Gelé dong 16 - Kebu go dore go herua 1978

’Uriyong gang mainya do Kumu toi

¹ Kardené ’enung jé nô do osi yaga a duro kulu go yaué go Kumu koi, to yégé kangiyong ga jurgum lé wa: ’Erageng bega uria ga jurgum gang mainya do Kumu toi lé duro delinya.

² Kangito go tumu ’yé bé mainya do Kumu toi do duro uria goi duro delinya, kardené ’yanyong ga banjil ga isini ga gelé kalang cindegé, andiyong gusu kalang gang genjer go gijang lé koi, ga melaué kula go ké ba nyirei gené main nai kain,

³ Kangito go sua bé mainya do Kumu toi do duro ’uria goi cin kurai go gumu go ddoaga. Kang belé main kebar go kema go maré koi kain, henga mam gang cindegé ga a cin kurai go gumu go ddoaga lé ma.

⁴ Kangito go subu bé mainya do Kumu toi, do duro ’uria goi cin kurai go gumu dang tî do kang togé mam, ké belé kebar.

⁵ Kardené ’enung jé kangito goang dono ca kang yé wa: Ji go geddang duro kual go kaidé lé, ai, ji go arin carara bua, ji go tumu din dang cakcak kua bu’.

⁶ Ké bé kebar go kalang ga Kumu kai dang ga cogelé kebu goi kogé dugo, cakcak kua ji begé kebar lé, ké sa, na boié gogé.

⁷ Kardené ’enung jé nô yaga a ca dandang do tibé, to yé wa: ’I Bagulong Kumu go dono mam, kual goin go kaidé na cindi dang geddang.

⁸ Kangito go poddin bé mainya do Kumu toi do duro ’uria goi ca teba. Ké bo teba dono do sodelé kalang dang ’elua goa.

⁹ To sodelé kalang dang ’elua goa go nain go kagelokemo, ké yé kual go isini go nyangdié Kumu gusondi cawa na ddi goang dono ca homé go gumu lé, ama ké bega kebegé ca isinwa dogé ’eno bua, ké bi Kumu hormo ’eno bu’.

¹⁰ Kangito go bai bé mainya do Kumu toi do duro ’uria goi ca pogu go gijang lé koi, kardené leu do gijang lé toi belé delem, kalang yidié kelandigé ca gelé go cin lé.

¹¹ Ké yé kual go isini go nyangdié Kumu go dang ni, ca gelé gogé go cin dang ’yanyong gagé ga bangil, ama ké bega kebegé ca gié gogé go isini ’eno.

¹² Kangito go jis bé mainya do Kumu toi do duro ’uria goi, ca kurai go gumu go ké ba tei Epraté, kurai go gumu lé hai ca dda kermelong ga toiné giyong ca kandia ’erang.

¹³ Kardené ’enung sol habé ga isini gené main gerna kain andegang a kebu kumbulo go gumu bua, a kebu gijang bua, a kebu go cogelé kebu go poi bu’.

¹⁴ Na habé ga isini go lo gié go kagelokemo. Habé ga isini ga subu lé ’yé gusu kermeleng ga delinya mam, ca yauegé ca worinyé kembel duro wolé go gumu go Kumu go dono mam koi.

¹⁵ Sela, ’enung wa orang main koié kain. Kema go jomé ’yoal ’yoal go magé badigé gai ddar na, ddianga gusu mowa, ddi go oré gandela toi kalin dang dasi tumu kalang ’eno.

¹⁶ Kardené habé ga isini lé yau kermelong a kiddin ga ké tegang kebu go Hébero Armagédon.

¹⁷ Kangito go jurgum bé mainya do Kumu toi do duro ’uria duro kal. Nô do osi yaga a ca pogu go a duro kulu go yaué go Kumu koi, to yé wa: Henga lé ka ’enda.

¹⁸ Kardené wulainyé wulain bua, nô yé kual bua, alé yé bua, gesong gigié bu’. Gesong gigiu main kain ca pena dang kiddin ga ké ba debu kema din ’eno dé, gigié go ba lé ddi mam.

¹⁹ Gulong go gumu gosindé dugo subu. Gulong go gemdong a duro delinya mam dusiyong. Kumu ’eremang Babilon do tungu, ddi bo sur kangndo duro ddarin do mainyé doi toa ca tondia sa.

²⁰ Kema go wo duro kurai na, wo ’eno bua, kema sela kubung go gemdong ’eno bu’.

²¹ Gerai go gemdong bega a dang ca kalang, ninwa gogé bbal main golin go gumu kain. Kalang yé kual go isin ca Kumu ca homé go gumu go gerai go gemdong lé toi, cawa homé go gumu go gerai go gemdong lé toi na isin bbani ’eno.