Gelé dong 8 - Kebu go dore go herua 1978

Genjer go margum

¹ Kiddin ga Gagera ba hangu genjer go jurgum na, kiddin ga dang jalong sengel bbalé main golo do kiddin togé kain.

² Kardené ’enung sol kangiyong jurgum ga ba ’eré tumu Kumu, ké bigé tera jurgum.

³ Kangito go pena go ddang ’eré tumu dandang do tibé dang ’uria go luguinya goang tuna kobi, ké bi tuna nain ca kandia daiang olé go kalang ga Kumu kai kogé mam tebu ca dandang do luguinya do tumu pogu lé.

⁴ Gesa go dowa tuna do ké ba ’uli ’yé dang daiang olé go kalang ga Kumu kai kogé a koba kangito go ba ’eré tumu Kumu.

⁵ Kardené kangito lé ai ’uria goang tuna lé, ddi woniang tua do a ca dandang do tibé, ddi debigi duro delinya, kardené alé yé bua, nô yé bua, wulainyé wulain bua, gesong gigié bu’.

Kangiyong jurgum lom tura

⁶ Kardené kangiyong ga jurgum gang tura do jurgum lé nyan gusugé ca lomegé.

⁷ Kangito go tumu lom tura doi, gerai dang tua wanyang kebar bega ca delinya, delinya kuaba pena ulong, ddé ji sua bua, haiyong kobegé pena ulong, ddé ji sua bua, hademé ga bera ulong mam bu’.

⁸ Kardené kangito go sua lom tura doi. Kubung go gumu durong dang tua, ba cin kurai go gumu go ddoaga. Kurai lé kobi pena belé kebar, ddé ji sua.

⁹ Henga gang cindegé ga a cin kurai go gumu go ddoaga kobegé pena ma, ddé ji sua bua, kuburo kobi pena tunyong, ddé ji sua bu’.

¹⁰ Kardené kangito go subu lom tura doi, désiddin do tungu do ’yé main tua do mutomu kain baga dugo. To ba ca kurai dang tî do kurai toi kobi pena, ddé ji sua.

¹¹ (Désiddin lé gusanda Amertum.) Kang kobegé pena belé ddain, ddé ji sua. Kalang combu ma ca ké ba si kang ga ddainyi lé.

¹² Kardené kangito go poddin lom tura doi. Ké sombu teba kuaba pena toinya, ddé ji sua bua, kederé kobi pena toinyi, ddé ji sua bua, desiddiyong kebegé pena toindé, ddé ji sua bu’. Ké toin arinwa dogé kuaba pena, ddé ji sua bua, teba arinwa goa kobi pena tunyong bua, kederé arinwa goi kobi pena tunyong bu’.

¹³ ’Enung sol kiddin ddang com, ’enung jé gelau gelau go ugé saié a dang wa togang noi dang pong, ddi yé wa: Kiddin ga kangiyong ga jo subu nia lom tura dogé na, bagen, bagen, bagen nain ca kalang ga jomé duro delinya.