GIÉ GO PAJERONG GA GIÉ KOGÉ 3 - Kebu go dore go herua 1978

Piér bi kema go midili labia

¹ Dang teba ca do borndo na, Piér kang Jâ ’yé ca oré duro kulu go yaué go Kumu koi.

² ’Yoabang kulu go yaué go Kumu koi go ké ba té tumu doi walia na, ké wai kema pena go ké ba woi gondi rorogdo. Ké aii sideia kené waindo waindo, ca kondia ula laré a kuaba kalang ga wa andong duro kulu go yaué go Kumu koi.

³ Ddi sol Piér kang Jâ wa oré andong duro kulu lé, ddi olgé henga.

⁴ Piér kang Jâ si cindegé cai soli ddér, Piér yei wa: Selani.

⁵ Kema lé kua solgé ddér, ddi ’erem ca kandia da bi henga.

⁶ Ama Piér yei wa: Laré go doarna kang luguinya wo ’eno kuabang, ama henga ga ’enungang nagé na, ’enung ca boin, dang gusong go Jésu Krist go Nasarat koi, ji sa dang, ’ra.

⁷ Kardené ddi ’yom kobi go barua, ddi saii dang, kobipadda gondi duroigé dang togaldi wai dono.

⁸ Ddi nyinger dang, ddi osum oré, ddi andong duro kulu go yaué go Kumu koi dang pajerong ga gié lé, ddi ’yé, ddi nyinger, ddi debain Kumu.

⁹ Kalang ga yaué mam soliang oré, ddi wa debainyé Kumu.

¹⁰ Kiddin ga ké ba soli na, ké sol ca na kandi go kema go jomdé kebu kulu go yaué go Kumu koi, go ké ba té tumu doi walia lé na, ké lé muro, Ké sol kagelokemo ca henga ga ba lang nai.

Piér dor kual duro kulu go yaué go Kumu koi

¹¹ Kiddin ga kema lé ba ’yé to Piér kang Jâ kemberam kemberam na, kalang gergu gusugé to dabang do ké ba ta na dabang do Salomon toi. Ké sol kagelokemo bbani ’eno.

¹² Kiddin ga Piér ba sol kain na, ddi yégé wa: Keng ga Israél, keng sol kagelokemo ca kema go ba wai labia lé kainya cawa ga? Keng wa soleni main nia boi kema lé dono do oré dang macaini basé Kumu kainya cawa ga?

¹³ Kumu go Abraham koi, go Isak koi, dang go Jakob koi, na Kumu go moinderana kogé, ddi bi koi go gié Jésu hormo, ddi go keng ba bi kuaba kalang ga ddo ca. Kiddin ga Pilat ba dar ca bogoi dang kau na, keng kain cong.

¹⁴ Ama keng kain ddi go arin carara go geddang cong, keng ol Pilat ca kondia begagenga kema go deddé temai dang.

¹⁵ Keng deddu Bagulong go bogé kalang jomé goang cindegé, ama Kumu belei dang cindi a duro ga maré, nia ga yo hendé doi.

¹⁶ Kema lé kua go keng wa soloi, ddi ba wai dono do oré, na ca dono do Jésu gusondi toi bua, dang bo go cindi ca gusondi lé bu’. Na ca bo cindi ca Jésu ma, ddi waiang labia lé kua main keng ba soliang kua kain.

¹⁷ Karmeng, cakcak kua ’enung sol ca keng dang gemdong gageng lé main kain, ca keng selai ca kondia Jésu ’eno.

¹⁸ Ama kual lé sera to kual go Kumu koi go ba yei kebu kalang gai ga cogelé kebu goi tumu din wa: Krist goi na de gel cin.

¹⁹ Na ca ma, ga bega kebegeng, keng jigageng gusu Kumu ca ké gurdu isinwa dogeng.

²⁰ Kardené Bagulong da begeng kiddin ga bogé gelalé bua, ddia gigegeng Krist, ddi go ddi ba pari tumu din caigeng, to do poré na Jésu.

²¹ Ama cakcak kua na gad Jésu Krist jom dang ni, bera orang saman do belé henga mam herua, main Kumu ba yoang kai ga arin carara ga cogelé kebu goi tumu din kain.

²² Mois yé wa: Bagulong Kumu gogeng da gigegeng go cogelé kebu goi go pena a duro karmegeng main nang kain, kual goni goni mam ga ddia yogeng na, ga jai.

²³ Kema goni goni goa ja go cogelé kebu go Kumu koi lé kua kual goi ’eno na, ka taii a duro kalang ga Kumu kai cong bua, ka basi cong bu’.

²⁴ Ké ga cogelé kebu go Kumu koi dang a gusu Samuél din, dang ké mam ga ba sai kardi kau, ké yé kual go wolé lé koi main kain bu’.

²⁵ Kebu go doré go Kumu ba dori a kebu ga cogelé kebu goi, na caigeng. Keng wo duro kebu go doré go Kumu ba dori moinderengeng, kiddin ga ddi ba yei Abraham wa: A to moin goi na, ’enunga si busu ca to moin mam ga a duro delinya.

²⁶ Kumu gigu koi go gié gusugeng tumu jua ca, kondia si busu caigeng mam bua, ca kenga dda gié gogeng go isini cong bu’.