GIÉ GO PAJERONG GA GIÉ KOGÉ 2 - Kebu go dore go herua 1978

Habé ga Kumu kai orang gogé

¹ Kiddin ga wolé go Péntékot ba bbal na, kalang ga bo cindi mam danga yaué kiddin ga pena lé dé.

² Kobegépadda ké jé nô main kal go osi kain, yaga a dang ’erga won kulu go ké ba jom kené lé.

³ Ké sol henga bosindé jom ca kema goni goni a duroigé main tua do belelem kain.

⁴ Ké won dang Habé ga Kumu kai mam, ké osum yo kual dang kebu go ddang go Habé ba gelgé yo.

⁵ Juib ga pena ga meré Kumu ga ba saga a ca gesong ga delinya mam jom wo Jorsalem.

⁶ Kiddin ga ké ba jé nô lé na, kalang combu yau, ké sol kagelokemo, cawa kema goni goni jé ca ké wa yo kual danga kebu goi.

⁷ Ké piong muro ked ked, ké sol kagelokemo, ké yé wa: Sela, kalang ga wa yo kual lé kua na, nia ga Galali mam ’eno ga?

⁸ Kema goni goni a duroina wa jo kualang kebu goi go wo kainya mena ga?

⁹ Kalang ga pena a duroina na, ké saga ca gesong ga Parté, dang Médé, dang Elam, dang kalang ga Mésopotami, dang Judé, dang Kapados, dang Pont, dang Asi.

¹⁰ Dang Prigi, dang Pampili, dang Ejibté, dang gesong ga Libi ’yoab dang Serén. Ga pena saga a Rom bu’.

¹¹ Ga Juib dang ké ga ba belé gusugé Juib, dang kalang ga Krét, dang ga Arab, na mam jé ké wa yo kual dang kebu guana, go gié go gumu go Kumu koi.

¹² Ké mam sol kagelokemo, ké ’eridé, ké ’enger gusugé wa: Kual lé toia mena ga?

¹³ Ga pena lé kalang ga bo cindi lé bbojo. Ké yé wa: Céré koiegé.

Piér dorgé kalang combu kual

¹⁴ Kardené Piér kang pajerong ga gié ga moac ca pena sai ’eré dang. Piér soi dang osu, ddi yégé kalang ga yaué combu wa: Keng ga Juib dang kalang ga jomé Jorsalem mam, ga jageng kual go ’enung wa yogeng dang nai ddara.

¹⁵ Kalang lé kua kuia dang céré main keng wa ’eremang caigé kain ’eno, cawa na habenya go bandu dé.

¹⁶ Ama cakcak kua sera to kual go cogelé kebu go Kumu koi Joél ba yei.

¹⁷ Kumu yé wa: Duro wolé toi do karé na, henga da lé main kain. ’Enung da bé Habé gang ca kalang mam, Karndegeng ga bainyong dang karndegeng ga kandu, Ka cogel kebu go Kumu koi. Marné ka sol henga ga ddain da ser toiné, Kalang gageng ga hadeldong na, soné da légé.

¹⁸ Cindi a duro wolé lé na, ’enunga bé Habé gang, Ca kang ga gié, bainyong dang kandu, Ka cogel kebu go Kumu koi.

¹⁹ ’Enung da gel henga ga kagelokemo a dang, Dang gié go dono go kagelokemo dugo ca gesong kua. Kebar, dang tua, dang meddalin do gesa toi da lé.

²⁰ Tumo wolé go Bagulong koi go da ’erga na, Teba da belé delem bua, Kederé da belé yilé main kebar kain bu’, Wolé lé na, na wolé go gumu go hormo bbani ’eno.

²¹ Duro wolé lé na, kema goni goni goa té Bagulong gusondi na, ddia minyé.

²² Keng ga Israél, ga jageng kual go ’enung wa yogeng, Jésu go Nasarat, ddia kema go Kumu ba gel hendé doi waldong wang, ca gié goi go dono go kagelokemo go ddi ba lei, dang henga ga gelé ga ddi ba gelgé a duroigeng main keng gang ba solang kain.

²³ Kema lé go keng ba yomé go kalang ga isindong ba bbobeli ca sia go adegelé ca deddei na, na Kumu banga nyané kual lé ca henga ga kederei ba dargé tumu din.

²⁴ Ama Kumu beliang cindi a duro ga maré, ddi pori a duro gelé go cin go maré koi, cawa maré bbal ca narei dang dono doi ’eno.

²⁵ Cawa Dabid yé kual goi, ddi yé wa: ’Enung sol Bagulong tumang waindo waindo, Cawa ddi wo ca kuabang go barua, Ca ’enunga yoré ’eno.

²⁶ Na ca ma ddaindunga béré hér bua, ’Enung yé kualang gusu mowa bu’, Gusunga todero, kau ’enung jom danga tugoié,

²⁷ Cawa jia ddé keudung duro ligiam ’eno, Ji go ddo koin go arin carara osinyé ’eno.

²⁸ Ji gelung giyong go oré jomang cindung. Gusung da mowung nain ca jianga nang.

²⁹ Karmeng, ddang yegeng kual go moindena Dabid koi waldong wang: Ddi ma, ké ’embei, kemgané gai wo kené duroina bera labegé.

³⁰ Ddia go cogelé kebu go Kumu koi, Kumu bbesé gusi, ddi dori kebu ca ddia da ai kema pena a to moin goi belei kelma main ddi bang kain.

³¹ Dabid sol henga ga ddain da lé, na ca ma ddi yé kual go belé go Krist koi goang cindi a duro ga maré. Ddi yé wa: Ké go ddoi ligiam ’eno, Gusi go osinyé ’eno bering.

³² Kumu bela Jésu lé a duro ga maré kua, ni mam na ga yo hendé doi.

³³ Ké aii dang a Kumu kobi go barua, Ba bi Habé gai ga arin carara main ddi ba dori kebu caigé lé, ddi sai begagé caini, kua na henga ga keng wa solegang cindegeng bua, keng wa jogang semaigeng cakcak kua bu’.

³⁴ Cawa Dabid bang naia dang ni ’eno, ama ddi yé wa: Bagulong yei Bagulondang wa: Ji jima ca kuabang go barua,

³⁵ Bera ’enung da jogu kalang gain ga tebena main bendem go candé gondin kain.

³⁶ Dda ga Israél mam sela carara, na Jésu lé go keng ba bbobeli ca sia go adegelé ma, Kumu beleia ddi Bagulong dang Krist.

³⁷ Kiddin ga ké ba jé kual lé main kain na, ddaindigé algé. Ké ’enger Piér kang pajerong ga gié kané: Karmeni nia la mena ga?

³⁸ Piér jogu yégé wa: Ga begageng kebegeng, kema goni goni kau, dda ké disi to kang dang Jésu Krist gusondi ca ké buraga isinwa dogeng, kardené Kumu da begeng Habé gai ga arin carara kalin.

³⁹ Cawa kebu go doré go Kumu koi, na caigeng dang karndegeng bua, dang ké mam ga ba jom suguddong has ga Bagulondena Kumu da tégé bu’.

⁴⁰ Piér yégé kual go ddang combu, ddi géjegé, ddi yégé wa: Ga minyu gusugeng a duro kalang ga ba kaiyong lé kua.

⁴¹ Kalang combu a duroigé ga ba ’yé kual go Piér koi na, ké desegé to kang. A duro wolé lé na, kalang ga bu cindi bé cainé main dubu subu kain.

⁴² Ké gom gelé go pajerong ga gié kogé geddang bua, ké lé dandang dang gusugé, dang bodelé go wo bua, dang olé bu’.

Kalang ga bo cindi jomé gogé

⁴³ Ca gié go dono go kagelokemo, dang henga ga gelé combu ga pajerong ga gié ba léga na, kema goni goni kau muro lei.

⁴⁴ Ga bo cindi mam ké yau pena bua, ké dai henga gagé mam pena bu’.

⁴⁵ Ké keldé yagé gogé dang henga gagé ga kobegé cong, ké gosindégé duroigé mam, kema goni goni kau wai bbal ca nyagé doi.

⁴⁶ Ké gom yaué waindo waindo duro kulu go yaué go Kumu koi bua, ké didé do ta gusugé gulong dang gusu mowa bua, dang ddainya pena bu’.

⁴⁷ Ké debain Kumu bua, kalang mam kederégé ’yégé bua, Bagulong bégé kalang ga wai minyé caigé waindo waindo bu’.