Hébero 1 - Kebu go dore go herua 1978

Kumu yana kual gusu Kurondi

¹ Kumu yé kual combu dang moinderana tumu din, dang kual cindi kaindi kaindi gusu ga cogelé kebu goi.

² Ama a duro wolé go kardené go cakcak lé kua na, ddi yena kual gusu Kurondi, na ddi go Kumu ba debu henga mam a gusi bua, Kumu pari ca kondia jima ca henga mam bu’.

³ Na ddi go gusi ba piong biddid biddid dang hormo do Kumu toi, ddi gené mainya Kumu bang digé digé. Ddi jéngdé henga mam dang kual goi go dono. Kiddin ga ddi ba belé kalang arin carara a duro isinwa dogé na, ddi jom wa ca Kumu kobi go barua go dono go ddo mam a dang ni.

Kumu Kurondi ddi kangiyong ga Kumu kai

⁴ Kumu Kurondi ddi kangiyong ga Kumu kai dang gemyai, cawa Kumu banga boi gusong go ddogé mam.

⁵ Cawa Kumu yai kangito goi pena kain wa: Jia Kurandang, Labegé ’enunga belé Bain na, ddi yai kain ’eno bering. Ddi yai kangito pena wa: ’Enunga belé Bai, Ddia belé Kurandang na, ddi yai kain ’eno bering.

⁶ Ama kiddin ga Kumu ba gigu Kurondi go monjoli duro delinya na, ddi yé wa: Dda kangiyong gang mam, ké debainyai.

⁷ Kua na kual go Kumu ba yé ca kangiyong gai. Ddi belegé main kal kain bua, Ddi belé goiyong gai main tua do belelem bu’.

⁸ Ama ca kual go Kurondi koi na, Kumu yé waldong wang: Ai Kumu, pogu goin na, na go bera kuddum, Ji da termala do geddang ca Leu doin.

⁹ Kederein ’ya henga ga geddang, ama ji kain henga ga isini cong. Na ca ma Kumu, ddia Kumu goin, ddi parin, Ddi mowin gusin, ddi bin kiddin ga hormo, Ddi ddi henga ga ddi ba bigé kamdin kané.

¹⁰ Ddi jogé yé com: Jia Bagulong, tumu cegereg na, jia debé gesong toigé dugo, Dang na, na gié go ji ba leiang kalndin,

¹¹ Ka hal cong mam, ama jia ji, Ka belé malgi mam main badigé kain.

¹² Jia temdegé main badigé ga gumu kain, Ka kelangu main badigé kain, Ama ji go kelangé ’eno bua, ji go halua ’eno bu’.

¹³ Kumu yai kangito goi pena kain wa: Ji jima ca kuabang go barua, Bera ’enung so kalang gain ga tebena, Main bbendem kain to gondin dugo, ddi yai kain ’eno bering.

¹⁴ Kangiyong ga Kumu kain na, ka gani ga? Ké mam, ka habé ga loi Kumu gié bua, ddi gigé ca jégené ké ga da wai minyé bu’.