Epésié 2 - Kebu go dore go herua 1978

Ga maré belang cindegé

¹ Tumu na, keng ma maré ca wané dogeng bua, ca isinwa dogeng bu’.

² Tumu na keng la henga ga delinya lé kua ka bua, keng kobua kelma go dono go habé ga isini kogé ga a duro kal go dang bu’. Habé la wa lo gié cakcak kua ddainya kalang ga wa kainya Kumu.

³ Na mam mainya nagé kain tumu bua, na la henga ga tabelang do gusuna toi bua, na la henga ga gusuna dang ’eremé guana ba dargé bu’. Duro wo guana na, na to mainyé do Kumu toi main kalang kané kain.

⁴ Ama olum do Kumu toi dang kederé ’yo gai caina na, ka nain.

⁵ Cawa kiddin ga na ba ma ca wané doana na, ddi belena dang cindena daiang Krist, Kumu minyegenga ca wai doi.

⁶ Ca na ba daiang Jésu Krist na, Kumu belena dang cindena ca na da termala dang nai a dang ni.

⁷ Kumu lé main kainya ca gelé waldong wang, ca a duro saman mam do wa orang na, ddia da lana wai nain ca olum doi do ddi ba gelnang na, gusu Jésu Krist.

⁸ Ca wai do Kumu toi ma, ddi minyegeng ca bo cindi gogeng, minyé lé sai a gusugeng ’eno, na kalin do Kumu toi.

⁹ Na ca gié gogeng go lo ’eno bering, cawa ddo kema pena ddi pedé gusi ’eno.

¹⁰ Cawa Kumu na loana, ddi debena daiang Jésu Krist ca na la gié go ddari go Kumu ba nyani tumu din ca na lai.

Kalang mam dai pena ca Krist

¹¹ A to wo gogeng na, kenga kalang ga toigé ddang. Ga Juib ga ba wal mandeli na, ké tegenga kalang ga basé walé mandeli. (Walé go mandeli na henga ga kalang ba walang kobegé.) Ga ’eremegeng ca jomé gogeng go tumu.

¹² Tumu na, kenga suguddong has dang Krist bua, kenga kergé bua, kenga duro kalang ga Israél ga Kumu ba pargé ’eno bua, kebu go doré dang tugoié go Kumu ba bigé kalang gai na, na caigeng ’eno bu’. Keng jom duro delinya basé tugoié bua, basé solé Kumu bu’.

¹³ Ama cakcak kua ca keng ba dai pena dang Krist na, keng ga tumu suguddong hasang Kumu, keng caga ’yoabang nai.

¹⁴ Cawa Krist banga boana jalua juam ma, ddi dai ga Juib kang kalang ga toigé ddang pena, ddi go dosu dersél do ba gosinyigé tebena dang gusugé lé cong dang maré goi.

¹⁵ Ddi toin so go Juib kogé, dang kual gogé go kaidé, dang kual gogé go ké ba nyani cong, ca ddia daié kalang ga Juib kang kalang ga toigé ddang herua pena dang nai, ddi daiegang jalua juam bu’.

¹⁶ Ca maré go Krist koi ca sia go adegelé na, ddi toin tebena do duroigé cong bua, ca maré goi ca sia go adegelé na, ddi dai kalang ga Juib kang kalang ga toigé ddang gusu pena bua, ddi daiegé labia dang Kumu bu’.

¹⁷ Krist ’erga ca doré Nô do Ddari do jalua juam, ca keng ga toigeng ddang ga suguddong has dang Kumu bua, ca ga Juib ga ’yoab dang Kumu bu’.

¹⁸ Ca Krist na, na mam, kau ga Juib, kau kalang ga toigé ddang, na bbal ’eré tumu Baina Kumu ca Habé gai pena kiddi kiddi.

¹⁹ Na ca ma, keng ga toigeng ddang, cakcak kua kenga kergé ’eno bua, kenga kalang ga dong ’eno bu’, ama kenga karang ga gulong bua, kenga kalang ga Kumu kai bua, kenga Kumu karndi bu’.

²⁰ Keng na, Kumu wa gaddegenga ca guiang go kulu toi go pajerong ga gié, kang kalang ga cogelé kebu goi ba dei dugo, ama Jésu na, ddia keja do keddang do ddo wal.

²¹ Na ddi bang go daiena pena duro gaddé lé, ca gaddena dang ca na bel kulu go yaué koi go arin carara ca Bagulong.

²² Ca keng ba daiang Jésu Krist na, Kumu gaddegeng pena dang kamdegeng, ca keng belu kulu goi go jomé kené dang Habé gai.