GIÉ GO PAJERONG GA GIÉ KOGÉ 4 - Kebu go dore go herua 1978

Piér kang Jâ ’eré tumu kalang ga bedang

¹ Kiddin ga Piér kang Jâ wa yogé kalang kual dé na, ga tibé Kumu, dang kalang ga magé kulu go yaué go Kumu koi gumu gogé, dang ga Sadusié ’erga.

² Kederégé homdégé bbani ’eno ca pajerong ga gié sua lé, cawa ké wa gelé kalang, ké yégé wa: Jésu belang cindi a duro ga maré, main kain na, kalang mam da belang cindegé a duro ga maré.

³ Ké nyimgé bégé duro gerngang bera waindo, cawa teba ka.

⁴ Ga pena combu a duro kalang ga ba jé kual lé na, ké bu cindi. Kalang ga ba bo cindi mam na, ké ddogin bainyong bbal main dubu bai kain.

⁵ Waindo gemdong ga Juib kagé, dang gemdong ga bedang, dang kalang ga gelé so go Kumu koi, ké yau a Jorsalem.

⁶ Gemdong ga tibé Kumu gumu gogé Anan, dang Kaip, dang Jâ, dang Alésandré, dang gemdong ga tibé Kumu gumu gogé lé karmei ga to moin yau dang nagé bu’.

⁷ Ké gol pajerong ga gié ’yang nagé tumoigé, ké ’engergé wa: Keng bi kema lé labia danga dono do wang gusondi ga?

⁸ Piér won dang Habé ga Kumu kai, ddi yégé wa: Gemdong ga kalang kagé, dang gemdong ga bedang.

⁹ Keng wa ’engeré toini labega ca gié go ddari go ni ba lang kema go gondi rorogdo lé kua, dang labia do ddi ba wai.

¹⁰ Na gad keng dang kalang ga Israél mam sela ddara, kema lé wa ’eré tumoigeng kua, ddi wai labia danga dono do Jésu Krist go Nasarat gusondi, ddi go keng ba bbobelé ca sia go adegelé go Kumu ba belei dang cindi a duro ga maré.

¹¹ Cidab do Kumu toi yé kual go Jésu lé koi waldong wang: Ddia keddang go keng ga gaddé ba debi cong, Ddia belé keddang go osi go ddo wal.

¹² Minyé na gusi mera, cawa kema go ddang a duro delinya mam, go Kumu ba bi gusong bbal ca minyana main nai kain na, wo ’eno.

¹³ Kalang ga bedang lé sol kagelokemo, cawa Piér kang Jâ ’eré tumoigé kalin basé muro, ké sol ca kandia kalang ga kalin ga basé solé maktub, ké sol ca kandia dal kiddin tumu kang ga Jésu.

¹⁴ Ama ké sol kema go ba wai labia lé dang ’eré kang ga nagé bu’, ké wai kual go jogé yogé ddang ’eno.

¹⁵ Ké yégé kandia andong dong a duro bedang, ké ji ca nyané kual duro gusugé.

¹⁶ Ké yé gusugé wa: Na lageng kalang la mena ga? Kalang ga Jorsalem mam, ké sol gié go dono go kagelokemo go ké ba lei, na bbal ca naregé ’eno.

¹⁷ Ca kual lé ajé tumu tumu ’eno na, dda na bberajégé ca ddo ké yo kualang Jésu lé gusondi ’eno.

¹⁸ Ké tegagé, ké yégé dang dono ddo kandia yo kual, kau gelé kalang dang Jésu gusondi com ’eno.

¹⁹ Ama Piér kang Jâ jogu yégé wa: Keng wala kual lé duroia keng gang, na geddang a tumu Kumu ca ni ja kual gogeng dda go Kumu koi ga?

²⁰ Ama niang dono do kainyé yo kual ca henga ga ni ba solgé, dang kual go ni ba jei bu’ ’eno.

²¹ Gemdong ga bedang lé bberajégé ddang com. Ké wa kual pena go ’yomegé ’eno, ké begé dang cawa kalang mam wa debainyé Kumu ca gié go ké ba lei.

²² Cawa kema lé go ké ba lé gié go dono go kagelokemo go ba bi labia lé na, ddegelei ddi to poddin.

Kalang ga bo cindi olé gogé

²³ Kiddin ga ké ba bé Piér kang Jâ dang na, ké ’yé gusu karmegé, ké yégé kual go gemdong ga tibé Kumu dang gemdong ga bedang ba yegang nai.

²⁴ Kiddin ga kalang ga bu cindi ba jé kual lé na, ké yau pena ol Kumu ca kual lé, ké yé wa: Bagulong, jia lo dang, dang gesong, dang kurai go gumu go ddoago, dang henga ga duroigé mam.

²⁵ Jia yo kual lé kua a gusu Habé ga Kumu koi kebu koin go gié moindini Dabid, ji yé wa: Kalang ga toigé ddang suaga dang mainyé kainya cawa ga? Kalang nyan kual go kembei kalin yag, na cawa ga?

²⁶ Kermeleng ga delinya ka nyan gusugé ca worinyé kembel, Ké dai gusugé pena tebena dang Bagulong bua, tebena dang Krist goi bu’.

²⁷ Cawa na cindi, Hérod dang Pons Pilat dai pena duro gulong go gumu lé, kang ga kergé, dang to moin go Israél, ké sai tebena dang koin go gié go arin carara Jésu Krist go ji ba pari.

²⁸ Henga ga ké ba légé lé kua mam, na henga ga kederein ba dar ca kandia lagé main kain dang dono doin. Na henga ga ji ba nyangé tumu din.

²⁹ Bagulong ji sela ké wa nareni cakcak kua, ji bigé kain ga gié dono do yo kual goin basé muro.

³⁰ Ji tara kobin ca bogé kalang labia, dang henga ga gelé dang gié go dono go kagelokemo, ji lagé ca koin go gié go arin carara Jésu gusondi.

³¹ Kiddin ga ké ba ol ka na, kiddin ga ké ba yau kené lé gigié. Ké mam won dang Habé ga Kumu kai. Ké yé kual go Kumu koi basé muro.

Ga bo cindi gosin henga gagé duro gusugé

³² Kalang ga bo cindi dang ddainya pena bua, dang ’eremé pena bu’. Kema goni goni a duroigé go yo wa: Henga gai na kai macai na, wo ’eno, ama ké dai henga gagé mam pena.

³³ Pajerong ga gié yé hendé dogé ca belé go Bagulong Jésu koi goang cindi a duro ga maré dang dono combu. Kumu si busu do nain caigé mam.

³⁴ Kema pena a duroigé wiu dang henga ’eno, cawa ké ga dang yagé, kau gulong, ké kelgé cong, ké ’yang laré go henga gagé ga ké ba kelgé cong lé.

³⁵ Ké bigé pajerong ga gié, kardené ké gosin kema goni goni bbalé ca nyagé goi.

³⁶ Josép go a to moin go Lébi koi go ké ba woi a ca gesong ga Sipré, na ddi go pajerong ga gié ba di tembaldi Barnabas. (Gusondi to do poré na kema go jalé ddainya.)

³⁷ Ddi kel yagé goi cong, ddi bigé pajerong ga gié laré lé.