Epésié 6 - Kebu go dore go herua 1978

Karang kang kalndigé

¹ Keng karang, ga jageng kual go kalndegeng ga ba wogeng kogé, kua gié gogeng go geddang tumu Bagulong.

² Bi bain kang ’yoin hormo, kua na so go tumu goang kebu go doré.

³ Ji nia lé main kain na, jia wai busu bua, jia jom duro delinya suguddong bu’.

⁴ Keng karang bainderégé, ddo keng daré karndegeng kual ca ké belé mainyé ’eno, ama ga abegé duro gelé dang géjé go Bagulong koi.

Goiyong kang kagulondigé

⁵ Keng goiyong, ga jageng kual go kagulondegeng ga duro delinya kogé dang muro, dang yoré, dang ddainya do pena main go keng ba wa loang gié ca Krist kain.

⁶ Ddo keng lo cindegé, ca gusuga mouagang mera ’eno, ama ga lagenga ca kederé daré ga Kumu kai, dang ddaindegeng pena main goiyong ga Krist kai kain.

⁷ Ga lageng gié gogeng go gianduai dang gusu mowa main go keng ba wa loang gié ca Bagulong kain, na ca kalang mera ’eno.

⁸ Keng sol ca kema goni goni goa lé gié go ddari, ddi nia guiang kau kié go gulong na, Bagulong da bi boié goi bbalé ca gié goi go ddi ba lé.

⁹ Keng kagulong, ga lang goiyong gagenga main kain bu’. Ddo keng bberajégé ’eno, cawa keng sol Bagulondigé dang Bagulondegeng a dang ni, na pena, ddi sol kalang mam tumoi pena.

Henga ga kembel ga Krist kai kagé

¹⁰ Kual toi do karé na, ga daregeng dono a gusu Bagulong goang dono nain.

¹¹ Ga si henga ga kembel ga Kumu kai mam gusugeng, ca keng waia dono do ’eré gag tebenang bandu do Sidan toi.

¹² Cawa tabé duana do worinyé na tebenang kalang gusugé ’eno, ama na worin tebena danga habé ga isini ga a dang bua, dang ga ddo ca bua, dang ga osurdong bua, dang kagulong ga delinya do delem lé kua ka.

¹³ Na ca ma, ga segeng henga ga kembel ga Kumu kai gusugeng mam. Main kain na, kiddin ga wolé go isini nia ’erga na, keng da bbal ca ’eré gag dang go tebena go wa daré ca toinyegeng. Kiddin ga kenga worin kembel bera ka na, ga ’ergeng gag.

¹⁴ Ga ’eregeng gag, ga saddageng kual go cindi wurendegeng main kelau go bbala kain. Ga segeng kual go geddang gusugeng main bbala go guangereng.

¹⁵ Ga lageng tabelang ca doré Nô do Ddari do jali juam gondegeng main giabé kain.

¹⁶ Ga aiageng bo cindi gogeng kobegeng main ’yoi kain waindo waindo, ca bainyang dengesu do Sidan toi do kebo tua.

¹⁷ Ga segeng minyé caigeng main jagua do helma kain bua, dang kual go Kumu koi kobegeng main gesengar do Habé ga Kumu kai togé kain bu’.

¹⁸ Henga lé kua mam na, ga ulageng Kumu ca ddi jigenageng dang nagé. Ga ulagé waindo waindo dang meregdé dang oli goni goni mam main Habé ga Kumu kai wa bogogeng dang nain. Na ca ma, ga jimageng dang narua yoal yoal, dang geddang. Ga ulageng ca kalang ga Kumu kai mam bu’.

¹⁹ Ga ula cang ca kiddin ga ’enunga ca yo kual na, dda Kumu bung kual go geddang bua, ca ’enung dura kual go mendem go Nô do Ddari kua toi waldong wang basé muro bu’.

²⁰ ’Enunga bagiyong ca Nô do Ddari lé, ama cakcak kua ’enunga duro gerngang. Ga ulageng cang ca dda ’enung ya kual basé muro main ’enung ba darang kain.

Paul sigé labia do karé

²¹ Kermana go geddang go lo gié go Bagulong koi Tisik na, ddia yegeng kual guang mam ca keng sela jomé guang.

²² ’Enung gi Tisik gusugeng ca ddi yageng kual goni mam ca dda ddaindegeng jalageng.

²³ Dda Ba Kumu dang Bagulong Jésu Krist, ké bigé karmana mam jalua juam, dang kederé ’yo, dang bo cindi.

²⁴ Dda wai do Kumu toi jimang ké mam ga kederégé ba ’yé Bagulong Jésu Krist, dang kederé ’yo ga basé karé.