Gelé dong 21 - Kebu go dore go herua 1978

Dang do herua, dang delinya do herua

¹ Kardené ’enung sol dang do herua, dang delinya do herua. Dang do tumu, dang delinya do tumu wo ’eno, kurai go gumu go ddoaga wo ’eno bu’.

² ’Enung sol gulong go gumu go arin carara, na Jorsalem do herua do ba saga a dang gesingu dugo, to saga a gusu Kumu, to nyan gusu main tamburwa ba nyanang guso ca oré to kudera kain.

³ ’Enung jé nô do osi yaga pong a ca pogu lé, to yé wa: Cakcak kua kiddin ga jomé ga Kumu kai wo duro kalang, ddia jomang nagé, ka ji kalang gai. Kumu bang da jom dang nagé bua, ddia ji Kumu gogé bu’.

⁴ Ddia handé tubu do cindegé, maré wo ’eno bua, koinyé go nyagé dang ’elé wo ’eno bua, homé wo ’eno bua, henga ga ddegeli ga tumu ’eno.

⁵ Kardené ddi go jom ca pogu lé yé waldong wang, ddi yé wa: Cakcak kua na, ’enung lé henga mam herua, kardené ddi yeng wa: Ji pasa kual lé kua, cawa kual guang na kual go cindi dang kual go geddang bu’.

⁶ Ddi jogu yé com: ’Enung lei ka’. ’Enunga Alpa dang Omega, to do so dang ca do karé. Kema goni goni go kemasu lei na, ’enunga bi tî do kang ga bogé kalang jomé goang cindegé bera kuddum, ca ddi sa kalin basé kelé.

⁷ Kema goni goni goa ddi na, ddia ’yé kalin lé a kuabang, ’enunga ji Kumu goi bua, ddia ji kurandang bu’.

⁸ Ama kalang ga meré kalang bua, dang kalang ga geddang ’eno bua, dang kalang ga ddisin bua, dang kalang ga deddé temai bua, dang kalang ga béli bua, dang kalang ga lo kema go béli go kagelokemo bua, dang kalang ga yo kual go poi bu’ na, kiddin gagé ga jomé wa cin tagu do tua do ’elua do kurjo, kua na maré go ca sua.

Jorsalem do herua

⁹ Kangito pena go a duro kangiyong ga jurgum, gang ’uria jurgum gang homé go gumu go jurgum go to do karé a kobegé na, ddi ’erga gusung, ddi yeng wa: Jia ’erang, ’enunga gelin tamburwa go Gagera tamdi.

¹⁰ Habé ga Kumu kai wonung, kangito aiyung ’yang nang ca kubung go gumu go suguddong. Ddi gelung gulong go gumu go arin carara. Jorsalem do ba saga a dang gesingu dugo, to saga a gusu Kumu.

¹¹ Hormo do Kumu toi wo ca gulong go gumu lé, ddi piyong biddid biddid main gerai go kelei combu kain bua, bolin main gerai go ké ba tei Jaspé kain bua, ’yé yel yel main Kristal kain bu’.

¹² Ddianga geru go gumu go suguddong, kibi moac ca sua, kangiyong moac ca sua ’eré kebegé ca magegé. Geru kebi go moac ca sua lé na, ké pasu gusong go to moin go Israél kogé go moac ca sua kené.

¹³ Kebu wo kené subu a kuaba goni goni, subu a kuaba go toiné bua, subu a kuaba go milin barua bua, subu a kuaba go goiyong bua, subu a kuaba go cainé bu’.

¹⁴ Geru go gulong go gumu lé koi toi wa ca keddang moac ca sua, ké pasu gusong go ga gié go moac ca sua ga Gagera kai ca keddang lé.

¹⁵ Kangito go yoang kual lé danga cilang go luguinya kobi ca gesé gulong go gumu lé toi, dang kibi bua, dang geru goi bu’.

¹⁶ Ké gaddu gulong go gumu langa cembelai poddin. Suguddong goi dang walwa goi na pena rés. Kangito lé gesu gulong go gumu lé danga cilang goi lé. Gulong lé suguddong goi, dang walwa goi, dang sugudduang goi go dang bbal oré goang guaddang wolé to poddin ca poddin.

¹⁷ Kangito lé gesu geru lé bu’, ddi gesu sugudduang goi go dang, dang cilang goi lé bbal aru do tela to subu ca jis.

¹⁸ Ké gaddu geru langa gerai go bolin go ké ba tei jaspé, gulong bang gusi ké gaddianga luguinya do arin carara main kang ga ddéreré kain.

¹⁹ Geru go gulong go gumu lé koi na, ké si gerai go kelei combu goni goni mam ca keddang go to geru lé, keddang go toiné go tumu na, ké tei jaspé, go sua ké tei sapir, go subu ké tei agaté, go poddin ké tei emerod.

²⁰ Go bai ké tei oni, go jis ké tei sardoin, go jurgum ké tei kerisolit, go margum ké tei bérél, go tigesu ké tei topas, go moac ké tei kerisperas, go moac ca pena ké tei turkois, go moac ca sua ké tei amétié.

²¹ Geru kebi go moac ca sua lé na, na moin do béré. Giyong go duro gulong lé na luguinya do arin carara main kang ga ddéreré kain.

²² ’Enung sela kulu go yaué a duro gulong go gumu lé ’eno, cawa Bagulong Kumu go dono mam dang Gagera, ka kulu gogé go yaué.

²³ Gulong go gumu lé dara teba kang kederé ca kandia arinyai ’eno, cawa hormo do Kumu toia arinyei, do Gagera toi na tua doi bu’.

²⁴ Kalang ga delinya cindegé kaindigé kaindigé mam da ’yé duro arinwa doi, kermeleng ga delinya mam da ’yang dang lainyong gogé kené bu’.

²⁵ Geru kibi go moac ca sua lé danga hangong waindo waindo, ké go libegé ’eno bering, cawa soindo wo ’eno.

²⁶ Ka ’yang lainyong dang hormo do kalang cindegé kaindigé kaindigé togé kené.

²⁷ Ama henga ga ddisin pena go andong duro gulong go gumu lé ’eno, kau kema goni goni go lo henga ga ddisin, kau go yo kual go poi. Na kalang ga ké ba pasu gusondigé duro cidab doang cindo do Gagera toia go andong duroi ké mera.