GIÉ GO PAJERONG GA GIÉ KOGÉ 26 - Kebu go dore go herua 1978

Paul dor kual cai cong tumu Agripa

¹ Agripa yei Paul wa: ’Enung dar ca ji ya kual ca doré kual cain cong, kardené Paul légé kobi ddi sai yé kual ca doré kual cai cong, ddi yé wa:

² Kelma Agripa, gusung mowung combu ca ’enung ba ’eré tumoin labegé ca doré kual go ga Juib ba si cang cong.

³ Ji sol hada do ga Juib togé bua, dang kual gogé go mainyé carara bu’, na ca ma ’enung olin ca ji ’ima ddaindin ja kual guang.

⁴ Ga Juib sol oré guang dang karmai duang din, ké sol ca ’enung jom duro kalang gang bua, dang kalang ga Jorsalem bu’.

⁵ Ké solung tumu din, ké nia dar na, ké bbal ca yoin wa: ’enung kema go gumu a duro gelé go osi go ga Parisié kogé.

⁶ Cakcak kua na, ’enung wa kiddin ga kaidé kual, cawa ’enung tugoia kebu go doré go Kumu ba dorgé moinderana.

⁷ To moin go moac ca sua go kalang gani ga ba tugoiu kebu go doré go Kumu koi lé na, ké ’erem ca ka ’yoi kiddin ga ké wa melaué Kumu teba dang soindo, ai kelma, na ca tugoié lé ma, ga Juib seng kual cang kua.

⁸ Keng ga Juib, keng ’erem ca Kumu belu kalang dang cindegé a duro ga maré ’enoa cawa ga?

⁹ ’Enung bang sai tebena tumu din ca naré Jésu go Nasasat gusondi.

¹⁰ Kua, na henga ga ’enung ba légé a Jorsalem. ’Enung wai dono a gusu gemdong ga tibé Kumu, ca oré nyimé ga bo cindi combu ca bogegé duro gerngang. Kiddin ga ké ba kaidé kual go maré caigé na, gusung mowung bu’.

¹¹ ’Enung gelegé cindegé duro kulu go yaué go Juib kogé mam waindo waindo, ’enung legang dono ca ké kainya bo cindi gogé cong. ’Enung saiang mainyé tebenang nagé, ’enung gelgé cindegé a duro gulong go gemdong go toi ddang goni goni mam.

Paul yé kual goi go ddi ba bé kebi

¹² Na ca ma ’enung ’yé Damas dang dono do gemdong ga tibé Kumu ba bung.

¹³ Ai kelma, kiddin ga ’enung wo duro giyong teba duro gulong na, ’enung sol arinwa do pena saga a dang wulainga arin main teba kain, to lurong kuddab, niang kalang ga orang nang.

¹⁴ Ni mam aserdong dugo, ’enung jé nô yagang kual dang kebu go Hébero, to yé wa: Saul Saul, ji gelung cindung kainya cawa ga? Ji wa loa gusin homé main sî go ba ddoderé sia go kibi cobu go bagulondi koi kain.

¹⁵ ’Enung ’engeri wa: Bagulong, na ji wang ga? Bagulong jogu yeng wa: Na ’enung Jésu go ji wa gelang cindung.

¹⁶ Ama ji sa ’er dang, ’enung boin cindinya ca belein kuang go gié. Jia yé hendé duang gusu kalang ga ddang ca henga ga ji ba solgé labegé kua bua, jia dorgé kual go ’enung ddain da gelin dang nai com bu’.

¹⁷ ’Enung da minyein kuaba kalang ga Juib, dang kalang ga toigé ddang ga ’enung da giin gusugé bu’.

¹⁸ ’Enung da giin gusugé ca ji hangagé cindegé bua, ca ji gulagang duro delem ca ké jima duro arinwa bua, ca ji gulgagang duro dono do Sidan toi ca ké jimang dono do Kumu toi bu’. ’Enunga burogu isinwa do kalang ga bo cindi cang togé, ca ké jima duro kalang ga Kumu kai.

Paul yé kual ca gié goi

¹⁹ Kelma Agripa, ’enung go kainyé soné go beram beram go saga a dang ni ’eno.

²⁰ Ama ’enung dor kual a Damas dang Jorsalem tumu jua, kardené ca gesong ga mam dang kalang ga toigé ddang bu’, ’enung yégé ca ké bega kebegé bua, ké jigang gusu Kumu bua, ké la gié go gelé waldong wang ca ka ba kebegé.

²¹ Na ca ma, ga Juib ’yomung a duro kulu go yaué go Kumu koi ca ka deddang.

²² Ama Kumu na magang duro wolé lé bera labegé, ca ’enunga yagé kalang hendé duang mam, ’enunga yagé kalang ga gemdong dang karang hendé duang mam. Kual go ga cogelé kebu go Kumu koi dang Mois ba yei ca henga la da lé na, na ddi ma ’enung yegang nai mera.

²³ Na kual go Krist ddainya da gel cin bua, ddi da belang cindi a duro ga maré tumu jua bua, ddi da doré nô do minyé do arin ca kalang gani dang kalang ga toigé ddang bu’.

Paul yé Agripa kondia bu cindi

²⁴ Kiddin ga Paul wa yo kual ca doré kual cai cong na, Péstus soi noi yé wa: Paul, jia kema go mam, solé goin go nain lé wa beleinya mam ’enda.

²⁵ Paul jogu yei wa: Kelma go hormo nain, ’enunga go mam ’eno, ’enung yeinya kual go cindi go kema go mam bbal ca yoi ’eno.

²⁶ Kelma Agripa sol kual lé ddar carara, na ca ma, ’enung yé kual tumoi basé muro, ’enung sol ca ddi sol henga lé kua mam, cawa ké la henga lé duro wosuai ’eno.

²⁷ Kelma Agripa, ji bu cindi ca kual go ga cogelé kebu go Kumu koi kogé ga? ’Enung sol ca ji bu cindi.

²⁸ Agripa yei Paul wa: Jia wolé bbani ca ji belang go Krist koi.

²⁹ Paul jogu yei wa: Nia wia kual go bbani, kau kual go nain na, ’enung ol Kumu ca ji dang keng mam ga ba jé kual guang labegé na, keng bel main nang kain, ama ’enung dar ca ké saddegeng dang kunja main nang kain ’eno.

³⁰ Kelma dang go ddo ca, dang Bérnis, dang ké ga jomang nagé mam sai dang ’yé.

³¹ Kiddin ga ké ba andong dong na, ké yé gusugé wa: Kema lé kua la wané pena do bbalé maré ’eno bua, do debé duro gerngang ’eno bu’.

³² Agripa yei Péstus wa: Kema lé kua nia tega go ddo ca gusondi ’eno na, ddi bbala bogé ddang.