Gelé dong 1 - Kebu go dore go herua 1978

Kual gelé goi toi

¹ Duro maktub lé kua na, Jâ pasua henga ga Jésu Krist kai ga ddi ba geliang nagé waldong wang. Kumu na boi henga lé ca kondia gelgé kalang gai ga gié ca henga ga wa jo ’yoab ca orang. Krist gigu kangito goi gusu koi go gié Jâ ca kondia geli henga lé.

² Jâ gom yé kual ca henga mam ga ddi ba solgang cindi, ddi ya hendé do ba saga a gusu Kumu dang kual go cindi go Jésu Krist ba geli.

³ Kema go ddoginyé cidab lé kua bua, dang kalang ga jo kual lé bua, dang kalang ga kobé kual go ké ba cogeli pasi dura lé bu’ na, kanga gusu mowa, cawa kiddin ga henga lé ca lo jia ’yoab.

Jâ lé yaué go Kumu koi jurgum waigi

⁴ Na ’enung Jâ, ’enung pasu cidab lé kua ca yaué go Kumu koi go jurgum go a ca gesong ga Asi. Dda Kumu lageng waiang jalua juam, na ddi go wo kené cakcak kua bua, na ddi go kené tumu din bua, na ddi go da ’erga bu’, dang habé ga jurgum ga a tumu pogu goi,

⁵ dang Jésu Krist go yo hendé go geddang bua, ddia Kurong go monjoli go Kumu ba beleiang cindi a duro ga maré tumu jua bua, ddia kelma go kermeleng ga delinya kogé mam bu’. Kederei ’yana, ddi toarana a duro isinwa duana dang kebardi.

⁶ Ddi belena leuiyong ga tibé ga Bai Kumu kai. Hormo dang dono na do Jésu Krist toi bera kuddum, Amin.

⁷ Ddia ’erga duro meddaliyong, kalang mam da soliang cindegé, kalang ga ba jibi kené tumu kau, ka soliang cindegé bu’. Kalang ga a duro delinya mam, ka sol ’elé ca kondi. ’I, na main kain lé, Amin.

⁸ Bagulong Kumu go dono mam yé waldong wang: ’Enunga Alpa dang Omega, to do poré, na to do so bua, dang to do karé bu’. ’Enunga go cakcak kua bua, dang go kené tumu din bua, dang ddi go da ’erga bu’.

Jâ sol Krist

⁹ Na ’enung kermegeng Jâ, mondigeng go daiang nageng duro gelé go cin ca Jésu bua, ca leu doi bua, dang ’yomé go ddainya bu’. Ké debung ca kema go ké ba té Patmos, ca ’enung ba dor kual go Kumu koi dang kual go cindi go Jésu ba geli dong.

¹⁰ A duro wolé go Bagulong koi na, Habé ga Kumu kai wonung, ’enung jé nô do yo kual a kardung osu pong, main tura kain.

¹¹ To yé wa: Henga ga ji wa solegang lé na, pasagé duro cidab, ji gi cidab lé gusu yaué go Kumu koi go jurgum lé kua, Epés, dang Samir, dang Pergam, dang Tiatir, dang Sardé, dang Piladélpi, dang Laudesi.

¹² ’Enung polin mengang ca solé kema go wa yoang kual lé, ama ’enung sola tua do luguinya jurgum.

¹³ ’Enung sol henga a duroigé main kema kain. Ddi si badigé ga suguddong gusi bera bé gondi dugo. Ddi saddu gasebei dang kelau go luguinya.

¹⁴ Téddi do cai béré hér main demagu do béré tadda kain bua, main masem kain bu’. Cindi ’ya main tua do belelem kain.

¹⁵ Gondi piyong main julong do germé do ké ba nyira a cin tua do ké ba yuda yilé cadada kain. Noi yé main yo go doyé do tungu kua kain.

¹⁶ Ddiang desiddiyong jurgum a kobi ga barua, gesengar go kégé sua andegang a kebi. Tumoi piyong biddid biddid main teba do duro gulong ddar kain.

¹⁷ Kiddin ga ’enung ba soli na, ’enung aserong tumoi dugo main kema go maré kain. Ddi si kobi go barua cang, ddi yé wa: Ddo ji lo muro ’eno, ’enunga go tumu bua, ’enunga go karu bu’.

¹⁸ ’Enung danga cindung, ’enung kené ma tumu, ama cakcak kua na, ’enung danga cindung bera kuddum. ’Enung danga dono ca maré bua, ca kalang ga maré a duro ligiam bu’.

¹⁹ Ji pasa henga ga ji wa solegé lé kua, na henga ga wa halé cakcak kua bua, dang henga ga da ’erga bu’.

²⁰ Kua, na mendem lé toa do poré, ca desiddiyong ga jurgum ga ji ba solgé a kuabang go barua lé, dang tua do jurgum do luguinya lé. Desiddiyong ga jurgum lé na, na kangiyong ga yaué go Kumu koi go jurgum. Tua do jurgum lé na, na yaué go jurgum go Kumu koi.