GIÉ GO PAJERONG GA GIÉ KOGÉ 20 - Kebu go dore go herua 1978

Paul ’yé ca gesong ga Masadon dang Grék

¹ Kiddin ga kual go gendei lé ba ka na, Paul yau kalang ga bo cindi, ddi jalgé ddaindigé, ddi sigé labia, kardené ddi sai ’yé Masadon.

² Ddi dal gesong lé, ca kual goi go gelé na, kalang ga geddang wai dono ca oré tumu tumu. Kardené ddi ’yé ca gesong ga Grék.

³ Ddi jom kené kederé subu, kiddin ga ddi nyan gusi ca oré Siri na, ddi jé na ga Juib ba nyan kual ca deddei. Na ca ma ddi boi cai jogu Masadon.

⁴ Sopaté go Pirus go Béré kurondi ’yang nai a Asi, dang Aristak, dang Sékondis ga Tasalonika bua, dang Gauis go Derbé, dang Timoté, dang Tisik, dang Tropim ga a ca gesong ga Asi bu’.

⁵ Ké ’yé tumoini ameni a Troas.

⁶ Ni lé soré go kederé cindi go wo go basé debé subugu, kardené ni nai kuburo a Pilip, wolé bai ni waigé a Troas, ni jom kené wolé jurgum.

Oré go Paul koi go karu ca solé kalang ga Troas

⁷ Wolé go tumu go jurgum kiddin ga ni yau ca bbodelé wo na, Paul dorgé kalang ga yaué combu kual, ddi dorgé kual bera duro soindo ca waindo ddia ddégé.

⁸ Tua wo kené combu a duro kulu go porio go ni ba yau kené.

⁹ Kurong go marna go pena go ké ba tei Itiké, ddi jom a duro sél do kulu toi, kiddin ga Paul wa yo kual suguddong dé na, ddi woi kung nain, ni wo duro kulu go porio go subu dang, ddi aserong dugo, ké aii dang, ama ddi ma.

¹⁰ Paul gesingu dugo, ddi ddingé cai, ddi aii kobi dang, ddi yé wa: Ddo kederegeng homegeng ’eno, cawa ddiang cindi dé.

¹¹ Kardené ddi jogu nai duro kulu go porio dang, ddi bbol wo di, ddi jogu dorgé kual bera teba andong, kardené ddi sai ’yé.

¹² Ké gol kurong go marna lang cindi. Ké mam gusugé mowegé bbani ’eno.

Ké sai a Troas ’yé Milé

¹³ Ni nai kuburo ’yé tumu a Asos, na kiddin ga ni dar ca aié Paul a kéné cawa ddi dar ca oré kené danga gondi.

¹⁴ Kiddin ga ddi waini a Asos na, ni aii duro kuburo dang nani, kardené ni ’yé Mitilén.

¹⁵ Ni sai kené, waindo ni hal dur Sio, menga ni ’yé Samos, menga do kua ni ’yé Milé.

¹⁶ Paul ’erem ca halé Epés basé ’eré dugo, cawa ddi dar ca ddo kiddinya halei a ca gesong ga Asi ’eno, ddi osu gusi kala ca ddia oré Jorsalem tumu wolé go Péntékot.

Paul dorgé gemdong ga Epés kual

¹⁷ Kiddin ga Paul wo a Milé na, ddi gi té gemdong ga duro yaué go Kumu koi a Epés.

¹⁸ Kiddin ga ké ’yé gusi na, ddi yégé wa: Keng sol gié guang go ’enung ba lei kiddin ga ’enung ba jom duroigeng, keng sol wolé go ’enung ba si to ca lo gié ca gesong ga Asi.

¹⁹ ’Enung lé gié go Bagulong koi dang jalua luguab luguab dang tubu do cendung, dang gelé go cin combu ca golé go Juib kogé.

²⁰ Keng sol ca ’enung wusageng kual pena ’eno, ’enung dorgeng kual dang gelé mam tumu kalang bua, dang tageng gulong bu’.

²¹ ’Enung yégé ga Juib dang kalang ga toigé ddang, ca kandia bega kebegé bel gusu Kumu bua, kandia bu cindi ca Bagulondena Jésu bu’.

²² Cakcak kua ’enung wa ora Jorsalem main Habé ga Kumu kai ba gelungang kain, ’enung sela henga ga da ’yé loang ni kua ’eno.

²³ ’Enung sol ca Habé ga arin carara wa yoang wa: A duro gulong go gumu goni goni kau, gerngang dang gelé go cin wa amang wo kené.

²⁴ ’Enung sol gusung mainya henga ga kalin kain, ca ’enung lo gié go Bagulong Jésu koi go ba bung bera karei. Gié lé na, na ca doré Nô do Ddari ca wai do Kumu toi.

²⁵ ’Enung dal duroigeng mam ca doregeng kual go Leu do Kumu toi kua, ama cakcak kua ’enung sol ca keng go jogu soalang ddang ’eno.

²⁶ Na ca ma, ’enung wa yogeng waldong wang labegé, kema pena a duroigeng nia basong na, kebardi wo ’eno cang.

²⁷ Cawa ’enung dorgeng kual go Kumu koi mam, ’enung wusageng kual pena ’eno.

²⁸ Ga maga gusugeng ddara, dang gamgé ga Habé ga Kumu kai segeng ca magégé. Ga maga yaué go Kumu koi go ddi ba toriang Kurondi kebardi.

²⁹ ’Enung sol kiddin ga ’enunga ddogeng na, kalang ga main bagomso kain da andong duroigeng, ké go solé nyageigeng ’eno.

³⁰ A duroigeng kalang ga pena da saiang kual go poi, ka belé kalang ga bo cindi ca kandia kubagé.

³¹ Ga jimageng yoal yoal, keng sol ca ’enung gelgeng ddegelé subu soindo dang teba dang tubu do cendung.

³² Cakcak kua na, ’enung ddegenga kuaba Kumu, dang kual goi go wai, ddi bbal ca bogeng dono bua, dang henga ga ddari ga ddi wa magegé deba ca kalang gai mam bu’.

³³ ’Enung la tabelang ca doarna, kau luguinya, kau badigé ga kema pena kai ’eno.

³⁴ Keng sol ca ’enung lé gié danga kalndung ca abé gusung, niang kalang gang.

³⁵ ’Enung gelgeng main kain ca keng la gié ca jégené kalang ga nyagé. Na ’erem ca kual go Bagulong Jésu koi go ddi ba yei: Kema go bo kalang henga kalin na, gusi mowi ddi ga ’yo henga kobi.

³⁶ Kiddin ga Paul be yé kual lé main kain na, ddi poi gomdi dugo kang ga nagé mam, ddi ol daiang nagé mam.

³⁷ Ké mam ’elé bbani ’eno, ké bai gusugé muddag, ké ddagedé gusi cong, ké si labia.

³⁸ Kederégé homdégé ca ddi yégé wa: Kandia go jogé soloi ddang ’eno, kardené ké bei bera si duro kuburo.