GIÉ GO PAJERONG GA GIÉ KOGÉ 7 - Kebu go dore go herua 1978

Etién kual goi go doré

¹ Gemdong ga tibé Kumu gumu gogé ’enger Etién wa: Kual la cindi ga?

² Etién jogu yégé wa: Karmeng dang baindereng, ga jageng kual guang, Kumu go hormo boi moindena Abraham cindi kiddin ga ddi wo a Mésopotami, main ddi jima a ca gesong ga Haran ’eno dé.

³ Ddi yei wa: Ji dda gesong gain dang kalndin, ji ’era ca gesong ga ’enung da gelin.

⁴ Kardené Abraham ddé gesong ga Kaldé, ddi ’yé jomé ca gesong ga Haran. Abraham bai ma, kardené Kumu sagang nai a Haran ’ergang nai ca gesong ga keng ba jom kené cakcak kua.

⁵ Kumu bi gesong kené bbalé walwa tebai dura pena ’eno, ama Kumu dori kebu ca ddia da bi gesong lé kang ga moinderei ga a kardi. Ama a kiddin lé na, Abraham wa kié ’eno dé.

⁶ Kua, na kual go Kumu ba yei waldong wang, moinderei da jom ca gesong ga ddang. Ka belegé guiong a kené, ka gelegé cindegé ddegelé aru poddin.

⁷ Kumu yé wa: ’Enung da kaidé kual ca kalang ga ba légé gianduai lé. Kardené ka durong dong, ka melawung a kiddin lé kua.

⁸ Kardené Kumu dori Abraham kebu. Hendé do ca kebu go doré lé na, na walé go mandeli gua. Abraham wo Isak, wolé margem ddi wali mandeli. Isak wal Jakob mandeli bua, Jakob wal moinderana moac ca sua mandeli bu’.

⁹ Moinderana lé Josép ddéngi. Ké keli cong, ddi belé guiang a ca gesong ga Ejibté, ama Kumu wo kené dang nai.

¹⁰ Ddi minyei a duro gelé goi go cin mam. Kiddin ga Josép ba ’eré tumu Paron kelma go Ejibté na, Kumu bi wai dang narua, kelma lé belé Josép kema go ddo ca ca gesong ga Ejibté, dang gulong goi bu’.

¹¹ Kardené bagedara ba ca gesong ga Ejibté, dang gesong ga Kana mam, dang gelé go cin bbani ’eno, ga moinderana wa henga ga do ’eno.

¹² Ama kiddin ga Jakob ba jé gasa na wo a Ejibté na, ddi gi moinderana kené cai pena.

¹³ Jogé go caigé sua na, Josép gel gusi cin karmei. Kelma Paron jé ca Josép kalndia wo kené.

¹⁴ Kardené Josép gi té bai Jakob ca kondia ’erang kang ga karndi mam, ka kalang to jurgum ca bai.

¹⁵ Jakob sai ’yé Ejibté, ddi ma ni kené kang ga moinderana bu’.

¹⁶ Ké nyim temaidigé ’yé ’embégé a Sikem, duro umbung go Abraham ba kel dang laré go doarna a kuaba Hamor karndi a Sikem.

¹⁷ Kiddin ga kebu go doré go Kumu ba dorang Abraham ba ji ’yoab ca seré toiné na, ga Israél wéré nain ca gesong ga Ejibté.

¹⁸ Kardené kelma go herua go ba sela Josép ’eno, ddi termala ca gesong ga Ejibté.

¹⁹ Kelma lé, lé kalang gana dolom, ddi gelgé monderana cindegé bu’. Ddi sigé kandia bega karndigé cong ca kandia mara.

²⁰ A kiddin lé na, ké wo Mois, ddia kié go ddari, ddi mowi Kumu gusi bbani ’eno. Ké abi ta Bai gulong kederé subu.

²¹ Kiddin ga ké ba debi cong na, kelma Paron turmoi waii, to aii abi main kuranda go wo kain.

²² Ké geli Mois narua do Ejibté togé mam. Ddi belé kema go dono duro kual go yo dang gié go lo bu’.

²³ Kiddin ga ddegelé bbal to poddin na, Mois ’erem ca oré solé karmei ga Israél.

²⁴ Kiddin ga ddi ba sol kema go Ejibté wa gelé kema go Israél cindi na, ddi ’yé ca ’yoi toi, ddi goji, ddi deddu kema go Ejibté lé.

²⁵ Ddi ’erem ca karmei ga Israél na da sol ca Kumu da minyégé a kobi, ama ké sela kain ’eno.

²⁶ Waindo Mois jiga gusugé ga Israél, sua wa togé gusugé, ddi ’yé gusugé ca mainyégé cong. Ddi yégé wa: Kajanderndeng, kenga karmei, keng té gusugeng kainya cawa ga?

²⁷ Ama ddi go wa togé mondi lé jogu yé Mois wa: Na wanga soin gumu go kaidé kual caini ga?

²⁸ Ji dar ca deddang main ji ba dedduang kema go Ejibté nandi kain ga?

²⁹ Kiddin ga Mois ba jé kual lé kain na, ddi nyal geré ’yé jomé ca gesong ga Madian. A kiddin lé na ddi wo karang ba bainyong sua.

³⁰ Kiddin ga Mois ba jom kené ddegelé to poddin na, kangito go Bagulong koi gel gusi cindi a duro gada, to kubung go Sinai cin tua do wa ’yo duro dalin kuin.

³¹ Kiddin ga Mois ba sol henga lé na, ddi sol kagelokemo, ddi sidé ’yoab ca ddia solang duro, ddi jé Bagulong noi yé wa:

³² Enunga Kumu go moinderein kogé, Kumu go Abraham koi bua, Kumu go Isak koi bua, Kumu go Jakob koi bu’. Mois lé muro, ddi yor, ddi dang dono do solé kiddin lé ’eno.

³³ Kardené Bagulong yei wa: Tura giabé a gondin cong, cawa kiddin ga ji ’eré kené lé kua, na gesong ga arin carara.

³⁴ ’Enung sol gelé go cin go kalang gang ga a Ejibté kogé. ’Enung jé ulé gogé. ’Enung gesingu ca minyégé. ’Erang cakcak kua, ’enung ca giyein a Ejibté.

³⁵ Na Mois lé go ga Israél ba kainyi cong, ké yei wa: Na wanga soin gumu go kaidé kual caini ga? Kumu giia ddi, ca kondia jima gumu go toregé, dang jégené go kangito go ba yei kual a duro dalin kuin.

³⁶ Na Mois lé go ba dor ga Israél dong a Ejibté, dang gié go dono go kagelokemo, dang henga ga gelé a ca gesong lé, dang cin kurai go gumu go ddoaga go yilé, dang duro gada ddegelé to poddin.

³⁷ Na Mois lé go ba yégé ga Israél wa: Kumu da gigegeng koi go cogelé kebu go pena main nang kain a duro kalang gageng.

³⁸ Na ddi go ba yau ga Israél duro gada, ddi jom dang moinderana bua, dang kangito go ba yei kual ca kubung go Sinai bu’, ddi yé kual go Kumu koi goang cindi go ddi ba benang nai.

³⁹ Ama moinderana dar ca jo kual goi ’eno, ké kainyi cong, ké dar ca boié caigé jogu Ejibté.

⁴⁰ Ké yé Aron wa: Lana kumurong ga oré tumoina, cawa Mois go ba durgana a ca gesong ga Ejibté lé na, na sela henga ga ba lei ’eno.

⁴¹ Ké nyiré si go wusin, ké tibé kula lé dang pagé, gusugé mowegé ca henga gagé ga ké gang ba nyiregé.

⁴² Ama Kumu belegé kardi, ddi ddégé ca kandia melaua desiddiyong ga dang, main ké ba pasuang a duro cidab do ga cogelé kebu go Kumu koi togé kain. Kalang ga Israél, Pagé ga keng ba wadelégé a duro gada ddegelé to poddin na, Keng wadelega cang ga?

⁴³ Na kain ’eno, keng aia kulu go badigé go Kumu gogeng Molok koi, Dang tiddin do desiddin do Kumu gogeng Répan toi, Na koliyong ga keng ba légé ca melauegé, Na ca ma, ’enung da taiegé kara Babilon waldong has.

⁴⁴ Moinderana danga kulu go badigé go ké ba si bbela goang so duroiné. Kumu yei Mois wa kondia la henga main ddi ba geliang kain rés.

⁴⁵ Kardené Baina bu moinderana kulu go badigé lé. Kiddin ga Josué ba ’yang nagé ca gesong ga Kumu ba tai kalang ga toigé ddang cong tumoigé na, ké ai kulu go badigé lé kobegé, kulu lé ji kené bera saman do Dabid toi.

⁴⁶ Kumu gusi mowi ca gié goi nain, ddi ol Kumu go Jakob koi ca kondia ddai ddia boiei kulu go jomé.

⁴⁷ Ama Salomon na boiei kulu lé.

⁴⁸ Ama Kumu go dang ni go ddo wal go jomé duro kulu go kalang ba boii ’eno, main go cogelé kebu go Kumu koi ba yang waldong wang kain, Bagulong yé wa:

⁴⁹ Dang na pogu guang, Delinya na bbendem go candé guandang, Keng bbal ca boiang kulu go wa ga? Kiddin bbal ca ’enung bogé gelalé kené wa andi ga?

⁵⁰ Na ’enung banga lo henga lé kua mam ’eno ga?

⁵¹ Ai, keng kalang ga ca osua. Keng lebedé ddaindegeng dang gesemegeng ca kenga jo togé go Kumu koi ’eno, keng kain Habé ga Kumu kai cong waindo waindo, keng mainya moinderegeng kain.

⁵² Na go cogelé kebu go Kumu koi goni ma, moinderegeng geli cindi ’eno ga? Ké deddu ké ga doré Nô do ddi go geddang go ba ’erga lé kua toi, ama cakcak kua, na ddi go keng ba ai gangeldi deddi.

⁵³ Na keng ga ’yo so go Kumu koi kuaba kangiyong, ama keng maga so lé ’eno.

Ké deddu Etién

⁵⁴ Kiddin ga gemdong ga bedang ba jé kual lé kain na, ddaindigé solgé, ké yidié kégeigé dang mainyé ca Etién.

⁵⁵ Ama ddi won dang Habé ga Kumu kai, ddi ai cindi sol dang, ddi sol hormo do Kumu toi piyong biddid biddid bua, Jésu dang ’eré ca Kumu kobi go barua bu’.

⁵⁶ Ddi yé wa: Selageng, dang hangong, ’enung sol Kema Kurondi dang ’eré ca Kumu kobi go barua.

⁵⁷ Ama ké jeb alalé dang noigé osu, ké lebedé gesemegé. Ké mam dusong geré cai perec.

⁵⁸ Ké serei ’yang nai kara berem dong. Ké worinyi dang keddang. Kalang ga hendé bé badigé gagé tumu marna go pena go ké ba tei Saul, ca kondia magagé.

⁵⁹ Kiddin ga ké wa worinyé Etién dang keddang na, ddi wa olé, ddi yé wa: Bagulong Jésu, ji ’ya habeng.

⁶⁰ Kardené ddi poi gomdi dugo, ddi soi noi osu, ddi yé wa: Bagulong, ddo ji so isinwa lé kua caigé ’eno. Kiddin ga ddi ba yé kual lé kain na, kebi lebu.