Gelé dong 19 - Kebu go dore go herua 1978

¹ Kardené ’enung jé nô do osu main kalang ga yaué combu noigé kain a dang ni, to yé wa: Ga debainya Kumu cawa minyé, dang hormo, dang dono na, na ga Kumu guana kai.

² Kual goi go kaidé na cindiang geddang bu’, cawa ddi kaidé kual ca tama do podelo do tungu do toinyé delinya dang béli doa. Ddi kaidé kual ca to deddu ga gié ga Kumu kai.

³ Ké jogu yé ddang com: Ga debainya Kumu, gesa go tua kua go wa ’ulé gulong go gumu lé wa oré dang waindo waindo.

⁴ Kalang ga gemdong ga to sua ca poddin bua, dang henga poddin gang cindegé bu’, ké poi gomdigé dugo, ké melauwu Kumu go jomé ca pogu, ké yé wa: Amin, ga debainya Kumu.

Do go soré go ’yo go Gagera koi

⁵ Kardené ké jé nô do pena yé a ca pogu lé, to yé wa: Keng kalang gai ga gié mam, dang keng ga meré Kumu, dang gemdong dang karang ga debainya Kumu guana.

⁶ Kardené enung jé nô main kalang ga yaué combu noigé bua, main kang ga doiyé do tungu noa kain bua, main yo go alidé go osi koi kain bu’, to yé wa: Ga debainya Kumu cawa Bagulong Kumu guana go dono mam ddia kelma.

⁷ Dda gusuna muana dang kederé baria, ga bi hormo cawa kiddin ga ’yo go Gagera koi caga, tamburwa doi nyan guso.

⁸ Ké bo dono do ca to si badigé ga lemaddu guso ga arin carara go poiyang biddid biddid. (Badigé ga lemaddu lé na, gelna gié go geddang go kalang ga Kumu kai kogé.)

⁹ Kardené kangito lé yeng wa: Ji pasa, kalang ga ké ba tégé ca kandia ’era ca do go soré go ’yo go Gagera koi na, kanga gusu mowa, ddi jogu yé ddang com: Kual lé kua, na kual go cindi go Kumu koi.

¹⁰ ’Enung aserong tumoi dugo ca melauoi, ama ddi yeng wa: La angal, ddo ji lo kain ’eno, cawa ’enunga go gié main nain kain bua, main karmein ga ’yo hendé do cindi do Jésu toi kain bu’, ji melaua Kumu mera. Kual go cindi go Jésu koi go ba geli donga bogé kalang dono do cogelé kebu go Kumu koi.

Go jomé ca henda go béré

¹¹ Kardené ’enung sol dang hangong, ’enung sol henda go béré, ddi go jomé ca henda na, ké teia Geddang dang Go Cindi, ddi kaidé kuala go geddang bua, ddi worin kembel danga geddang bu’.

¹² Cindi mainya tua do belelem kain, ddiang gundu combu cai, ddiang gusong go pena pasé gusi go kema pena bbal ca solei ’eno, na ddi bang mera.

¹³ Ddi si badigé ga gumu ga ké ba sigé cin kebar gusi, ké tei gusondia Kual go Kumu koi.

¹⁴ Asengeriyong ga dang ni ga koboi na, ké jom ca hondong ga berong, ké si badigé ga lemaddu ga berong teréc gusugé.

¹⁵ Gesengar do ’yo nain andong a kebi, ddia worin kembel dang kalang cindegé kaindigé kaindigé dang na, ddi di termala caigé dang cilang go helma, ddia siddé sur duro goddé go Kumu go dono mam mainyé doi kua.

¹⁶ Ké pasu gusondi gusu badigé gai dang gondi bu’, ké pasu wa: Kelma go kermeleng kogé dang Bagulong go kagulong kagé.

¹⁷ Kardené ’enung sol kangito dang ’eré duro teba, ddi soi nô do osu pong, ddi yégé ceddong ga wa saié dang mam wa: Ga ’eragengang, keng yau ca do go soré go gumu go Kumu koi.

¹⁸ Ga ’eragengang, keng di kunyung go kermeleng kogé bua, dang go asengeriyong ga gemdong kogé bua, dang go asengeriyong kogé bua, dang kunyung go hondong kogé bua, dang kalang ga nô caigé bua, dang kunyung go kalang kogé mam bua, goiyong dang kalang ga talagai bua, kalang ga gemdong dang karang bu’.

¹⁹ Kardené ’enung sol gijang dang kermeleng ga delinya, dang asengeriyong gagé, dang yaué ca worinyé kembel ca ddi go jomé ca henda kang asengeriyong gai.

²⁰ Ké ’yom gijang lé kang go cogelé kebu go poi go lo gié go kagelokemo tumoi. (Ca gié go lo go kagelokemo na, ddi babu ké ga ba ’yé genjer go gijang lé koi, dang ké ga melaué kula go ké ba nyirei gené main nai kain.) Gijang dang go cogelé kebu go poi na, ké bégé dang cindegé cin tagu do tua do kurjo do ’elua nain.

²¹ Ké deddu kané dang gesengar go ba andegeng a kebu ddi go jomé ca henda lé, ceddong aidong dang kunyondigé.