Gelé dong 11 - Kebu go dore go herua 1978

Go yo hendé sua

¹ Kardené ké bung nalu main cilang kain, ké yeng wa: Ji sa dang, ji gesu kulu go yaué go Kumu koi dang dandang do tibé bua, ji dduginya kalang ga wa melaué a duro kulu go yaué lé bu’.

² Ama ji dda kulu go yaué kardi go dong kalin, ji gesei ’eno, cawa ké bega kalang ga toigé ddang, ké ddoderé gulong go gumu go arin carara gondigé dugo werec werec kederé to poddin ca sua.

³ ’Enunga gi kalang gang ga yo hendé sua lé, ké si badigé ga heraga gusugé, ké dor kual go Kumu koi wolé dubu dang aru sua dang to jis.

⁴ Kalang ga yo hendé sua lé na, ka haiyong ga taber sua, dang tua sua ga ’eré tumu delinya Bagulonda.

⁵ Kema goni goni nia dar ca gelegé cindegé na, tua andegang a kibegé ca basé kalang gagé ga tebena lé cong. Ka deddu kema goni goni go daré ca gelegé cindega main kain.

⁶ Kanga dono do lebé dang ca ddo kang hongé ’eno a duro wolé go ké wa doré kual go Kumu koi kené mam. Kanga dono do belé kang kebar bua, kiddin ga kederegé na dar na, kanga dono do lo delinya dang homé go gumu goni goni mam bu’.

⁷ Kiddin ga ké ka kual go doré mam na, gijang go ba andegang a duro ’umbung go digé kuddung go toi basé karé da worin kembel dang nagé, ddia ddigé, ddia deddegé.

⁸ Temaidigé da jiang bogé duro giyong, a duro gulong go gumu go ké ba bbobel Bagulondigé ca sia go adegelé kené. Ké té gulong lé gusondi Sodom dang Ejibté, na kual go kera.

⁹ Kalang mam bua, dang to moin mam bua, dang kalang ga yo kebu cindi kaindi kaindi mam bua, dang kalang ga toigé ddang mam bu’, ké sol temaidigé wolé subu dang golo, ka ddegé basé ’embégé.

¹⁰ Kalang ga a duro delinya gusugé da mowegé ca maré go kalang ga sua lé kogé. Ka lé soré, ka giang henga bu gusugé kalin, ca maré go ga cogelé kebu ga sua lé ga ba gel kalang ga a duro delinya cindegé bbani ’eno kogé.

¹¹ Ama kiddin ga wolé subu dang golo lé na bbal na, kardené habé gang cindegé da saga a gusu Kumu andong kederegé, ka sai ’eré dang, kalang ga solegé mam na, ké yor muro.

¹² Kardené ga cogelé kebu ga sau lé da jé nô do osi do ba saga a dang yégé wa: Ga nagengang dang kua, ké nai dang ni duro meddaliyong, kalang gagé ga tebena solgé dang cindegé.

¹³ Kobegepadda gesong gigié nain, gulong lé kobi pena tusong, ddé ji tigesu, gesong gigié lé deddé kalang dubu jurgum. Kalang ga ji na, ké bi Kumu go dang ni hormo.

¹⁴ Bagen do sua hal, ama bagen do subu ji ’yoab ca orang.

Tura do jurgum

¹⁵ Kardené kangito go jurgum lom tura doi, nô combu yaga a dang yé wa: Cakcak kua na, leu do delinya toa bela do Bagulondena toi dang Krist goi, ddia ddi caigé waindo waindo bera kuddum.

¹⁶ Kardené gemdong ga to sua ca poddin ga jomé ca pogerong gagé tumu Kumu aserdong kembié cindegé dugo, ké melau Kumu.

¹⁷ Ké yé wa: Bagulong Kumu go dono mam, ji go wo kené tumu din bua, Ji wo kené cakcak kua bu’, Ni lein désé ca ji ba ’yé dono doin do ddo wal, Ca ji do termala.

¹⁸ Kalang ga toigé ddang belé mainya bua, Ama kiddin caga ca mainyé doin sai dang, Ca kaidé kual ca kalang ga maré bu’. Kiddin caga ca ji bogé kalang gain ga gié ga cogelé kebu goin boié gogé, Dang kalang gain ga merein mam, gemdong dang karang. Kiddin caga ca ji basé kalang ga toinyé delinya cong.

¹⁹ Kardené kulu go yaué go Kumu koi go a dang ni kibi hangong cong, ké sol sandugu do kebu go doré a duro kulu goi go yaué lé. Kardené wulainyé wulain bua, nô yé kual bua, alé yé bua, gesong gigié bua, gerai go gemdong bega dugo bu’.