Hébero 11 - Kebu go dore go herua 1978

Bo go cindi

¹ Bo go cindi ma, na kual guana go tugoié toi. Henga ga na selagang cindena ’eno na, bo go cindi solga henga ga cindi.

² Kalang ga tumu din mowi Kumu gusia ca bo cindi gogé.

³ Na ca bo cindi ma, na sol ca Kumu debu delinya danga kual goi. Kumu debu henga ga na ba solgang cindena danga henga ga na ba selagang cindena ’eno.

⁴ Na ca bo cindi ma, Abél tibé Kumu tibé go ddari go ba ddi tibé go Kain koi. Cawa Kumu gusi mowi ca sandega do Abél ba bi na, ddi yé waldong wang ca kondia kema go geddang tumoi. Abél ma, ama ca bo goi go cindi na, ddi wa yo kual dé.

⁵ Na ca bo cindi ma, Enok sela maré ’eno. Kiddin ga Kumu aii a dang ca kondia jimang nai na, kema pena waia temaidi ’eno. Cidab do Kumu toi yé waldong wang: Kiddin ga Kumu basé aié Enok dang na, ddi mowi Kumu gusi.

⁶ Basé bo cindi na, kema pena bbal ca mowé Kumu gusi ’eno. Kema goni goni goa dar orang gusu Kumu na, na gad ddi bu cindi ca Kumu wo kené bua, ca kondia da boi kalang ga wa darei bu’.

⁷ Na ca bo cindi ma, Noé jé kual go Kumu ba yei ca henga ga wa orang ga ddi ba selagang cindi ’eno dé. Ddi jé Kumu kebi kerab, ddi habel kuburo go gumu, ddi nyani ca minyang gusi kang karndi bu’. Main kain na, ddi kaidé kual ca delinya. Ca bo cindi goi na, Kumu gesia kema go geddang.

⁸ Na ca bo cindi ma, Abraham jé kual go Kumu koi kiddin ga ddi ba tei, ca kondia ’era ca gesong ga Kumu da bi main deba doi kain. Ddi ddé gesong gai, ddi sela kiddin ga ddia wa oré kené ’eno.

⁹ Ca bo cindi ma, ddi jom duro gesong ga Kumu ba bi ca kebu goi go dori main kerga kain. Ddi jom duro kulu go badigé kang Isak dang Jakob bu’. Kumu dor kebu main kain caigé bu’.

¹⁰ Cawa Abraham wa amé gulong go toi osu kang kang, na gulong go Kumu ba nyani bua, na go ddi ba boii bu’.

¹¹ Na ca bo cindi ma, Abraham kiddin ga ddi ba hal na, ddi belé ba bua, Sara ddegelé doa do wo kié kau hal cong bu’, ama ddi sol carara ca kebu go doré go Kumu koia ser toiné.

¹² Kiddin ga ddi ba ji ’yoab ca maré na, kema go pena lé belé goang moinderei combu. Ké combu main desiddiyong ga dang kain bua, main kelai go kebu kurai go gumu go ddoaga kain bu’.

¹³ Kalang ga ba bu cindi lé na, ké ma kalin mam. Ké wa henga ga kebu go doré go Kumu koi lé ’eno, ama ké sol henga lé suguddong dang nagé has dang gusu mowa, na ca ma ké yé waldong wang ca ka kergé a duro delinya lé kua.

¹⁴ Kalang ga ba yé main kain lé na, gelna carara ca ké wa dara gesong gagé.

¹⁵ Ké nia ’erem ca gesong ga ké ba ddégé na, kanga dono ca jogé kené.

¹⁶ Ama cindi, ké wa dara gesong ga ddo mam, to do poré na gesong ga dang ni. Na ca ma ké nia tegai Kumu gogé kau na, dasi go loi ’eno, cawa ddi ba.

¹⁷ Na ca bo cindi ma, kiddin ga Kumu ba gesau Abraham na, ddi bi Isak sandega main henga ga tibé kain. Na ddi Abraham go Kumu ba dor kebu cai lé, ama ddi ji ’yoab ca walé kurondi go pena kiddi kiddi sandega ca tibé Kumu.

¹⁸ Kumu yei wa: Moinderein ddainya saga to Isak.

¹⁹ Abraham ’erem ca Kumu dang dono ca belé Isak a duro ga maré, ama Abraham jogu wai Isak main kondia bela a duro ga maré kain.

²⁰ Na ca bo cindi ma, Isak si busu ca Jakob kang Esau ca kandia da wa henga a duro wolé go wa orang.

²¹ Na ca bo cindi ma, Jakob si busu ca Josép karndi, tumu jua ma, ddi ma dé. Ddi ddisegé gusi dang ddor doi ca melaué Kumu.

²² Na ca bo cindi ma, Josép kiddin ga ddi ba ji ’yoab ca maré na, ddi yé wa: Ga Israél ddainya ddé gesong ga Ejébt, na ca ma ddi yégé kual ca ’embé go isé gai kogé.

²³ Na ca bo cindi ma, Mois kalndi kiddin ga ké ba woi na, ké wosi kederé subu cawa ké soli ca ddia kié go ddari. Ké la muro ca kainyé so go kelma koi cong ’eno.

²⁴ Na ca bo cindi ma, kiddin ga Mois ba belé go gumu, ddi dar ca kandia togoi Paron turmoi kuranda ’eno.

²⁵ Ddi dar ca wo gelé go cin daiang kalang ga Kumu kai, ddi kain jomé duro gusu mowa go isinwa kua a duro saman lé cong.

²⁶ Ddi ’erem ca ddar ddia wo gelé go cin main go Krist koi kain, ddia henga ga lainyong ga a ca gesong ga Ejibté, cawa ddi si ddaindi ca boié go wo tumoi.

²⁷ Na ca bo cindi ma, Mois ddé gesong ga Ejibté, ddi la kelma mainyé doi muro ’eno. Ddi ’eré gag main ddia sol Kumu danga cindi kain.

²⁸ Na ca bo cindi ma, ddi nyan soré go kederé cindi bua, ddi sigé kalang ca kandia weju kebar kebu kuluyong, ca ddo kangito go deddé temai basé ga Israél karndigé ga monjoli ’eno.

²⁹ Na ca bo cindi ma, ga Israél ’yé duro kurai go gumu go ddoaga go yilé main kiddin ga hai kain, ama kiddin ga kalang ga Ejibté ba ’yé duro kiddin lé na, kurai ’yé caigé baic, ké si kang.

³⁰ Na ca bo cindi ma, berem go Jariko desong dugo kiddin ga kalang ga Israél ba lurei wolé jurgum.

³¹ Na ca bo cindi ma, tama do podelo do ké ba ta Rahab mara daiang ké ga ba kainyé Kumu cong ’eno, cawa to yala kalang ga ké ba sober ca solé kiddin.

³² ’Enung ya mena com ga? Kiddin bbala ca ’enung yegeng kual go Gidion, kang Barak, dang Samson, dang Jépté, dang Dabid, dang Samuél, dang ga cogelé kebu go Kumu koi kogé mam ’eno.

³³ Na ca bo cindi ma, ké ddi ca leuiyong bua, ké lé gié go geddang bua, ké wai henga ga Kumu ba dorgé kebi caigé bua, ké lebu gajong kebegé bu’.

³⁴ Ké bain dono do tua toa bua, ké minyé a kebu gesengar bu’. Tumu ka ga todero, ama ké belé dono bua, kanga dono do worinyé kembel bua, ké ddi asengeriyong ga kergé bu’.

³⁵ Na ca bo cindi ma, kandu wai kalang gagé ga ké ba belegang nagé a duro ga maré. Ama ké gel kalang ga pena cindegé bera ka ma, ké tura gusugé ’eno, cawa ké sol ca ké belegé a duro ga maré dang jomé goang cindegé go ddo mam.

³⁶ Ké lé kalang ga pena bbojo bua, ké té ga penang belau bua, ké sadié kané begé duro gerngang bu’.

³⁷ Ké worindé kané dang keddang bua, ké wadelé ga pena dugo cin sua bua, ké deddu ga pena dang gesengar bu’. Ga pena daldé dandang ’ereigé duro kiddin mam, ké si bbala go gamgé kogé dang go uyé kogé gusugé main badigé kain bu’.

³⁸ Delinya bbala caigé ’eno. Ké daldé duro gada, dang ca kubung bua, ké jom duro ’umburong bu’.

³⁹ Kalang lé mam na, ké wai pedé a gusu Kumu ca bo cindi gogé, ama ké waia henga ga Kumu ba dorgé kebu caigé ’eno dé.

⁴⁰ Ama Kumu nyan henga ga ddari ga ddo wal wo kené caina. Ddi dar ca kalanga bel bbalé kerab tumaina jua ’eno.