Gelé dong 22 - Kebu go dore go herua 1978

¹ Kangito gelung kurai go kang gang cindegé ga ddéreré piyong main kristal kain, ga wa geré a to pogu go Kumu kang Gagera kogé.

² Ddi geré duro giyong go a duro gulong go gumu lé. Kurai lé kobi goni goni kau, sia goang cindi wo kené go wo cai moac ca sua ddegélé dang dderelé, ddi wa kederé dang kederé, habelei na ca bo kalang cindegé kaindigé kaindigé labia.

³ Ka wa bbesé go Kumu koi a duro gulong go gumu lé ’eno bering. Pogu go Kumu koi dang Gadera koi da jom kené. Ga gié ga Kumu kai da melaui.

⁴ Ka sol cindi bua, ka pasu gusondi tumoigé bu’.

⁵ Soindo wo ’eno a kené bua, ké go daré arinwa do tua toa kené ’eno bua, kau do teba tua ’eno bu’, cawa Bagulong Kumu banga go ’enua arinwa doi caigé, ka ddi termala waindo waindo bera kuddum.

Jogang go Jésu koi

⁶ Kardené kangito yeng wa: Kual lé na kual go cindi bua, dang go geddang bu’. Bagulong Kumu go ba bigé ga cogelé kebu goi habé gai, ddi gigu kangito goi ca kondia gelgé ga gié gai henga ga ddain da ’erga.

⁷ Jésu yé wa: Sela, ’enunga jiga kala, kema go magé kual go duro cidab lé do wa gelé henga ga da ’erga na, gusi da moui.

⁸ ’Enung Jâ ’enung jé bua, ’enung sol henga lang cindung bu’. Kiddin ga ’enung ba jé bua, ’enung ba sol henga lang cindung bu’ na, ’enung aserong tumu kangito go gelang henga lé ca ’enung melauoi.

⁹ Ama ddi yeng wa: La angal, ddo ji lo kain ’eno, cawa ’enunga go gié main nain kain bua, main karmein ga cogelé kebu go Kumu koi kain bua, main kalang mam ga magé kual go duro cidab lé kua kain bu’. Ji melaua Kumu mera.

¹⁰ Kardené ddi yeng wa: Ddo ji wosé kual go mendem go duro cidab lé kua go wa orang lé ’eno, cawa kiddin ga henga lé da lé na, jia ’yoab.

¹¹ Kema go wa lo isinwa na, ddai ddi la isinwa doi ’era tumu tumu bua, kema go ddisin na, ddai ddi la ddisin doi ’era tumu tumu bua, kema go geddang na, ddai ddi la geddang doi ’era tumu tumu bua, kema go arin carara na, ddai ddi ’era tumu tumu duro arinwa doi bu’.

¹² Jésu yé wa: Sela, ’enung wa jogang kala. ’Enung wa orang dang boié guang a kuabang, kema goni goni kau, da wai boié goi bbal ca gié goi go ddi ba lei.

¹³ ’Enunga Alpa dang Omega, go tumu dang go karu, to do so dang to ca do karé.

¹⁴ Kalang ga ba pel badigé gagé bua, ké waié dono do do sia goang cindi wo goi bua, ké wai dono do andong kebu gulong go gumu bu’ na, kanga gusu mowa.

¹⁵ Ama kalang ga ddisin bua, dang kalang ga lo kema go béli go kagelokemo bua, dang kalang ga lo béli bua, dang kalang ga deddé temai bua, dang kalang ga melaué koliyong bua, dang kalang ga yo kual go poi bua, dang kalang ga lo gié go poi bu ’na, ké wa kara gulong go gumu dong.

¹⁶ ’Enung Jésu, ’enung gi kangito guang ca kandia durageng kual lé kua duro yaué go Kumu koi mam. ’Enunga to moin go Dabid koi, ’enunga bajar go keddebor go arinwa kiddin.

¹⁷ Habé ga Kumu kai kang tamburwa yé wa: Ji ’erang. Dda kema goni goni goa jé kual lé kua na. Ddai ddi ya wa: Ji ’erang. Kema goni goni go kemasua lei na, ddai ddi ’erang. Kema goni goni goa dar kang gang cindegé na, ddai ddi ’yagé basé kelé.

Kual toi do karé

¹⁸ ’Enung Jâ, ’enung gejegeng mam, kema goni goni go nia bé kual go cogelé go duro cidab lé kua ca henga ga da ’erga na, Kumu da kaidé kual cai dang homé go ’enung ba pasi a duro cidab lé kua bu’.

¹⁹ Kema goni goni go nia dor kual go cogelé go duro cidab lé kua cong ca henga ga da ’erga na, Kumu da nyim sia goi goang cindi wo goi cong bua, dang henga gai ga a duro gulong go gumu go arin carara ga ’enung ba pasegé a duro cidab lé kua cong bu’.

²⁰ Ddi go ba ’yé hendé doi ca henga lé kua mam na, ddi yé waldong wang: ’I, ’enung wa jogang kala. Amin Bagulong Jésu, ji ’erang main kain lé.

²¹ Dda wai do Bagulong Jésu Krist toi jimang nageng mam.