go kederei ba ’yei. Kalang mam ga ddi ba ’yegeng gusi main karndi kain na, Ddi tega ké.

⁷ Keng nia ’ima ddaindegeng a duro gelé go cin na, Kumu lang nageng mainya karndi kain. Kurong go Bai gejai ’eno wo kené ga?

⁸ Ddi nia gejageng main karndi kain ’eno na, kenga karang ga launa, kenga karang ga kambé ’eno.

⁹ Ga ’eremageng ca Bainderena ga ba wana, ké mam géjena géjé ma, na bigé horma ca, main kain na, dda na debu caina dugo to Baina go a dang ni ca na jimang cindena.

¹⁰ Bainderana ga wana na, ké géjena wolé sam ca kederé ddari gagé, ama Kumu géjena ca na bel arin carara main nai kain.

¹¹ A duro kiddin ga ké wa géjena na, gusuna go mowena bboag ’eno, kederana homna homé, ama ké ga wa ’yomé gusugé na, kardené ka waié boié gogé duro jomé go jalua juam bua, dang go geddang bu’.

Gelé go géjé

¹² Na ca ma, ga nyageng kalndegeng ga ba gelalu yigadag dang, dang gomdegeng ga lemadu rég rég bu’.

¹³ Ga ’erageng duro giyong go ’eré tab, ca ddo tebaigeng do midili to nyorang ’eno, ama to ’er tebba.

¹⁴ Ga jimageng dang jalua juam dang kalang mam bua, ga belgeng arin carara bu’, cawa kalang ga belé arin carara ’eno na, ké go solé Kumu ’eno bering.

¹⁵ Ga lageng angal, ddo kema pena ddi terinya dang mengai a duro wai do Kumu toi cong ’eno. Ga lageng angal ca ddo kema pena belé garé main sia go ddainyi kain a duroigeng, ca toinyé kalang combu dang mainyé doi ’eno.

¹⁶ Ga lageng angal ca ddo kema pena lo béli ’eno bua, ddi solé henga ga Kumu kai semgin main Esau ba lang, a kiddin ga ddi ba kel deba doi do kié go monjoli cong, ca do go henyé tilem kain ’eno bu’.

¹⁷ Kardené keng sol ca ddi dar busu do Bai toi lé, ama ddi nari cong. Ddi dar busu lé dang ’elé goang tubu do cindi, ama ddi wa dono do kelangé kual go ddi ba yei lé ’eno.

¹⁸ Keng ’era gusu kubung go Sinai ’yoab main kalang ga Israél ba yang kain ’eno. Ké bbal ca cilé kubung lé ’eno, kubung lé danga tua bua, dang delem bua, dang ’endua bua, dang alé bu’.

¹⁹ Dang tura noa bua, dang kual go yo bu’. Kiddin ga kalang ga Israél ba jé tumo lé na, ké oli ca kandia yogé kual cainé ddang com ’eno.

²⁰ Kiddin ga ké ba jé ca kema kau pagé nia cil kubung lé na, na gad ca kandia worinyai dang keddang deddi na, ké bbala ’yomé gusugé ’eno.

²¹ Henga ga ké ba solgé lé na, legé muro bbani ’eno, na ca ma Mois yé wa: ’Enung lé muro dang yoré bbani ’eno.

²² Ama keng caga ’yoabang kubung go Sion, dang gulong go Kumu go jomang cindi koi, na Jorsalem do dang ni doang kangiyong dubu dubu combu.

²³ Ama keng caga ’yoabang yaué go karang ga monjoli ga Kumu kai, ga ké ba pasu gusondigé a dang ni bu’, keng caga gusu Kumu ’yoab, na ddi go kaidé kual ca kalang mam bua, dang kalang ga geddang habeigé ga ba belé bbalé kerab bu’.

²⁴ Keng caga gusu Jésu ’yoab, ddia Bagiyong go kebu go doré go herua bua, dang kebar go ké ba wijei go ba gelena henga ga ba ddi Abél kebardi.

²⁵ Ga lageng angal, ddi go wa yogeng kual na, ddo keng kainyé kual goi cong ’eno. Ké nyurada ’eno, cawa kalang ga ba kain kual go ddi ba yégé duro delinya na, ké nurada ’eno, na nia kain, ddi go wa yoana kual a dang na, mena ma na da nyurodu ga?

²⁶ A duro kiddin lé na, noi gigié gesong, ama cakcak kua ddi tor kebu herua, ddi yé wa: ’Enung go gigia gesong kaindigé mera ’eno, ama ’enunga gigia dang bu’.

²⁷ Kual lé toi do poré gelna carara ca henga ga ké ba debegé na, da gigié bua, da tunyong cong bu’, ama henga ga ba gigiu ’eno na, da ’eré gag.

²⁸ Na ca ma, dda na loi Kumu désé nain, cawa ddi bena leu do basé gigié. Dda na mowoi Kumu gusiang gié go lo bua, dang melaué bua, dang hormo bua, dang muro bu’.

²⁹ Cawa Kumu guana na tua do balalem do ulé kiddin.