Gelé dong 5 - Kebu go dore go herua 1978

Cidab kang Gagera

¹ Ddi go jomé ca pogu lé na, ’enung sol cidab dang temdé a kobi go barua, toang pasé dura dang kardo dong bu’. Ké silinya dang genjer jurgum guso.

² ’Enung sol kangito go dono wa doré kual dang nô do osi, ddi yé wa: Na wang go bbalé hangé cidab do ké ba silinya dang genjer lé kua ga?

³ Ama kema pena go bbalé ca hangé cidab lé ca solé dura wo ’eno, kau a dang ni, kau a duro delinya, kau a to gesong.

⁴ ’Enung ’elé nain ca kema pena go bbalé ca hangé cidab lé ca solé dura wo ’eno.

⁵ Kardené kema go pena a duro ga gemdong lé yeng wa: Ddo ji ’elé ’eno, sela, gejang go a to moin go Juda koi go a to moin go kelma Dabid koi, ddi ddi, ddi bbal ca hangé cidab doang genjer jurgum lé.

⁶ Kardené ’enung sol Gagera dang ’eré a gusu pogu lé. Henga ga Kumu ba debegé lé mainya go maré kain. Ddiang kebong jurgum, dang cindi jurgum. To do poré na habé jurgum ga Kumu ba gigigang a duro delinya mam.

⁷ Ddi go jomé ca pogu lé na, Gagera ’yé ’yo cidab lé a kobi go barua.

⁸ Kiddin ga ddi ba ’yé cidab lé na, henga poddin gang cindegé, kang ga gemdong ga to sua ca poddin lé, ké poi gomdigé tumu Gagera lé, goni goni kau dang jangu doi dang ddarin do luguinya wonang tuna. To do poré, na olé go kalang ga Kumu kai kogé.

⁹ Ké dé kera go herua, ké yé wa: Ji bbal ca ’yo cidab lé, Ca hangé genjer lé, Cawa ké kené deddin, Ji tor kalang dang kebardin bi Kumu. A to moin mam bua, dang kebu mam bua, Dang kalang mam bua, dang to gasa mam bu’,

¹⁰ Ji belegé leuiyong ga tibé Kumu ca kandia lai Kumu guana gié bua, Ca kandia dda termala duro delinya bu’.

¹¹ ’Enung sol kiddin com, kardené ’enung jé kangiyong combu noigé. Ka dubu dubu combu, kema bbal ca ddoginyégé ’eno. Henga gang cindegé dang ga gemdong lé, ké ’eré luré pogu dugo kudab.

¹² Ké dé kera dang noigé do osi, ké yé wa: Gagera go ké ba deddi na, Ddi bbal ca ’yo dono, Dang lainyong bua, dang narua bua, dang osua bua, Dang hormo bua, dang melaué bua, dang debainyé bu’.

¹³ Henga mam ga Kumu ba debegé a dang ni bua, dang duro delinya bua, dang to gesong bua, dang cin kurai go gumu bu’, ’enung jé, ké mam wa dogé kera, ké yé wa: Ddi go jomé ca pogu kang Gagera lé na, Ké bbal ca ’yo debainyé, dang hormo, dang melaué, Dang dono waindo waindo bera kuddum.

¹⁴ Henga poddin gang cindegé lé jogu yé wa: Amin. Ga gemdong lé poi gomdigé dugo, ké melaui.