Gelé dong 2 - Kebu go dore go herua 1978

Kual go ’yobé ca yaué go Kumu koi ga a Epés

¹ Ji pasa kual lé gusu kangito go magé yaué go Kumu koi go a Epés, Sela, kua na ddi goang desiddiyong jurgum a kobi go barua lé kual goi go yo waldong wang, ddi go wa oré a duro tua do luguinya do jurgum lé.

² ’Enung sol henga mam ga ji ba légé. ’Enung sol gié goin go homé go ji wa loi, dang ’yomé go ddainya. ’Enung sol ca ji dda kalang ga isindong ’eno. Ji gesau kalang ga wa togé gusugé, na ka pajerong ga gié, ama ji waigé ka kalang ga poi.

³ Ji ’yom ddaindin, ji gel cin cang bua, ji terinyang mengain ’eno bu’.

⁴ ’Enung dang kual pena cain, na ca ji ba ddé kederé ’yo gain ga tumu cong.

⁵ Ji ’eremang aserong goin bua, ji bega kibin ca isinwa doin bua, ji la gié go ddari main koin go tumu kain bu’. Ji nia bega kibin ca isinwa doin lé ’eno na, ’enung da ’erga ai tua doin a duro kiddin ga lé cong.

⁶ Ama henga ga ddari ga ji wa logé na, ji kain gié go ga Nikola kogé cong, main ’enung ba kaingang kain bu’.

⁷ Kema goang gesemei na, ddai ddi ja kual go Habé ga Kumu kai wa yogé yaué go Kumu koi. Kalang ga ddi na, ’enung da bigé sia goang cindi wo goi go a duro yagé go Kumu koi ca kondia dai.

Kual go ’yobé ca yaué go Kumu koi go a Samir

⁸ Ji pasa kual lé gusu kangito go magé yaué go Kumu koi go a Samir. Sela, kua na ddi go tumu dang go karu kual goi go yo waldong wang bua, na ddi go ba ma go ba belang cindi a duro ga maré bu’.

⁹ ’Enung sol gelé goin go cin bua, ’enung sol nyagé doin do ji wa loa bu’, ama ’enung solin mainya kema go lainyong kain. ’Enung sol kual go isini go kalang wa yoi cain, ké ga wa togé gusugé na ka ga Juib, ama ka ga Juib ’eno, ka yaué go Sidan kai.

¹⁰ Gelé go cin go da waiin na, ji lo muro cai ’eno, sela, Sidan da bé kalang ga pena a duroigeng duro gerngang ca gesauegeng. Keng da gel cin wolé moac. Ji nia jom geddang bera ji ma na, ’enunga bin gendu go jomang cindin.

¹¹ Kema goang gesemei na, ddai ddi ja kual go Habé ga Kumu kai wa yogé yaué go Kumu koi. Kalang ga ddi na, maré go sua go deddegé ’eno.

Kual go ’yobé ca yaué go Kumu koi a Pergam

¹² Ji pasa kual lé gusu kangito go magé yaué go Kumu koi go a Pergam. Sela, kua na ddi goang gesengar do kégé sua kual goi go yo waldong wang.

¹³ ’Enung sol kiddin gain ga jomé, na kiddin ga pogu go Sidan koi wo kené. Ji si ddaindin cang ddar bua, ji dda bo cindi cang cong ’eno bu’. A duro saman do Antipas go ba yé hendé do geddang cang kau, ji lé main kain, na ddi go ké ba deddi a duroigeng a kiddin ga Sidan ba jom kené.

¹⁴ Ama ’enung danga kual pena cain, jianga kalang ga kobé gelé go Balam koi. Balam gel Balak ca kondia asera ga Israél duro isinwa do ca kandia da kunyung ga ké ba tibé kula dang nagé, ddi lamegé ca kandia la béli bu’.

¹⁵ Jianga kalang ga kobé gelé go Nikola kogé main kain bu’.

¹⁶ Ji bega kibin ca isinwa doin, nia kain ’eno na, ’enung da ’erga gusin kala, ’enunga worin kembel dang kalang lé dang gesengar do da andong a kebung.

¹⁷ Kema goang gesemei na, ddai ddi ja kual go Habé ga Kumu kai wa yogé yaué go Kumu koi. Kalang ga ddi na, ’enunga bigé wo go ké ba wosi go ké tei man. ’Enunga bi gerai go béré go ké ba pasu gusong go herua gusi, kema go ddang go solé gusong lé na, wo ’eno, na ddi go da wai gerai la go solé gusong lé mera.

Kual go ’yobé ca yaué go Kumu koi go a Tiatir

¹⁸ Ji pasa kual lé gusu kangito go magé yaué go Kumu koi go a Tiatir, Sela, kua na Kumu Kurondi go cindi ba ’yé main tua do belélem kain, kual goi go yo waldong wang, na ddi go gondi piyong main julong do germé do ké ba yuda ’yilé cadada.

¹⁹ ’Enung sol henga gain ga lo mam, dang kederé ’yo gain bua, dang geddang goin bua, dang ’yomé go ddaindin bu’. ’Enung sol ca gié goin go cakcak kua na, ddi go tumu.

²⁰ Ama ’enung danga kual go pena cain, cawa ji ddé tama do ké ba ta Jésabél, na tama do ba yé wa: Toa do cogelé kebu go Kumu koi, to wa kaié kang ga gié, dang gelé goa go ca kandia la béli bua, ca kandia da kunyung go tibé koliyong bu’.

²¹ ’Enung dda kiddin sam ca tondia bega kebo ca isinwa doa, ama to dara ca toa bogé kebo ca béli doa ’eno.

²² Na ca ma, ’enunga debo ca gasalong daiang kalang ga lo béliang na, ké nia bega kebegé ’eno na, ’enunga gelgé cindegé nain daiang na.

²³ Kardené com, ’enunga deddu karndo. Yaué go Kumu koi mam da sol ca ’enunga go solé ’eremé go kalang kogé go a duro ddaindigé. ’Enunga bi kema goni goni boié goi bbalé ca gié goi.

²⁴ Ama keng kalang kané ga a duro yaué go Kumu koi go a Tiatir, keng ga wa kobé gelé go isini lé kua ’eno. Kual toi do mendem do kalang kané ba yé wa: Na go Sidan koi na, keng selai ’eno. ’Enung yegeng waldong wang ca ’enung go so ninwa go ddang caigeng ’eno.

²⁵ Ama ga ’ima henga ga a kobegeng osu dang dang bera ’enunga jiga.

²⁶ Kalang ga ba ddi ga wa lo gié guang tumu tumu bera to do karé na, ’enunga bigé dono do ’enung ba waio a kuaba Bang ca kalang ga a duro delinya mam.

²⁷ Ka ddi caigé dang cilang go helma, ka dosiegé main baserong ga gunyung kain.

²⁸ ’Enunga bigé bajar go keddebor bu’.

²⁹ Kema goang gesemei na, ddai ddi jé kual go Habé ga Kumu kai wa yogé yaué go Kumu koi.