GIÉ GO PAJERONG GA GIÉ KOGÉ 19 - Kebu go dore go herua 1978

Paul a Epés

¹ Kiddin ga Apolos jom a Korint na, Paul col dalé ca bangarong ga a ca gesong lé, ddi ’yé Epés. Ddi wai anjama ga pena a kené.

² Ddi ’engergé wa: Kiddin ga keng ba bu cindi na, keng ’yé Habé ga Kumu kai ga? Ké jogu yei wa: Kual go Habé ga Kumu kai na wo kené na, ni ja ’eno.

³ Kardené Paul ’energé wa: Ké desegeng to kanga go wang koi ga? Ké jogu yei wa: Na go Jâ koi.

⁴ Paul yégé wa: Jâ desa kalang ga ba bé kebegé to kang, ddi yégé ga Israél ca kandia bu cindi ca ddi go da wa orang kardi, to do poré, na Jésu.

⁵ Kiddin ga ké ba jé kual lé kain na, ké desegé to kang dang Bagulong Jésu gusondi.

⁶ Kiddin ga Paul ba si kobi caigé na, Habé ga Kumu kai gesin caigé, ké osum yé kualang kebu go ddang, ké doré kual go Kumu ba bigé.

⁷ Kalang lé mam bbal mainya moac ca sua kain.

⁸ Paul dor kual duro kulu go yaué go Juib kogé bbal main kederé subu kain basé muro, ddi dorgé kual ca Leu do Kumu toi, ddi ddigang kual.

⁹ Ama ga pena a duroigé kain bo cindi cong, ké yé kual go bbojo ca giyong go Bagulong koi tumu kalang ga yaué mam. Paul ddégé, ddi gol ga anjama ’yang nai, ddi dorgé kual a duro kulu go gelé go Tiranus koi waindo waindo.

¹⁰ Ddi lé main kain bbal ddegelé sua, kalang ga jomé ca gesong ga Asi, ga Juib dang kalang ga toigé ddang, ké jé kual go Bagulong koi mam.

Sikiba karndi

¹¹ Kumu lé gié go dono go kagelokemo gusu Paul.

¹² Ké nyim badigé gai ga ddi ba sigé gusi dang badigé gai kebegé ga bbani, ké ’yé sogé gusu kalang ga hoamya, ké wa labia bua, habé ga isini turong a kederé kalang cong bu’.

¹³ Juib ga pena ga wa taié habé ga isini cong wa dalé gulong goni goni, ké dar ca taié habé ga isini cong dang Jésu gusondi, ké yégé habé ga isini wa: Ni segeng dang Jésu gusondi, na ddi go Paul wa doré kual goi.

¹⁴ (Ké ga wa lo main kain lé na, na Sikiba karndi jurgum, ddia ga Juib gumu gogé go tibé Kumu.)

¹⁵ Ama habé ga isini jogu yégé wa: ’Enung sol Jésu bua, ’enung sol Paul bu’, ama keng, kenga gani ga?

¹⁶ Kema goang habé ga isini lé soi caigé bered, ddi ddi caigé mam, ddi légé homi nain bera ké geré a tai gulong gandela dang yanyong gusugé.

¹⁷ Kiddin ga ga Juib dang kalang ga toigé ddang ga jomé a Epés mam ba jé kual lé na, ké lé muro, ké bi Bagulong Jésu gusondi hormo nain.

¹⁸ Kalang combu a duro ga bo cindi ’yé tor isinwa dogé toa dang tumu kalang mam.

¹⁹ Ga pena combu ga ba lé gié go kema go béli na, ké nyim cidab dogé ulo tumu kalang mam. Ké ddogin laré gua go kela go doarna dubu to bai.

²⁰ Main kain lé na kual go Bagulong koi aju tumu tumu dang dono bbani ’eno.

Kual sai gendei a Epés

²¹ Kiddin ga henga lé ba hal na, Paul dar ca colé Masadon dang Akai ca oré Jorsalem, ddi yé wa: Kiddin ga ’enunga tol Jorsalem na, na gad ’enunga ’yé solé Rom.

²² Kardené ddi gi kalang ga jégené sua ca Masadon, na Timoté kang Arasté, ama ddi bang jom ca gesong ga Asi sam dé.

²³ A duro saman lé ma, kual sai gendei bbani ’eno ca giyong go Bagulong koi.

²⁴ Kema go nyiré juliong wo kené go ké ba tei Démitrus. Ddi nyiredé tiddin do kulu go yaué go kula go Artemés koa, ddi wai cageda combu dang gié lé.

²⁵ Ddi yau kalang gai mam, dang ké ga lo gié go main kain bu’, ddi yégé wa: Karmeng, keng sol ca na wai cageda combu ca gié guana lé.

²⁶ Kema go Paul lé, henga gai ga wa logé na, keng wa jo bua, keng wa solegé bu’. Ddi yé waldong wang kumurong ga kalang ba légé na, na kumurong ’eno, ddi yégé kalang combu main kain, na a Epés kua mera ’eno, ama a ca gesong ga Asi mam bu’.

²⁷ Kual lé da toinya gié guana mera ’eno, ama da toinya hormo do ’yogulondena Artemés do tungu kula goa go yaué bu’. Kula lé go kalang ga a ca gesong ga Asi dang kalang ga a duro delinya mam wa debainyei na, ka toin hormo doi mam.

²⁸ Kiddin ga ké ba jé kual lé kain na, ké lé mainyé bbani ’eno, ké soi noigé, ké yé wa: Artemés do kalang ga Epés togé na, toa tungu.

²⁹ Kual lé sai duro gulong mam, ké ’yom Gaius kang Aristak, ké ca’, ka kalang ga Masadon ga dalé kiddin kang ga Paul, ké geré ’yang nagé to toburo.

³⁰ Paul dar ca ddia oré ’eré tumu kalang mam ga ba yaué, ama kalang ga bo cindi nari.

³¹ Kalang ga pena a duro gemdong ga a ca gesong ga Asi, ka kajanderndei, ké gi gusi, ké oli ca kondia oré andong duro kalang ga a to toburo lé ’eno.

³² Kalang ga pena soi noigé, ké yé kual dugo yag yag, kané soi noigé yang kual go ddang dugo yag yag bu’, cawa kalang combu sela yaué lé toi ’eno.

³³ Ga Juib ga pena a duro kalang ga yaué combu ’yom Alésandré si tumu kalang. Alésandré légé kobi, ddia dar ca yo kual tumu kalang ga yaué combu ca doré kual caigé cong.

³⁴ Ama kiddin ga ké ba sol ca kondia na go Juib na, ké soi noigé, ké ceb alalé bbalé kiddin sua, ké yé wa: Artemés do kalang ga Epés togé na, toa tungu.

³⁵ Kardené gumu go pasu maktub go a duro gulong lé, sai jal kalang ga yaué combu kederégé, ddi yégé wa: Keng ga Epés, kalang mam sol ca gulong go gumu go Epés na, wa magé kulu go yaué go ’yogulondena Artemés do tungu, dang tinddo do ba baga a dang.

³⁶ Kema bbal ca mainyé kual lé ’eno, na ca ma, ga jimageng kebegeng kurad, ddo keng soang kual kala ’eno.

³⁷ Keng gulga kalang lé kua, ama ké go toinya kulu gogeng go yaué ’eno bua, ké go so kual ca ’yogulondena lé ’eno bu’.

³⁸ Démitrus dang kalang gai ga gié nia dang kual go so ca kema na, wolé go kaidé kual wo kené, na kiddin ga ké kaidé kual go geddang. Kalang ga gemdong wo kené bu’, kenga dar na, ’erageng kembegé gusugé.

³⁹ Ama kual go ddang go nyané nia wo kené na, ga nyanai a duro bedang tumu kalang.

⁴⁰ ’Enung ’erema ca kual go ba sai gendei labegé lé kua na, bbal ca go ddo ca ddainya sena kual caina, main kain na, na bbal ca doré kual lé caina cong ’eno.

⁴¹ Kiddin ga ddi ba yé kual lé kain na, ddi ddé kalang ga yaué combu ’yé.