Gelé dong 13 - Kebu go dore go herua 1978

Gajong ga sua

¹ Kardené ’enung sol gijang pena naga a cin kurai go gumu go ddoaga, ddiang kebong moac bua, cai jurgum bu’. Kebong ga jurgum lé danga gundu caigé mam. Ké pasu gusong go melaué gad gad ca Kumu a caigé lé mam bu’.

² Gijang go ’enung ba soli lé na, ddi gené mainya cur kain, gondi main gijang kain, kibi main gijang gusugé kain, kumbulo go gumu lé bi dono doi bua, dang pogu goi bua, dang ddo goi go ca bu’.

³ ’Enung sol cai do pena do ké ba da ’ya ca dedda, ama to mainyong. Kalang a duro delinya mam sol kagelokemo, ké kobu gijang lé.

⁴ Kalang mam melauwu kumbulo go gumu lé ca ddi ba bi gijang lé dono doi. Ké melauwu gijang lé bu’, ké yé wa: Na wanga bbalé main gijang lé kain ga? Na wanga bbalé worinyé kembelang nai ga?

⁵ Ké bi gijang lé dono do doré kual go gumu dang kual go melaui gad gad ca Kumu. Ké bi dono do lo gié kederé to poddin ca sua.

⁶ Ddi osum so kual ca Kumu, ddi yé kual go melaui gad gad ca gusondi bua, dang kiddin gai ga jomé bua, dang ké mam ga jomé a dang ni bu’.

⁷ Ké bi dono ca ddi worinya kembel dang kalang ga Kumu kai ca dda caigé. Ké bi dono ca to moin mam bua, ca kalang mam bua, ca kalang ga yo kebu cindi kaindi kaindi mam bua, ca kalang cindegé kaindigé kaindigé mam bu’.

⁸ Kalang mam a duro delinya, ga ké ba pasa gusondigé a duro cidab do cin dang delinya toa do debé din ’eno, da melaui. Kalang mam a duro delinya da melaui, to do poré, na kema goni goni go ké ba pasa gusondi a duro cidab do cin ’eno, basé ké debé delinya dé. Cidab lé na do gagera go ké ba deddi toi.

⁹ Keng nia dang gesemé ga jo na, ga jageng ddara.

¹⁰ Kema goni goni go ké ba gabegai ca gerngang na, cindi ka ’yang nai duro gerngang. Kema goni goni go ké ba gabegai ca kandia deddiang gesengar na, cindi ka deddiang gesengar. Na ca ma, na gad kalang ga Kumu kai da ’ima ddaindigé dang bo gogé go cindi.

¹¹ Kardené ’enung sol gijang go ddang andegang a cin gesong. Ddiang kebong sua main ga gagera kebondi kain, ama ddi yé kual main kual go kumbulo go gumu lé koi kain.

¹² Ddi lé gié danga dono do gijang go tumu lé toi mam. Na ca ma, ddi si kalang mam a duro delinya ca kandia melaua gijang go tumu go ké ba dei ’ya go ba mainyong lé.

¹³ Gijang go sua lé, lé gié go gumu go dono go kagelokemo. Ddi té tua a dang cin kalang mam ca tondia begang duro delinya.

¹⁴ Ddi babu kalang a duro delinya mam ca gié goi go gumu go dono go kagelokemo go ké ba bi, ca kondia la tumu gijang go tumu lé. Ddi yé kalang ga a duro delinya ca kandia nyiru kula gené main gijang go ké ba dei ’ya dang gesengar go ba jomang cindi lé kain.

¹⁵ Ké bi gijang go sua lé dono, ca kondia bi kula go ké ba nyirei gené main gijang go tumu lé kain, habé ga jomang cindi ca kondia ya kual bua, kondia deddu kalang mam ga ba melaui ’eno bu’.

¹⁶ Kalang mam, karang dang gemdong, kalang ga lainyong, dang kalang ga nyagé, dang goiyong, dang kalang ga talagai mam, gijong lé sigé ca kandia ’ya genjer kobegé go barua dang tumoigé.

¹⁷ Kema go basé genjer lé na, ddi go bbalé ca kelé henga ’eno bua, ddi go kelé henga gai cong ’eno bu’. Genjer lé toi do poré na, na gijang lé gusondi dang gusondi ddoginyé goi.

¹⁸ Kual lé dar narua do nain, ddi goang solé na, ddi bbal ca solé ddoginyé go gijang lé koi toi, cawa ddoginyé lé na do kalang gusondigé togé, ddoginyé na aru jis dang to jis ca jis.