Epésié 4 - Kebu go dore go herua 1978

Daié duro gusu go pena

¹ Na ca ma, ’enung go gerngang ca gié go Bagulong koi, olgeng ca keng ’era tumu tumu bbala ca togé go Kumu ba tegeng, main ddia ba darang kain.

² Ga debegeng caigeng dugo luguab luguab bua, dang jalua juam bua, dang ’yomé go ddaindegeng waindo waindo bua, ’Ima ddaindegeng ca gusugeng ca kederé ’yo bu’.

³ Ga maga daié gogeng go pena, dang jalua juam go Habé ga Kumu kai ba daigeng saddegeng dang gusugeng.

⁴ Gusu wo kené pena bua, Habé wo kené pena bua, tugoié wo kené pena main Kumu ba tegengang kain bu’.

⁵ Bagulong wo kené pena bua, bo cindi wo kené pena bua, désé wo kené pena bua,

⁶ Kumu wo kené pena, ddia kalang mam Baigé bua, ddi di termala caigé mam bua, ddi lé gié caigé mam bua, ddi jom duroigé mam bu’.

⁷ Ama Krist bi kema goni goni a duroina wai doi kalin, bbal ca henga gai ga combi ga ddiang nagé.

⁸ Main Kumu ba yang duro cidab doi waldong wang kain: Kiddin ga Krist ba nai dang na, Ddi gol kalang ga duro gerngang daiang nai bua, Ddi bigé kalang dono kalin ca lo gié goi bu’.

⁹ Kual go ddi ba nai dang lé na, toia mena ga? Tumu jua na, ddi gesin duro kiddin ga ddigé ga to gesin dugo.

¹⁰ Ddi go ba gesin dugo lé na, na ddi banga naié dang do ddo wal ni ca ddia bbalé kiddin mam.

¹¹ Na ddia bogé kalang dono kalin cindo kaindo kaindo ca lo gié, ddi bigé ga pena gié go pajerong bua, ga pena ca cogelé kebu go Kumu koi bua, ga pena ca doré Nô do Ddari bua, ga pena ca magé yaué go Kumu koi bua, ga pena ca gelé kalang kual toi bu’.

¹² Ddi lé main kainya ca nyané kalang ga Kumu kai ca kandia la gié ca ga Krist kai, ca dda Krist gusi ’era tumu tumu duro bo cindi bu’.

¹³ Main kain na, na mam da dai pena duro bo cindi guana bua, dang solé guana go Kumu Kurondi bu’, ca na belu kalang ga gemdong ga bbalé kerab ca bbalé go Krist koi.

¹⁴ Ddo na jomé main karang ga wa kelangé ’eremé gogé ca gelé cindi kaindi kaindi main kal wa kuaiang doiyé kain ’eno, cawa kalang ga pena wa kaié kalang dang ’eremé gogé go bandu.

¹⁵ Ama ga yagenga kual go cindi dang kederé ’yo ca na malga duro henga mam bera na belé main Krist kain, cawa ddia caina.

¹⁶ Ca wai doi na, ddi dai henga ga karang ga gurum gusu kai pena kerab. Ddi dai henga ga karang ga cuaderong a gusu gurum gusi, dang isé cindegé mam pena. Kiddin ga henga ga karang ga gurum gusu wa lo gié gogé ddar na, gusu lé malgu ’ya tumu tumu duro kederé ’yo.

Krist bena jomé goang cindena go herua

¹⁷ Sela, kua na kual go ’enung wa yogeng waldong wang dang Bagulong gusondi, ddo keng oré main kalang ga delinya gang ’eremé go kalin yak kain ’eno.

¹⁸ Solé goga belé delem, ké suguddong hasang jomé goang cindegé go Kumu koi ca mader do a duro ddaindigé bua, dang térin dogé do nain bu’.

¹⁹ Dasi lagé ’eno bua, ké bé gusugé dugo bad, ca lo béli dang gié go ddisin bu’.

²⁰ Gelé go Krist koi na main kain ’eno.

²¹ Ama keng nia jé kual goi go ké ba gelgengang nai waldong wang na, ga kuba kual go cindi go Jésu koi.

²² Ga ddageng hada dogeng do tumu do ddegeli cong, na to do toiyegeng kené tumu dang go osinyé gusu tabelang doa.

²³ Na gad ddaindegeng dang tabelang belu herua.

²⁴ Ga si kema go herua gusugeng, na ddi go Kumu ba dibi gené main nai kain, ca gelé jomé gogeng goang cindi go geddang go arin carara dang kual go cindi waldong wang.

²⁵ Na ca ma, ga ddageng kual go poi cong, dda kema goni goni a duroigeng ddi yai mondia kual go cindi, cawa na mam daia duro gusu go pena.

²⁶ Keng nia belé mainyé na, ga lageng angal ca ddo to aseregeng duro isinwa ’eno, ddo teba karegeng dang mainyé lo gua ’eno.

²⁷ Ga ddoi Sidan giyong ’eno.

²⁸ Kema go ba koi henga kené tumu na, ddo ddi koié henga ddang com ’eno, golgo ddi la gié go ddari dang kobi, ca ddi waia henga ga jégené kema go nyagé.

²⁹ Ddo keng yo kual go isini pena ’eno, ama ga yagenga kual go ddari go jégené kamdegeng tumu tumu duro bo cindi bua, ca jégenégé ca todero dogé bu’, main kain na, kalang ga jo kual gogeng lé, ka wai busu.

³⁰ Ddo keng homé Habé ga Kumu kai kederégé ’eno, Habé lé na genjer go Kumu koi go ddi ba si caigeng, main henga ga ijibé kain, ga gelna waldong wang ca wolé go wa orang na, Kumu da toarna ka mam.

³¹ Ga ddageng kual go isini, dang kual go solé kalang ddaindegé, dang mainyé, dang bojé, dang nyangdé, dang isinwa lo goa cindo kaindo kaindo cong suguddong hasang nageng.

³² Ga lageng ddarua dang kederé ’yo dang gusugeng, ga buraga gusugeng main Kumu ba burogugeng ca Krist kain.