Epésié 5 - Kebu go dore go herua 1978

Jimageng duro arinwa

¹ Ga ’yugula Kumu ca kenga karndi ga kederei ba ’yageng.

² Jimageng dang kederé ’yo main Krist kederei ba ’yanang kain, ddi bu gusi caina main sandega bo tibé do ddowa tuna do mowoi Kumu gusi.

³ Kenga kalang ga Kumu kai, na ca ma ddo kalang jo kual go béli kua, dang ddisin, dang tabelang do isini a duroigeng ’eno.

⁴ Ddo keng yo kual go bélé go mam go dasi, dang kual go mader, dang kual go kini ’eno, na golgo keng lai Kumu désé duro olé.

⁵ Keng sol carara ca kema go lo béli bua, dang kema go ddisin bua, dang kema goang tabelang do ’iga ’iga (to do poré na nyiré go koliyong) go andong duro Leu do Krist dang Kumu toi ’eno.

⁶ Ddo kema pena ddi lamegeng dang kual go yo go kalin ’eno, na ca wané lé ma, mainyé do Kumu toi da ba ca karang ga ba kain jo kual goi.

⁷ Ddo keng daiang kalang ga main kain lé ’eno.

⁸ Tumu na kenga duro delem, ama cakcak kua na, keng wa duro arinwa ca keng ba daiang Bagulong. Na ca ma, ga ’erageng main kalang ga arinwa ka kain.

⁹ Cawa arinwa wa henga ga gani gani gang olum mam bua, gang duro bua, dang kual go cindi bu’.

¹⁰ Ga lagenga henga ga keng ba solgé ca mowei Bagulong gusi.

¹¹ Ddo keng daiang kalang ga lo gié go kalin go duro delem ’eno, ama ga lageng gié gogeng duro arinwa waldong wang.

¹² (Henga ga kalang wa logé duro wasuai, na nia yé kual gogé na, na henga ga dasi.)

¹³ Kiddin ga gié gogé lé toi nia andong duro arinwa na, toigé da turong dang waldong wang.

¹⁴ Cawa henga mam ga toiga turong dang na, na arin carara, na ca ma Kumu yé wa: Ji go ba woi kung na, ji lebu dang, Ji sa dang a duro kalang ga maré, Krist da arin cain.

¹⁵ Na ca ma, ga lageng angal dang oré gogeng, ddo keng oré main kalang ga mamiyong kain ’eno, ama ga ’erageng mainya kalang ga nadurong kain.

¹⁶ Ga lageng henga ddara mam dang kiddin gagé kerab kerab, cawa wolé go na wo duroi cakcak kua na, na go isini.

¹⁷ Na ca ma, ga jomé main kalang ga mamiyong kain ’eno, ama gié go Bagulong ba dar ca kenga lai na, ga sela toi.

¹⁸ Ddo keng koiang céré ’eno, cawa suagé go gendei wo duroi, ama wunageng danga Habé ga Kumu kai.

¹⁹ Ga yageng kualang guseng dang kual go duro kera go debainyé bua, dang kera go Kumu koi bu’, ga dega kera go debainyé ca Bagulong, ga debeinyai dang ddaindegeng mam.

²⁰ Ga la Ba Kumu désé waindo waindo ca henga mam dang Bagulondena Jésu Krist gusondi.

Kandu kang konderdégé

²¹ Ga debu caigeng dugo dang gusugeng ca muro do Krist toi.

²² Keng kandu, ga debu caigeng to konderdegeng main to Bagulong kain.

²³ Cawa barua na gumu go tama kua, main Krist ba jomang gumu ca yaué go Kumu koi kain, yaué go Kumu koi na Krist gusi go ddi ba minyei.

²⁴ Dda kandu debu caigé to konderdégé main yaué go Kumu koi ba debang cai to Krist kain.

²⁵ Keng bainyong, dda kederegeng ’ya kandigeng main Krist kederé ba ’yang yaué go Kumu koi go ddi ba bu gusi cai kain.

²⁶ Ddi lé main kainya ca belé yaué go Kumu koi arin carara dang kang bua, dang kual goi bu’ ca Kumu.

²⁷ Cawa ddi dar ca ’yo yaué go Kumu koi gusi dang hormo doi mam bua, arin carara bua, basé wané bua, basé kenwa bua, basé doarang bua, basé guria bu’.

²⁸ Dda bainyong kederégé ’ya kandigé main gusugé kain. Kema go kederei ba ’yé tamdi na, kederei ’ya ddi bang gusi.

²⁹ Cawa kema go kainyé gusi bang wo ’eno, ama ddi abia abé bua, ddi magia magé main Krist ba lang yaué go Kumu koi kain.

³⁰ Cawa na henga ga karang ga gusi.

³¹ Main Kumu ba yang duro cidab doi waldong wang kain: Na ca ma, kema da ddé bai kang ’yoi ca jomé kang tamdi, ké ca’ ka dai ji gusu pena.

³² Kual lé na go gumu go cindi go gelé waldong wang. ’Enung ’erem ca kual lé na kual go kera ca Krist dang yaué go Kumu koi.

³³ Ama kual lé na caigeng bu’, na gad barua goni goni kau, kederei ’ya tamdi main gusi kain bua, tama doni doni kau to mer kudura bu’.