Gelé dong 18 - Kebu go dore go herua 1978

Toinyang go Babilon koa

¹ Kardené ’enung sol kangito go ddang saga a dang gesingu dugo, ddiang dono nain, hormo doi arinyé delinya mam.

² Ddi soi noi osu pong, ddi yé wa: To aserong, Babilon do tungu aserong, cakcak kua to jia habé ga ddisin dang habé ga isini kiddin gagé ga jomé bua, dang cidong ga isini cindegé kaindigé kaindigé ga kalang ba kaingé cong kagé bu’.

³ Cawa to bigé kalang cindegé kaindigé kaindigé sur doa do béli do isini kangndo, ké si, Kermeleng ga duro delinya lé béli dang na bua, kalang ga cénegé ga duro delinya belé lainyong combu, dang lainyong goa ga combi bu’.

⁴ Kardené ’enung jé nô do ddang yaga a dang, to yé wa: Kalang gang, ga andagengang a dura cong, ca ddo keng kobé isinwa doa ’eno bua, ca ddo homé go gumu go wa orang ca, ddi logeng ’eno bu’.

⁵ Cawa isinwa doa malgu bera toi dang, Kumu guiaba isinwa doa ’eno.

⁶ Ga lang na main to ba logengang kain, ga jiga bia henga ga ga to ba légé cainé kené sua. Ddarin doa do mainyé do to ba nyangeng dang na na, ga wuna dang na, dang mainyé cainé kené ddang com.

⁷ Hormo dang lainyong ga to ba sigé ca guso na, ga bo gelé go cin, dang kederé homé main kain rés, cawa to yé guso wa: ’Enung jom kua mainya termali kain, ’enunga wambu ’eno, ’enung go koinyé nyagé ’eno bering.

⁸ Na ca ma, homé go gumu da waio wolé pena mera, hoamya dang koinyé go nyagé dang bagdara, ka ’uloang tua bu’, cawa Bagulong Kumu go dono da kaidé kual ca.

⁹ Kermeleng ga a duro delinya ga lo béli dang na bua, ga jomé duro lainyong goa bu’ na, kiddin ga ka sol gulong go gumu lé gesa goi go tua wa ulei na, ka ’elang tubu do cindegé.

¹⁰ Ca muro do gelé goa go cin kua na, ka ’eré suguddong hasang na, ka yé wa: Bagen, bagen dué. Ai Babilon, gulong go gumu go dono, duro kiddin pena mera kual go kaidé caga cé.

¹¹ Kalang ga cénegé ga a duro delinya da ’elang tubu do cindegé bu’, cawa kalang go kelé henga gagé ’eno.

¹² Ké go kelé luguinya dang doarna, dang gerai go kelé nain, dang moin do béré ’eno bua, ké go kelé badigé ga lemaddu, dang taga do curlin curlin, dang ga yilé cuin, dang badigé ga yigar ’eno bua, ké go kelé kaiyong ga ddo tuna, dang henga ga ké ba nyangang juno kegei, dang aiyong ga kelaigé nain, dang julong do germé, dang helma, dang keddang ’eno bu’.

¹³ Ké go kelé kumbo, dang cida, dang henga ga dowa tuna, dang suang goang kajaju, dang sur kangndo, dang suang ’eno bua, ké go kelé keberang go kiji, dang sinyong, dang gamgé, dang hondong, dang gujerong, dang guiong, dang kalang keudigé ’eno bu’.

¹⁴ Kalang ga cénegé yei gulong go gumu lé wa: Henga gain ga ddari ga ji ba lé tabelang caigé na, ké posindé, ké wo ’eno a gusin. Henga gain ga ddari dang ga lainyong kaiyong, ji go waiegé ddang com ’eno bering.

¹⁵ Kalang ga lo cénegé a duro gulong go gumu lé ga ba belé lainyong dang henga gai na, ka ’eré waldong has ca muro do gelé goi go cin, ka ’elang tubu do cindegé.

¹⁶ Ka yé wa: Gulong go gumu lé bagen doi. Ddi go so badigé ga lemaddu ga taga do curlin curlin, dang ga yilé cuin gusi bua, ddi go nyané badigang luguinya bua, dang gerai go kelé combu bua, dang moin do béré bu’

¹⁷ Duro kiddin pena mera lainyong goa go combi lé tunyong. Kuburo go gemdong kagulondigé mam bua, dang kalang ga oré terga duro kuburo bua, dang kalang ga polé kuburo bua, dang kalang ga lo gié cin kurai go gumu go ddoaga bu’, ’eré waldong has.

¹⁸ Kiddin ga ka sol gesa na, ka soi ’elé, ka yé wa: Gulong go gumu go main nai kain wo ’eno bering.

¹⁹ Ka té tiri bé caigé, ké soi ’elang tubu do cindegé, ka yé wa: Gulong go gumu lé, bagen doi. Ké gang kuburo go gumu a duro kurai go gumu go ddoaga lé na, ké belé lainyong danga nai, ama a duro kiddin pena mera na, lainyong goi go combi lé tunyong mam.

²⁰ Ai dang, dda gusé mué ca toanyang goi. Kalang ga Kumu kai, dang ga gié, dang kalang ga cogelé kebu go Kumu koi, dda gusugeng muageng bu, cawa Kumu kaidé kual cai ca isinwa doi do ddi ba la.

²¹ Kardené kangito go dono ai keddang go gumu go hiddé, ddi debegi cin kurai go gumu go ddoaga, ddi yé wa: Ka tosu gulong go gumu go Babilon dugo dang dono main kain bu’, ké go solei ddang ’eno bering.

²² Ké go jo jangu noa, kau kera dogé goi, kau belelem dang tura lomé gogé duroin ddang com ’eno bering. Ké go waié kema go gié goni goni a duroin ddang ’eno bua, ké go jo nô do hiddé go kiji koi a duroin ddang ’eno bering bu’.

²³ Arinwa do tua toa, go arinwa a duroin ddang ’eno bua, ké go jo nô do ’yo gusu barua kang tama a duroin ddang ’eno bu’. Kalang gain ga cénegé na, ka gemdong ddi kané ga ddang a duro delinya mam, ji babu kalang mam dang kema goin go lo go kagelokemo.

²⁴ Kumu kaidé kual ca Babilon cawa a duro gulong go gumu lé na, ddi wai kebar go kalang ga cogelé kebu goi kogé bua, dang kebar go kalang gai kogé bua, dang kebar go kalang kogé mam ga ké ba deddegé a duro delinya bu’.