GIÉ GO PAJERONG GA GIÉ KOGÉ 22 - Kebu go dore go herua 1978

¹ Karmeng dang baindereng, ga jageng kual go ’enung wa yogeng cakcak kua ca doré kual cang cong.

² Kiddin ga ké ba jé ca ddi wa yogé kualang kebu go Hébero na, ké jogu sugoi sengel. Paul sai yégé wa:

³ ’Enunga Juib, ké wonga Tarsé do ca gesong ga Silisi, ama ’enung malgua Jorsalem kua. Go gelé Gamaliél gelung so go monderana kogé kerab. ’Enung danga tabelang ca kobé Kumu main keng gang labegé kua kain bu’.

⁴ ’Enung gel kalang ga kobé giyong go bagulong koi cindegé bera ’enung nyim bainyong, dang kandu bégé duro gerngang.

⁵ Gemdong ga tibé Kumu gumu gogé dang gemdong ga bedang sol ca kual go ’enung wa yoi la cindi. ’Enung ’yé maktub a kobegé ca karmana ga Juib ga a Damas, ca nyimé ga bo cindi ga a kené ca jogang nagé Jorsalem ca oré bogegé duro gerngang.

Paul yé kual goi go ddi ba bé kebi

⁶ Kiddin ga ’enung tol to gulong go Damas ’yoab na, main teba duro gulong kain, kuabang padda ’enung nodong dang arinwa do tungu wulainyiga a dang lurong dugo kuddab.

⁷ ’Enung aserong dugo pac, ’enung jé nô wo yoang wa: Saul, Saul, ji gelung cindung kainya cawa ga?

⁸ ’Enung jogu yei wa: Bagulong na wang ga? Ddi jogu yeng wa: Na ’enung Jésu go Nasarat go ji wa gelang cindang.

⁹ Kalang ga orang nang na, ké sol arinwa lé carara, ama ké ja ddi go wa yoang kual lé nô ’eno.

¹⁰ ’Enung ’engeri wa: Bagulong, ’enung da la mena ga? Bagulong jogu yei wa: Sa dang, ’era Damas, ka yein kual mam go Kumu dar ca jia la.

¹¹ Kardené ’enung bibé ca arinwa do ba wulain cindung lé, kalang ga orang nang lé ’yom kuabang ’yang nang Damas.

¹² Kema go pena wo kené go ké ba tei Ananias, ddia kema go meré Kumu bua, ddi magu so guana bua, ga Juib a Damas pedei nain nu’.

¹³ Ddi ’erga waiung, ddi yeng wa: Kermeng Saul, dda cindin sela kiddin, kobipadda cindung hangong sol kiddin.

¹⁴ Ddi yeng wa: Kumu go moinderana kogé parinya tumu din, ca jia sela henga ga kederei ba dargé bua, jia sela koi go pena kiddi kiddi go geddang bua, jia ja kual go kibi bu’.

¹⁵ Ca jia ja kema go yo hendé doi gusu kalang mam, ca henga ga ji ba solgé, dang kual go ji jei bu’.

¹⁶ Cakcak kua ji ama wa ga? Sa dang, tega Bagulong gusondi, dda ké desin to kang, ké pel isinwa doin cong.

Paul yégé kandia gii gusu kalang ga toigé ddang

¹⁷ ’Enung jiga Jorsalem, kiddin ga ’enung wa ol a duro kulu go yaué go Kumu koi soné go beram beram leng.

¹⁸ ’Enung sol Bagulong, ddi yeng wa: Bia gusin kala cab, dda Jorsalem cawa kalang ’yo kual go ji wa yoi cang ’eno.

¹⁹ ’Enung jogu yei wa: Bagulong ké sol ca ’enung ’yé duro kulu go yaué go Juib kogé, ’enung nyim ga bo cindi cain bégé duro gerngang bua, ’enung tegang belau bu’.

²⁰ Kiddin ga ké ba deddu Etién go yo hendé doin na, ’enung wo kené bu’, ’enung dar ca kandia deddi, ’enunga kema go magé badigé gagé bu’.

²¹ Kardené Bagulong yeng wa: ’Era, ’enung giein kiddin ga suguddong gusu kalang ga toigé ddang.

Paul kang gumu go asengeriyong dubu go Rom kogé

²² Kalang ga yaué combu jé kual go Paul koi bera ddi yégé kual go ba lé, ama kardené ké osum soi noigé, ké yé wa: Ga deddu kema lé cong, ddi bbala jomang cindi ’eno.

²³ Ké jeb alalé, ké tor badigé gagé cong, ké wujirdé gesong dang.

²⁴ Gumu go asengeriyong dubu kogé si kandia ca gula Paul duro gulong go asengeriyong kogé, kandia tegaiang belau ca kondia yagé kualang duro, ca ddia solé kual go kalang ga yaué combu wa cebé alalé cai.

²⁵ Kiddin ga ké wa saddiei ca togoi na, Paul yei gumu go asengeriyong ga aru kogé go ba ’eré wo a kiddin lé: Keng bbal ca togé kié go Rom dang belau basé kaidé kual cai tumu jua ga?

²⁶ Kiddin ga gumu go asengeriyong aru kogé ba jé kual lé na, ddi ’yé gusu gumu go asengeriyong dubu kogé, ddi yei wa: Ji dar ca loa mena ga? Kema la kié go Rom.

²⁷ Gumu go asengeriyong dubu kogé ’yé gusu Paul ’engeri wa: Main yang dé, jia kié go Rom ga? Paul jogu yei wa: ’I.

²⁸ Gumu go asengeriyong dubu kogé jogu yei wa: ’Enung boia laré combu ca belé kié go Rom. Paul jogu yei wa: ’Enunga kié go wo go Rom.

²⁹ Ké ga ba nyan gusugé ca ka togoiang belau na, kobegépadda ké ddei, kiddin ga gumu go asengeriyong dubu kogé ba jé ca Paul na kié go Rom na, ddi lé muro bbani ’eno ca ddi saddiang kunja ka.

Paul ’eré tumu gemdong ga bedang

³⁰ Waindo na, gumu go asengeriyong dubu kogé dar ca ddia solé ga Juib na si kual ca Paul cawa ga? Ddi pori kunja cong, ddi si gemdong ga tibé Kumu dang gemdong ga bedang mam, kandia yaua, kardené ddi gol Paul si tumoigé.