Epésié 1 - Kebu go dore go herua 1978

Waigi do Paul toi

¹ Na ’enung Paul, paja go gié go Jésu Krist koi ca kederé daré ga Kumu kai. ’Enung pasu maktub lé kua ca kalang ga Kumu kai ga a Epés, dang ké ga geddang ca Jésu Krist.

² Baina Kumu dang Bagulong Jésu Krist, ké lageng wai dang jalua juam.

Busu do Kumu ba sena dang na ca Jésu Krist

³ Dda na debinya Kumu, Bagulondena Jésu Krist Bai, ddi go ba sena busu caina ca na ba daiang Krist, ddi bena busu doni doni do Habé togé mam do a dang ni.

⁴ Cawa kiddin ga Kumu ba debu delinya ’eno dé na, ddi parna ca na belu kalang gai daiang Krist bua, ca na belu kalang ga arin carara basé kual caina tumoi bu’. Ca kederé ’yo ga Kumu kai na,

⁵ ddi gabena tumu din ca na belu karndi ca Jésu Krist, kua na kederé daré gai ca wai doi.

⁶ Dda na debainya Kumu ca wai doi do nain go ddi ba lang nana ca Kurondi go kederei ba ’yei.

⁷ Cawa Kumu toarna bua, ddi burogu isinwa doana bu’ danga Krist kebardi. Ddi gelna wai doi do combu bua,

⁸ ddi lana dang na nain bu’. Ddi lana henga ga ddi ba ’erem ca logé ca narua doi dang solé goi.

⁹ Kual goi go mendem go ddi ba ’erem ca loi tumu din na, ddi gelna dang nai waldong wang gusu Krist.

¹⁰ Kual lé na, na ca wolé toi do karé ma, Kumu da yau henga ga dang ni dang henga ga duro delinya mam to kelma Krist dugo.

¹¹ Kumu lé henga mam main ddi ba darang kain, ddi parna tumu din ca kederé daré gai ca na daiang Krist bua, ca na belu kalang gai bu’.

¹² Na ga ba si tugoié guana tumu ca Krist na, dda na debainya Kumu go hormo.

¹³ Kiddin ga keng ba jé Nô do Ddari do cindi do minyé na, keng bu cindi ca Krist, kardené Kumu si genjer goi gusugeng ca kenga kai, na Habé gai ga ddi ba bugeng dang nagé ca kebu goi go doré.

¹⁴ Kumu bena Habé gai mainya henga ga ijibé kain, ca minyé guana go ddi ba dorgang kalang gai kebu kain ca na deba dogé. Ddi gelna waldong wang ca ddia da bena deba la, kiddin ga wolé guana go toré da bbal. Dda na debainya Kumu go hormo.

Olé go Paul koi

¹⁵ Na ca ma, kiddin ga ’enung ba jé bo cindi gogeng ca Bagulong Jésu, dang kederé ’yo gageng ca kalang ga Kumu kai mam bu’ na,

¹⁶ ’enung wadang désé do loi Kumu caigeng ’eno bua, ’enung ’eremang nageng duro olé guang waindo waindo bu’.

¹⁷ ’Enung ol Kumu go Bagulondena Jésu Krist koi, ddia Ba go hormo ca ddi begeng Habé gai ga bogeng solé kual toi bua, ca gelegeng ca keng sela Kumu carara bu’.

¹⁸ ’Enung ol Kumu ca arinwa doi arinya ddaindegeng, ca keng sela tugoié go ddi ba tegeng cai bua, ca keng sela lainyong go deba doi do hormo do ddi wa maga ca kalang gai bua,

¹⁹ Ca keng sela dono doi do tungu do ddo wal ca na ga bo cindi bu’. Ddi gel dono doi lé waldong wang.

²⁰ Kiddin ga ddi ba belé Jésu dang cindi a duro ga maré na, ddi si jom wo ca kobi go barua a dang ni.

²¹ A kiddin lé na, Krist jom wa ca ga ddo ca mam bua, ca ga dono mam bua, ca ga osurdong mam bua, ca kagulong mam bua, ca gusong goni goni go ké wa togoi bu’, na a duro saman do cakcak kua mera ’eno, ama a duro saman do wa orang bu’.

²² Kumu yau henga mam to Krist gondi dugo bua, ddi bi yaué go Kumu koi ca kondia da termala cai bu’.

²³ Yaué go Kumu koi na Krist gusi go ddi wa jomé cai bbalé kerab bua, ddi bbal ca jomé ca henga mam bbalé kerab bu’.