Gelé dong 9 - Kebu go dore go herua 1978

¹ Kardené kangito go bai lom tura doi. ’Enung sol désiddin do pena baga dugo duro delinya. Ddi bo gurongé go ’umbung go digé kuddung go toi basé karé koi kuaba.

² Désiddin lé hangu ’umbung go digé kuddung lé kibi, gesa andegang a duro ’umbung lé main gesa go tua do golé go gumu goi kain. Gesa lé lebu teba bua, kiddin ga dang belé delem serleg bu’.

³ Kardené sabu do ku andegang a duro gesa lé, ké gesin duro delinya. Ddi bigé dono main dono do ddisini toa kain.

⁴ Ddi yégé wa: Kandia toinyé hademé ’eno bua, haiyong ’eno bua, gasa gani gani ga a duro yagé ’eno bu’, ama kalang gang genjer go Kumu koi tumoigé ’eno na, kandia tunyaga ké mera.

⁵ Sabu do ku lé na, ddi bigé dono do deddé kalang ’eno, ama ddi bega dono do ca gelegé cindegé kederé bai mera. Gelé gogé go cin mainya ddisini lo goa go to ba jibu kema kain.

⁶ A duro kederé go bai lé na, kalang da dar ca ka maré, ama ké go waiei ’eno, ké dar maré ama maré suguddong dang nagé.

⁷ Sabu do ku lé na, ké gené mainya hondong ga ké ba nyangé ca worinyé kembel kain. Henga main gundu go luguinya kain wo caigé bua, cindegé gené mainya kalang cindegé kain bu’.

⁸ Téddi do caigé mainya téddi do kandu togé kain bua, kegeigé mainya soru do gijang toi kain bu’.

⁹ Henga wo jurgégé main guangerang go kelma kain. Majemégé yo gogé mainya pariyong ga combi, ga oré worinyé kembal dang hondong yo gogé kain.

¹⁰ Cindegé danga bena main ddisini bena kain. Cinddigé lang dono go gelé kalang cindegé bbalé kederé bai.

¹¹ Kangito go magé ’umbung go digé kuddung go toi basé karé lé na, na sabu do ku kelmagé, ké teiang kebu go Hébero Abadon, dang kebu go Grék ké tei Apolon, to do poré na ddi go basé kalang.

¹² Bagen do tumu hal, ama bagen do sua ji ’yoab ca orang.

¹³ Kardené kangito go jis lom tura doi. A ca dandang do tibé do luguinya do wo tumu Kumu na, ’enung jé nô yé a cambelda poddin.

¹⁴ Nô lé yé kangito go jis goang tura lé wa: Ji pedera kangiyong poddin ga ké ba saddigé a ca kurai go ké ba tei Epraté.

¹⁵ Ddi poderé kangiyong poddin lé ga ba nyan gusugé ca kiddin lé kua dang wolé lé kua, dang kederé lé kua, dang ddegelé lé kua ca deddé kalang kobegé pena, ddé ji sua.

¹⁶ Ddi gelung asengeriyong gang hondong ddoginyé gogé, ka dubu dubu combu, kema bbal ddoginyégé ’eno.

¹⁷ ’Enung sol hondong dang kalang ga ba jom caigé a duro gelé go dong go ké ba geleng. Kanga guangerang jurgogé, yilé main tua kain bua, burnu main gerai go ké ba tei Sapir kain bua, yilé ker ker main kurjo do tua kain bua. Hondong lé caigé mainya ca do gajong togé kain, tua dang gesa dang kurjo andegang a kebegé.

¹⁸ Ké deddu kalang kobegé pena, ddé ji sua, ké deddegé danga henga subu ga ba andegang a kebo hondong lé, na tua dang gesa dang kurjo lé.

¹⁹ Hondong lé dono dogé wa kobegé dang cinddegé. Cinddegé gené mainya kumbulo koi kain dang caigé bu’. Ké gel kalang cindegé dang nagé.

²⁰ Kalang ga ba ji mam ga homé go gumu lé ba deddegé ’eno na, ké kainya henga ga ké ba légé macaigé lé cong ’eno. Habé ga isini dang koliyong ga luguinya, dang germé, dang juliyong, dang keddang, dang haiyong gang dono do solé kiddin ’eno bua, kang dono do jo kual ’eno bua, kang dono do oré ’eno bu’ na, ké wadang melauégé ’eno.

²¹ Kalang lé bega kebegé ca deddé gogé go temai ’eno bua, dang kema gogé go lo go béli go kagelokemo ’eno bua, dang podelo do lo dang gusugé ’eno bua, dang koié henga ’eno bu’.