Gelé dong 17 - Kebu go dore go herua 1978

Tama do podelo do tungu

¹ Kardené kangito pena a duro ga jurgum gang ’uria jurgum kobegé na, ddi ’erga yeng wa: Ji ’erang, ’enung gelein kual go kaidé go da ’erga ca tama do podelo do tungu lé, tama lé na gulong go gumu go ké ba gaddi kebu gung go kurai go combi koi.

² Kermeleng ga delinya, ka lé béli dang tama do podelo do tungu lé, kalang ga a duro delinya koiang sur doa kangndo do béli doa lé toa.

³ Habé ga Kumu kai wonung, kardené kangito aiyung ’yang nang duro gada, ’enung sol tama do pena dang jomé ca gijang go yilé go ba huiyogu gusi dang gusong go isini go nyangdié Kumu. Gijang lé danga cai jurgum dang kebong moac.

⁴ Tama langa badigé ga taga do curlin curlin guso bua, dang ga yilé cuin bu’, to nyan badigé langa luguinya bua, dang gerai go kelei combu bua, dang moin do béré bu’. Toang ddarin do luguinya a kuaba wonang henga ga ddisin ga béli doa toa.

⁵ Ké pasu gusong go mendem a tuma. Na Babilon do tungu, na kandu ga podelo dang henga ga ddisin ga a duro delinya ’yoigé.

⁶ ’Enung sol tama lé koiang kebar go kalang ga Kumu kai kogé, dang kebar go kalang ga geddang ga ké ba deddegé ca Jésu. Kiddin ga ’enung ba sol tama lé na, ’enung sol kagelokemo bbani ’eno.

⁷ Kardené kangito lé yeng wa: Cawa ma ji sol kagelokemo ga? ’Enunga poderein mendem do tama lé kua dang gijang go to ba jom cai lé koi, na gijang goang cai jurgum dang kebong moac lé.

⁸ Gijang go ji ba soli lé na, na ddi goang cindi tumu din, ama cakcak kua ddi wo ’eno, ama ddi andegang a duro ’umbung go ddigé kuddung go toi basé karé, ddi andegang ca basong cong. Kalang ga ké basé pasé gusondigé duro cidab doang cindo dang tumu din basé ké debé delinya dé na, ké sol kagelokemo kiddin ga ké ba sol gijang lé cawa tumu na, ddiang cindi, ama kardené ddi wo ’eno, ama cakcak kua ddi caga.

⁹ Ca solé kual lé toi na, dara solé dang narua. Ca do jurgum lé na, na kubung jurgum go tama lé ba jom wo cai, na kermenleng jurgum bu’.

¹⁰ Ga bai a duroigé aserong, go pena wo kené, ama go ddang ’erang ’eno dé, ama kiddin ga ddia caga na, ddi go jomé sugudduang ’eno.

¹¹ Gijang goang cindi tumu din lé na, ddi wo ’eno, ddi banga kelma go margem, na ddi go pena a duro ga jurgum lé go oré ca basong.

¹² Kubung ga moac go ji ba solgé na, na kermeleng moac ama ké da termala eno dé, ama ké wai dono do ddo ca ddiang gijang kiddin pena.

¹³ Ga moac lé danga ’eremé pena, ké jogu bi gijang lé dono dogé dang ddo dogé bu’.

¹⁴ Ka worin kembel dang Gagera, ama Gagera da ddigé cawa ddia Bagulong go kagulong kogé, dang kelma go kermeleng kogé, ddi ddigé kang kalang gai ga geddang ga ddi ba tégé bua, ga ddi ba pargé bu’.

¹⁵ Kangito lé yeng ddang com, ddi yeng wa: Kang ga ji ba solegé ga tama do podelo lé ba jom caigé na, na kalang bua, dang kalang ga yaué combu bua, dang kalang cindegé kaindigé kaindigé bua, dang kalang ga yo kebu cindi kaindi kaindi bu’.

¹⁶ Kebong ga moac ga ji ba solegé kang gijang lé kua na, na kain tama do podelo lé cong, ka nyim henga ga mam, to da ji gandela, ka di guso, ka ’uloang tua jiddag bu’.

¹⁷ Cawa Kumu si ’eremé goi duro ddaindigé ca kandia ser to kual goi, ké jé gusugé kebegé pena ca ka boi gijang dono dogé do do termala bera kual go Kumu koi ser toiné.

¹⁸ Tama do ji ba sola lé kua na, na gulong go gumu go ddo ca kermeleng ga a duro delinya.